Jobakʼ 27 - সান্তালী বাইবেল

¹ Job do katha roroṛtegeye tahẽyena. Uni doe menkeda,

² “Okoe ińakʼ hoke hatao akatʼtiń uni jiwetʼ Isor ńutumteń kiriạkʼkana, okoe ińakʼ jiwiye hewer haṛhatʼ akatʼtiń uni sanam daṛeanicʼ ńutumte kiriạkateń meneda,

³ tinạkʼ din ińre jiwi menakʼ, tinạkʼ din Isorakʼ sahẽtʼ ińakʼ mũre tahen,

⁴ unạkʼ din ińakʼ moca do phạsiarawakʼ bae roṛa, ińakʼ alaṅ hõ phikirteakʼ kathako bae roṛa.

⁵ Ape je, ṭhikpe roṛetʼkan ona do tishõ bạń aṅgoca; ińakʼ gujukʼ din hạbicʼ iń mena, iń do sạriyakʼ kathageń roṛetʼkana.

⁶ Dhoromiń sapʼ uricʼ akada, ar bạń aṛakʼ gotʼkakʼa. Tinạkʼ din jiwetʼ iń tahen unạkʼ din inạkʼ bibek do iń bae dusiyińạ.

⁷ “Ińren bạiri do dusṭạmi hoṛ lekako hoyokʼma; iń upạrte teṅgonicʼ do bedhoromicʼ lekae hoyokʼma.

⁸ Isor do acʼ baṅ botoraekanko tinreye maraokoa, unre onko do cetʼ asge baṅ tahentakoa.

⁹ Onko cetanre kosṭo hecʼlen khan Isor do cetʼ onkoakʼ rakʼe ańjomtakoa?

¹⁰ Onko do cetʼ sanam daṛeanicʼ iạteko rạskạkʼa? Onko do cetʼ jaoge Isorko hohoaekana?

¹¹ Isorakʼ ektiạri reaṅ iń cetʼapea; sanam daṛeanicʼ reaṅ do bạń oko danaṅa.

¹² Ape sanamkoge coṅ noakope ńeletʼkan, enḍekhan noa ạuṛiyakʼ katha do cedakʼpe roṛeda?

¹³ “Isor do bạṛicʼ hoṛkoakʼ bhạgre okae dohoakatʼ, ar sanam daṛeanicʼ ṭhen khon haḍrapko oka ạidạriko ńam ona do:

¹⁴ Onkoren gidrạko saṅge lenrehõ onko lạgitʼ do botoranakʼ gujukʼ ṭhik dohoakana. Onkoren hoponko do tishõ lacʼ bicʼ jomakʼ bako ńama.

¹⁵ Onko tayom okoe sarecʼko tahen onko do mahamạriteko gujukʼa; onkoren rạnḍi maejiuko do onko lạgitʼ bako homor halaṅa.

¹⁶ Onko do dhuṛi leka rupạko ḍạṅlere hõ hasa leka kicricʼ khạnḍwạkʼko puńjilere hõ

¹⁷ onkoakʼ ona kicricʼ khạnḍwạkʼ do dhorom hoṛgeko horoga, ar miridos hoṛ do rupạko hạṭiń joṅa.

¹⁸ Onkoakʼ benaoakʼ oṛakʼre do tejoko tahena, ona do pahradarkoakʼ macan oṛakʼge hoyokʼa.

¹⁹ Onko do kisạ̃ṛgeko jạpida, menkhan ebhenkate sanamakʼ caba utạr akanko ńela.

²⁰ Banbạsi leka botor do onkoe esetʼ ạcuretʼkoa, ńindạ reakʼ birbão hoe hõ onkoe oṭaṅ idikoa.

²¹ Purub reakʼ hoe do onkoe idikoa, ar onko doko calakʼa; onkoakʼ jaega khon ona hoe doe oṭaṅ idikoa.

²² Ona birbão hoe khon tinre usạrateko ńirjoṅa unre kurmutạha leka ona do onko cetanre paṛaokʼa.

²³ Ona hoe do cigạriateye thayoya, ar onkoakʼ ṭhạ̃i khon sũ sũkateye laga oḍokkoa.