Jobakʼ 26 - সান্তালী বাইবেল

Jobakʼ roṛ ruạṛ

¹ Unre Job do roṛ ruạṛketʼteye menkeda,

² “Nijoricʼ do oka lekape goṛowadea ar laṅgayicʼ baṅ oka lekape bańcaokede?

³ Bin ạkilanicʼ do tinạkʼpe solhawadea ar tinạkʼ asambheṛ ạkilpe sodoradea?

⁴ Am do okoeyakʼ goṛote noako katha dom roṛetʼ kana? Ar okoeyakʼ katha do amakʼ moca khon oḍok hijukʼkana?

⁵ “Gocʼ hoṛ do botorteko thar tharaokʼ kana; onko do dakʼ ar dakʼ latarre tahenko tulucʼko thar tharaokʼ kana.

⁶ Isor samaṅre Sheol do oṭakʼgea; Abadonakʼ hõ dapalokʼ reakʼ do bạnukʼa.

⁷ Utạr reakʼ rimil do phaelaoreye pasnaoeda; ar phaelao jaegare dhạrti doe aka dohoakada.

⁸ Dakʼko do acʼakʼ dạriạ rimilreye dohokakʼ kana Menkhan ona reakʼ hamalte hõ rimil do baṅ oṛejokʼkana.

⁹ Uni do kunạmi cando reakʼ mẽtʼãhãe dapaleda, ona cetanre acʼakʼ rimile pasnaoeda.

¹⁰ Marsal ar ńut tala reakʼ simạnare uni do rimil ar doreão talare beṛhaete simạnae dohoakada

¹¹ Serma reakʼ khunṭiko do dal dalaokʼkana, ar uniyakʼ dhomkaote hõ thar tharaokʼkana.

¹² Uni do acʼakʼ daṛete jalapuriye ạulạ ạuli ocoyeda; acʼakʼ budte uni do Rahabe chaka chunekana.

¹³ Uniyakʼ sahẽtʼte sermako do nirola saphakʼ kana; uniyakʼ tikin do ńir paskaokʼkan bińe sobokʼ tabekana.

¹⁴ Noako do uniyakʼ daṛe reakʼ ańcar kana, ar abo do eken uni reaṅ khae khoege bon ańjometʼa; uniyakʼ daṛe huḍur do okoeye bujhạu daṛeketaea?”