Jobakʼ 28 - সান্তালী বাইবেল

¹ “Rupạ reakʼ do khạn menakʼa ar sona nirại ocoy reakʼ hõ ṭhạ̃i menakʼa.

² Hasa khon mẽṛhẽtʼko la totʼeda, ar tamba do gitil dhiri khonko galao totʼeda.

³ Dhạrti reakʼ khạndri kaṛaṅ ńutre oka menakʼ manwa do ona sạńgińkate daman dhiri reakʼko ḍunḍhạukana.

⁴ Manwa ṭhạ̃i khon sạṅgińre okare manwa bako calakʼkan onḍe onko do khạnko layeda, ar ona khạnrege onko doko jhilạkʼkana.

⁵ Okaṭakʼ otre phosol janamokʼkan, ona ot latarrege manwa do seṅgel jolkateko ulṭạ ulṭiyetʼkana.

⁶ Onako dhirire do nilkanto mạnik menakʼa, ar otre do sona reakʼ gunḍạge tahenkana.

⁷ Khạn reakʼ hor do gidi kũṛitʼ hõ bako baḍaea, ar jalo cẽṛẽko reakʼ mẽtʼ hõ ona do bako ńelakada;

⁸ Jãhãn dhomok janwar hõ onḍe do bako lebetʼ akawada, ar cele dhạcri kul hõ ona cetante bako parom akana.

⁹ Ona kạṭhin dhirirege manwa do tiye capoyeda ar buru reakʼ rehetʼ khongeye layeda.

¹⁰ Ona buru talate sunḍkoe kholaoeda; onḍenakʼ sanam damanakʼ jinisko do uniyakʼ mẽtʼre paṛaokʼkana.

¹¹ Uni do jharna reakʼ dakʼ ńurokʼe bond ocoyetʼkana ar okoakʼ jinis do marsalteye oḍok ạguyetʼ kana.

¹² “Menkhan ạkil do okare ńamkokʼa? Ar bud do okare tahen kana?

¹³ Hoṛ do ona reakʼ dam bako baḍaea; jiwetʼkoakʼ disạmre ona do baṅ ńamokʼa.

¹⁴ Athantar dakʼ doe meneda, ‘ińre ona do bạnukʼa,’ doreão hõe mena, ‘iń ṭhen hõ ona do bạnukʼa.

¹⁵ Khạṭi sonate hõ ona do ohoge kirińlena, ar ḍher rupạte hõ ona reakʼ dam do baṅ emogokʼa.

¹⁶ Ophir sonate hõ ona do ohoge kirińlena, Boidurjo mạnik ar nilkanto mạniktehõ ona do baṅ kirińokʼa.

¹⁷ Sona se damanakʼ kãcte hõ baṅ somanokʼa, nirạ sona reakʼ bhajan bodolte hõ ona do baṅ ńamokʼa.

¹⁸ Probal ar jiwetʼ dhiri reakʼ hõ dam do bạnukʼa; ar muti mạnikko khon hõ ạkil reakʼ dam do ḍhergea.

¹⁹ Ona tulucʼ do Kus disạm reakʼ podmorag mạnik hõ baṅ jurikʼa; khạṭi sonate hõ ona do baṅ kirińokʼa.

²⁰ “Enḍekhan ạkil do oka khon hijukʼkana? Ar buj do oka khon hijukʼkana?

²¹ Sanam jiwiyankoakʼ mẽtʼ khon ona do danaṅgea, coṭren cẽṛẽko ṭhen khon hõ ona do okore menakʼa.

²² Maraokʼ ar gujukʼ dokin menede, ‘ona reakʼ unạn do ạlińakʼ luturte liń ańjomakada.’

²³ “Isorge ona reakʼ hor doe bujhạu daṛeakʼa; eken unigeye baḍaea ona do okare tahenkana,

²⁴ ente uni do dhạrti reakʼ ses simạna hõe ńeletʼkana; ar serma latar reakʼ jotowakʼge uniyakʼ mẽtʼ doe ńeleda.

²⁵ Uni do tinre hoere daṛeye emakʼkana ar dakʼko doe soṅ niṭetʼkana,

²⁶ tinre uni do jạ̃ṛĩ dakʼ reakʼe bondoboskeda, ar bijli huḍur reakʼ hor hõe bandhaokeda,

²⁷ unre uni do ạkile ńelkeda ar onae soṅkeda; uni do mońjteye ńelkeda ar ona reakʼe ḍunḍhạukeda.

²⁸ Ona tayom uni do manwae metadea, ‘Probhu Isor botoraege hoyokʼ kana ạkil do, ar bạṛicʼ khon sahaṛokʼge hoyokʼ kana buj do.