Jobakʼ 20 - সান্তালী বাইবেল

Sopharakʼ dosar galmarao

¹ Unre Namathi Sophar do roṛ ruạṛketʼteye menkeda,

² “Ińakʼ hudisakʼko ińe roṛ ruạṛạń kana, ente roṛ ruạṛ lạgitʼ iń canḍokʼ kana.

³ Nonkan nisṛạuakʼko ańjomkate henosta edeń lekań bujhạueda; onate ińakʼ buj do roṛ ruạṛ lạgitʼe joreń kana.

⁴ Am do khạṭige sedae khonem baḍaekana, dhạrtire manwae doho ocoyen tayom khon,

⁵ dusṭạmikoakʼ hulạs joṅ do thoṛa ghạṛi lạgitʼ kana. Ar bedhoromkoakʼ rạskạ do eken mitʼ ripitʼ lạgitʼ kana;

⁶ Uniyakʼ usultetʼ do serma hạbicʼ seṭerlenre hõ ar uniyakʼ bohokʼ do rimil hạbicʼ usullenre hõ,

⁷ enhõ uni do acʼakʼ mạilạ lekageye marao utạrokʼa. Okoe uniko ńelakade onko doko mena, ‘okare menaea uni do?’

⁸ Kukmũ lekage uni doe oṭaṅokʼa, ar bae ńamokʼa; uni do ńindạ reakʼ chol lekageye laga ńir ocokʼa.

⁹ Okoe uniko ńelekan tahẽkan onko do ar bako ńelea; uniyakʼ tahen ṭhạ̃i hõ ar bako ńela.

¹⁰ Uniren hoponko do nandanko ṭhenko koe baṛaya; onkoakʼ ti do uniyakʼ rinko em ruạṛkataea.

¹¹ Juạn reakʼ daṛete uniyakʼ jaṅko do perecʼgetaea uni sãote dhuṛire giticʼ akane tahena.

¹² “Bạṛicʼakʼ uniyakʼ mocare heṛemge ạikạulenre hõ ar alaṅ latarre onae oko dohokakʼre hõ,

¹³ mãyãwakʼte ona bae giḍiyre hõ ar mocare onae kopetʼkakʼre hõ,

¹⁴ enhõ ona jomakʼ do lacʼte bolokate jojokʼa; ar onare biń bis lekage hoyokʼa.

¹⁵ Ar okaṭakʼ dhon duribkoe utʼletʼ ona doe becʼ giḍikakʼa; Isor do uniyakʼ lacʼ khon onae oḍok giḍiya.

¹⁶ Uni do kạrinạṅgiń bińakʼ bise copoja; ar biń do acʼakʼ biste uniye gojea.

¹⁷ Uni do dahe ar dumur rasa ạtukʼ gaḍako ar bae ńelńama.

¹⁸ Oka lạgitʼ uniye khaṭao akan ona ạuriye jomrege ona do ruạṛkakʼ hoyokʼtaea; bạnij reakʼ labtetʼ hõ uni do bae jom ńama;

¹⁹ ente uni do nandankoe santaoletʼkoa are bạgiyatʼko tahẽkana, ar okaṭakʼ oṛakʼ-duạr acʼte bae benao akatʼ onae recʼ akawana.

²⁰ “Uni do jao oktegeye hạ̃sakʼ kana, ona iạte cetʼge bae rukhiyạ doho daṛeakʼ kana.

²¹ Jom leka do cetʼge sarecʼ baṅ tahentaea; uniyakʼ kisạ̃ṛtetʼ do ar baṅ ṭambhaokʼtaea.

²² Ḍher tahentae okterehõ uni do kosṭoreye paṛaokʼa; duk do daṛe salakʼ uni cetanre hijukʼa.

²³ Uniyakʼ lacʼ bicʼ jokhecʼge Isor do acʼakʼ jolokʼkan edre uni cetanreye dula, ar jạ̃ṛĩ dakʼ lekageye dulaea.

²⁴ Uni do mẽṛhẽtʼ reakʼ khanḍa bhanḍako khone dạṛlere hõ, pitạl reakʼ ạ̃pạ̃ṛi do uniye tuń tabeya.

²⁵ Ona jhalkaokʼkan ạ̃pạ̃ṛi reakʼ kạni do uniyakʼ haṛhatʼ sisir khon oḍokokʼa, ar acʼakʼ hoṛmo khon ona doe or oḍoka. Ar ạḍi lekan botor unire hijukʼa.

²⁶ Uniyakʼ dhon lạgitʼ ńut doe ńel horetʼkana. Oka seṅgel manwa bako lagao akatʼ ona seṅgel do uniye ḍahao maraoea, ar uniyakʼ tạmburen sarecʼ sanamkoe utʼgotʼkakoa.

²⁷ Serma do uniyakʼ behokakʼe sodortaea; ar dhạrti do uni upạrteye teṅgokʼa.

²⁸ Banbạsi do uniyakʼ oṛakʼ reakʼ jotowakʼe ạtu iditaea, Isorakʼ edre hilokʼ ona do purạteye buhel iditaea.

²⁹ Isor do bedhoromko lạgitʼ onkan bakhrae ṭhik dohoakada; ar ona kangea onko lạgitʼ Isor emakʼ ạidạri do.”