Jobakʼ 21 - সান্তালী বাইবেল

Jobakʼ roṛ ruạṛ

¹ Unre Job do roṛ ruạṛketʼteye menkeda,

² “Ińakʼ katha luturakʼtińpe; onage ape emakʼ jiwi raṛecʼ hoyokʼtińma.

³ Iń kathań roṛ jokhecʼ do sahaoetińpe; ariń roṛ sạtlere baṛe cigạriwạńpe.

⁴ “Iń do cetʼ manwa upạrteń roroṛkana? Cedakʼ iń do bạń ạṛisokʼa?

⁵ Iń beṅgetʼạńpe ar tharbasaokʼpe; ar tite apeakʼ moca bedtape.

⁶ Niạko kathań hudisle khan botor rakapʼạń kana; ar hoṛmo do thar tharaokʼ kantińạ.

⁷ Bedhoromko do cedakʼ jiwetʼko tahenkana ar cedakʼko haṛamokʼkana? Cedakʼ onko do ḍher dinko bahaokʼkana?

⁸ Onko beṛhaete do onkoren hoponko tahenkana, ar onko mẽtʼãhã samaṅre do onkoren goṛom gidrạkoge.

⁹ Onkoakʼ oṛakʼ-duạr do nicind ar bin botor tahenkana; Isorakʼ sạjại onkore do baṅ paṛaokʼ kana.

¹⁰ Onkoren sanḍ ḍaṅgra doko akʼbadokʼkana ar bako berthakʼ kana; onkoren gại doko busạgokʼkana ar bako giḍikʼkana.

¹¹ Onkoren kạṭicʼko do bhiḍi merom lekako ńir baṛaekana; ar gidrạko do bhiḍi hopon lekako don baṛajoṅkana.

¹² Onko do tabla ar binạ banamateko sereńeda; ar tiriạ reakʼ saḍeteko rạskạ joṅkana.

¹³ Onko do suk nirạite dinko khemaoeda ar sulukte Sheolteko calakʼkana.

¹⁴ Enhõ onko do Isorko metaekana, ‘ale khon pharakokʼme; amakʼ horko baḍae do baṅ sanayetʼlea.

¹⁵ Uni sanam daṛeanicʼ doe celekante, unile sewawaea? Uni ṭhenle koe lekhan ale do cetʼ lab hoyokʼtaea?

¹⁶ Menkhan onkoakʼ kisạ̃ṛokʼ do akoakʼ tire bạnukʼa, onate iń do bedhoromkoakʼ solha khon sạṅgińreń tahenkana.

¹⁷ “Bedhoromkoakʼ diuhe do cetʼ ĩṛĩjokʼtakoa? Tinạkʼ dhao baṅ onkore muhin do paṛaokʼkan? Tinạkʼ dhao baṅ Isorakʼ edre do onkore paṛaokʼkan?

¹⁸ Tinạkʼ dhao baṅ hoe samaṅre busupʼ lekako hoyokʼkan birbao hoete oṭaṅokʼkan bhusạ leka hõko hoyokʼkan?

¹⁹ Hoṛko mena, ‘Isor do mitʼṭen hoṛakʼ sạjại uniren hoponko lạgitʼe bae dohokakʼ kana.’ Menkhan Isor do uni hoṛge sạjạiye emaema jemon uni do acʼakʼ dose bujhạu daṛeakʼ.

²⁰ Uni do acʼakʼ mẽtʼte acʼakʼ maraokʼe ńelma; uni do sanam daṛeanicʼakʼ edre baṛeye ńũima.

²¹ Uniyakʼ bahaokʼ dinko tinre cabakʼa unre cetʼ oneye bạgi akatʼ acʼakʼ gharońj lạgitʼe hudisokʼa?

²² “Jãhãege cetʼ Isor do ạkile em daṛekea? Uni ma coṅ serma goḍetko hõe bicạretʼko.

²³ Mitʼ hoṛ do acʼakʼ puruntetʼreye gujukʼkana, purạ puri nirdạndi ar tholge;

²⁴ Uniyakʼ hoṛmo do itilte perecʼgea ar jaṅ reakʼ tumultae do rosanakʼgea.

²⁵ Arhõ eṭakʼ hoṛ do tishõ bhageakʼ bae jomeda uni do haṛhatʼ jiwitegeye gujukʼkana.

²⁶ Unkin bana hoṛge mitʼleka otrekin giticʼkana; ar tejo doko chạplạu esetʼetʼkinạ.

²⁷ “Apeakʼ hudisko do mońjtegeń baḍaea; iń upạrte apeakʼ bạṛicʼ hudisko hõń baḍaegea.

²⁸ Apepe meneda, ‘okayena uni kisạ̃ṛ hoṛakʼ oṛakʼ do? Okor okaeyena uni bedhorom hoṛakʼ tạmbu do?’

²⁹ Horte parom senokʼko do cetʼ noa reaṅ bape kuli akatʼkoa? Ape do cetʼ onkoakʼ katha reakʼ jãhãn damge bape emakʼa,

³⁰ Bedhorom hoṛ do muhinre bańcaoko ńama ar edrekʼ dinre hõ rukhiyạko ńama?

³¹ Uniyakʼ sobhab reakʼ katha do okoeye lạiyaea? Uni okae ceka akatʼ ona reakʼ kuṛại do okoeye emaea?

^32-33 Tinre uni do topareye idi ocokʼa unre sanam hoṛ do uni tayomteko calakʼa, ar gadel hoṛko do uni laha lahateko calakʼa. Uniyakʼ topa do horhokʼtaea; buru lodam reakʼ ot hõ kosṭo bako emaea.

³⁴ Onate apeakʼ noa ạuṛiyakʼ kathakote cetʼ lekate jiwipe raṛejtińa? Apeakʼ roṛ ruạṛ do eṛeteakʼ chaḍa ar cetʼge baṅkana.”