Jobakʼ 24 - সান্তালী বাইবেল

¹ “Sanam daṛeanicʼ do bicạr lạgitʼ okteko cedakʼ bae niṭ akada? Okoe uniko baḍae akade onko do cedakʼ ona din bako ńelńameda?

² Hoṛko do simạna dhiriko ocokʼetʼkana; onko do pal bhiḍiko kombṛoyetʼkoa arko ạtińetʼkoa.

³ Onko do ṭũạr amarkoren gadhako laga idi joṅkana ar rạnḍi maejiuren ḍaṅgra do bandhokko dohoyetʼkoa.

⁴ Reṅgecʼ orecʼko do hor khonko laga ńiretʼkoa; onko iạte disạmren sanam reṅgecʼko doko okokokʼkana.

⁵ Reṅgecʼko do bir gadhako leka jomakʼko sendrakana; hahaṅkar ṭoṭhako do onkoren gidrạko lạgitʼ jomakʼko emokʼkana.

⁶ Bilạn ṭạnḍire senkate janwarkoakʼ jomakʼ do ako lạgitʼko jogaṛ joṅkana ar bedhoromkoakʼ bagwan khon ńurakan darkha joko halaṅetʼkana.

⁷ Kicricʼ begorte goṭa ńindạ koṭogeko giticʼ tahen kana; ar rabaṅ dinre hoṛmore oyokʼ lạgitʼ do cetʼge bạnukʼtakoa.

⁸ Onko do buru reakʼ jạṛi dakʼteko lohodokʼ kana ar asray begorte dhiri ṭhenko cokokʼ kana.

⁹ Bạṛicʼ hoṛ do eṅgatakʼ hobor khon ṭũạr gidrạko recʼetʼkoa ar rin iạte reṅgecʼ hoṛren hopon do bandhok menteko dohoyetʼkoa.

¹⁰ Kicricʼ begorte reṅgecʼ hoṛ do koṭogeko dãṛãnkana; onko do reṅgecʼtege anaj reakʼ binḍạko gemereda.

¹¹ Onko do bagwanrege jantete jạitun sunumko len oḍokeda; ar tetaṅetʼko tulucʼge darkha joko lelenkana.

¹² Nagrahakore manwakoakʼ geraṅ ańjomokʼkana, ar ghạl akan hoṛ do goṛo ńam lạgitʼko guhereda; menkhan Isor do onkoakʼ rakʼjoṅakʼ bae moneyakʼkantakoa.

¹³ “Ḍher hoṛge marsal upạrteko huleda; onko do marsal reaṅ bako baḍae orometʼkana ar ona reakʼ horkore hõ bako taṛametʼkana.

¹⁴ Khuniạhi do ńut tahenrege beretʼkate reṅgecʼ orecʼkoe gocʼetʼkoa, ar ńindạ jokhecʼ doe kombṛoyeda.

¹⁵ Laṭghaṭkoakʼ mẽtʼ do ńindạ lạgitʼ ńel hor akae tahen kana; uni do acʼakʼ mẽtʼãhã betʼ esetʼkateye hudiseda okoeyakʼ mẽtʼ hõ uni do bako ńelekana.

¹⁶ Ńutlen khange hoṛ do oṛakʼko bhugạkʼeda, ar sińre doko bolo baekokʼkana; menkhan marsal do bako baḍaekana.

¹⁷ Onko lạgitʼ setakʼ do kaṛaṅ kucạṅ ńut kana; ar kaṛaṅ ńut do onkoren gatege.

¹⁸ “Onko do dakʼ cetan reakʼ photo lekan kanako; onkoakʼ hạṭiń reakʼ jumi do sarapgetakoa, onate darkha bagwan secʼ do celege bako calakʼkana.

¹⁹ Setoṅ ar ṭan do him dakʼe ańjetʼeda, Sheol hõ onkage kại hoṛkoe utʼetʼkoa.

²⁰ Eṅgat kukhi do onkoe hiṛińetʼkoa, ar tejoko do onkoakʼ hoṛmoko jometʼtakoa; bạṛicʼ hoṛ do okoehõ bako disạ dohokoa, onko do dare lekako rạputʼ ńurokʼa.

²¹ Onko do bạńjhi maejiuko jom recʼetʼkoa ar rạnḍi maejiuko hõ bako dayawako kana.

²² Menkhan Isor do acʼakʼ daṛete onko daṛeankoe or pheḍkoa; onkoko kisạ̃ṛlenre hõ jiwi reakʼ khạṭitetʼ do bạnukʼtakoa.

²³ Uni do bedhoromko khạtirjomae jirạu ocokoa, menkhan uniyakʼ mẽtʼ do onkoakʼ hore ńel horetʼtakoa.

²⁴ Onko do thoṛa ghạṛicʼ lạgitʼko usulokʼ kana, ar ona tayom do bako ṭarhaokʼkana. Onko doko copotʼ ocokʼa, ar ghãs lekako tolmojokʼa, ar phosol reakʼ gele lekako copeyakʼa.

²⁵ Onka baṅ hoylen khan okoe ińakʼ katha do eṛe menteye sạbudkea? Ińakʼ katha je, sạriyakʼ baṅkan ona do okoeye lại daṛekea?”