Jobakʼ 22 - সান্তালী বাইবেল

Eliphasakʼ tesar galmarao ( 22.1—27.23 )

¹ Unre Temani Eliphas do roṛ ruạṛketʼteye menkeda,

² “Manwa do cetʼ Isore bhạlại daṛekea? Ạkilanicʼ do cetʼ onae onka daṛekea?

³ Dhoromem tahẽlen khan sanam daṛeanicʼ do cetʼe kusikokʼa? Miridosem tahẽlen khan uniyakʼ do cetʼ jãhãn lab hoyokʼtaea?

⁴ Isorem botoraekante uni do cetʼe ruhetʼmea? Ona iạte cetʼ am upạrte uni do bicạr lạgitʼe calakʼkana?

⁵ Amakʼ dusṭạmige cetʼ baṅ ḍhergea? Amakʼ ghạṭ reakʼ simạnako hõ bạnukʼtama.

⁶ Ạuṛiyakʼte amren boehako ṭhen khon bondhokem hataoetʼkana; hoṛkoakʼ kicricʼ bhạnduṛkate onkom uluṅetʼko tahẽkana.

⁷ Lorao akanko do dakʼ bam ńu ocoyetʼko tahẽkana; ar reṅgecʼ hoṛ hõ jomakʼ bam emako kan tahẽkana.

⁸ Eken daṛean hoṛkoakʼge disom do hoyena, eken manotan hoṛge onḍeko girobasokʼkana;

⁹ enhõ rạnḍi maejiuko do eken tiyem bidạyetʼko tahẽkana ar ṭuạ̃r amarkoakʼ ạidạrikom recʼetʼko tahẽkana.

¹⁰ Ona iạte pạsi do am beṛhaetege oḍao menakʼa, ar ackage toras doe keklesetʼ ocomea,

¹¹ amakʼ marsal do ńut akana, ar onate bam ńeńelkana, banbạsi dakʼ do ame chạplạu esetʼ akatʼmea.

¹² “Isor do cetʼ coṭ sermare bae tahẽnkana? Ipilko ńelkom, tinạkʼ coṭre menakʼkoa!

¹³ Enhõm meneda, ‘Isor do cetʼ jãhãnakʼe baḍaea? Niạ ńutre Isor do cekateye bicạra?

¹⁴ Dạriạ rimil do uniye danaṅ esetʼ akadea, ona iạte uni do bae ńel ńamokʼkana; serma sạṛimre uni doe dãṛãnkana.’

¹⁵ Jor jukʼlumko oka horteko senokʼkan amhõ cetʼ ona mare hortegem taṛameda?

¹⁶ Onko do okte ạuriregeko idi ocoakana; onkoakʼ rehetʼ do gaḍa dakʼ leka ạtu calakʼkana.

^17-18 Uni do bhage bhage jiniskote onkoakʼ oṛakʼe perecʼletʼ takoa ar enhõ onko do Isorko metade tahẽkana, ‘am do pharakokʼme. Sanam daṛeanicʼ do cetʼe ceka daṛeabona? Menkhan bedhoromkoakʼ sopolha khon iń do sạṅgińreń tahenkana.

¹⁹ Onkoakʼ jarkharokʼ ńelte dhorom hoṛ doko rạskạkʼkana mirisdosko do cigạriwakote onkoko metakokana,

²⁰ ‘aleren bạiri do sạrigeko marao akana, onkoakʼ dhon durib do seṅgelte ḍahao marao akantakoa.’

²¹ Am do Isorakʼ kathare rạjikʼme, uni upạrte bạiri mon do alom dohoytama; enḍekhan amakʼ bhạlại hoyokʼtama.

²² Uniyakʼ moca khon sopolha ataṅme, ar uniyakʼ katha amakʼ monre dohoyme.

²³ Sanam daṛeanicʼ ṭhenem ruạṛ hecʼlen khan, tobe do lahate lekam pheraokʼa. Amakʼ tạmbu khon bạṛicʼakʼkom sạṅgiń giḍile khan,

²⁴ amakʼ sonako dhuṛireyem giḍikakʼ khan, ar ophir sona do soḍokʼ reakʼ dhiriko talarem capatʼ giḍikakʼ khan,

²⁵ enḍekhan amren sona do sanam daṛeanicʼgeye hoyokʼa, ar unige joto khon bhageakʼ rupại hoyokʼtama.

²⁶ Unre sanam daṛeanicʼ iạte sạrigem rạskạkʼa ar amakʼ mẽtʼãhã do Isor secʼem rakabtama.

²⁷ Uni ṭhenem aroja ar uni do onae ańjomtama, ar amakʼ sanam manotteakʼ em purạutama.

²⁸ Okaṭakʼem goṭae onaregem jo bahakʼa, ar amakʼ hor do marsalokʼtama.

²⁹ Tinre am dom tumbutʼ ocokʼa unrem mena, ‘ińakʼ bạḍại iạtege noa do hoyakana’ amakʼ mạ̃hir iạtege Isor do ame bańcaomea.

³⁰ Ona chaḍa uni do eṭakʼ dusi hoṛko hõe bańcaokoa; ar amakʼ ti saphage iạte onko do bańcaoko ńama.”