Jobakʼ 23 - সান্তালী বাইবেল

Jobakʼ galmarao

¹ Unre Job do roṛ ruạṛketʼteye menkeda,

² “Teheń hõ ińakʼ hae haeyokʼ do hewer haṛhatʼgetińạ; ińiń kuhrạukʼ kanrehõ, enhõ Isorakʼ hamal ti do iń cetanre menakʼa.

³ Ekeniń baḍae khan okare uniye ńamokʼa, ar uniyakʼ tahen ṭhạ̃iteń sen daṛeakʼ khan,

⁴ enḍekhan uni ṭhen mamblań samaṅketińạ ar sukʼhiyakʼko hotete mocań perecʼketińạ.

⁵ Unre cetʼe roṛ ruạṛkińạ onań baḍae daṛekea, ar okae menke onań bujhạukea.

⁶ Uni do cetʼ maraṅ daṛete iń tulucʼe jhogṛakokʼa? Baṅa, uni do ińakʼe ańjomketińạ.

⁷ Unre mitʼṭen dhorom hoṛ do uni ṭhen mamblae samaṅkea; ar ińren bikʼcạricʼakʼ ti khon jaejug lạgitʼ iń do bańcaoiń ńamkea.

⁸ “Menkhan purub secʼ iń senlen khan uni do onḍe bạnugicʼan; ar pạchim secʼ iń senlenre hõ uni do bae sendra ńamokʼa.

⁹ Utạr secʼre tinreye kạmiya unre hõ uni do bae ńelokʼa; ar dạkhin secʼ iń ạcurlenre hõ uni do bạń ńel ńamea.

¹⁰ Menkhan iń oka horteń calakʼkan ona doe baḍaekana; are biḍạu aṭkarliń khan iń do khạṭi sona lekageń hoykokʼa.

¹¹ Iń do pạtiạr salakʼge uniń pańjayede kana; bạṛicʼ horte baṅ senkate uniyakʼ hortegeń taṛametʼkana.

¹² Uniyakʼ hukum khon do bạń ocokʼ akana; Ińakʼ jạruṛ jomakʼ khon hõ uniyakʼ moca kathage iń ṭhen do bạ̃ṛti damanakʼ tahẽkana.

¹³ Menkhan jotowakʼre uni do bin bodolicʼ kanae, okoege uni do bako tạkicʼ daram daṛekea; ar uni okae kusiyakʼ onageye kạmikana.

¹⁴ Uni do iń lạgitʼ okae ṭhik dohoakatʼ onageye kạmiyeda; onkan aema niṭakʼge uniyakʼ do ńit hõ menakʼtaegea.

¹⁵ Onate uni samaṅre iń do ạḍiń botorokʼa; noakoń hudisle khange uni doń botoraea.

¹⁶ Isor do ińakʼ mone latwakʼ akatʼtińạ; sanam daṛeanicʼ do ạḍiye botor ocoakadińạ.

¹⁷ Ńut do ińakʼ mẽtʼãhãe dapal esetʼakatʼtińre hõ enhõ ona do bae thir hape ocodaṛe akadińa, ar kaṛaṅ ńut hõ bae gherao daṛe akadińạ.