Jobakʼ 2 - সান্তালী বাইবেল

Jobakʼ dosar biḍạu

¹ Mitʼdin serma goḍetko do Probhu Isor samaṅreko hạjirena, ar Soetan hõ uni samaṅre hạjirokʼ lạgitʼ serma goḍetkoe ạguketʼkoa.

² Probhu Isor do Soetane kulikedea, “Am do oka khonem hecʼena?” Soetan do Probhu Isore roṛ ruạṛadea, “Dhạrtire hante nateń dãṛãbaṛakeda ariń hecʼena.”

³ Unre Probhu Isor do Soetane metadea, “Ińren guti Job secʼem kheyal akada? Dhạrtire uni lekan ar celege bạnukʼkoa. Uni do bin dusạn are dhoromgea. Uni do ińe botorạń kana ar bạṛicʼakʼ khon sạṅgińreye tahenkana. Ar ńit hạbicʼ uni do jãhãnakʼ bae dos akatʼre hõ ạuṛiyakʼte uniyakʼ bạṛicʼ lạgitʼem uskurediń kana.”

⁴ Soetane menkeda, uniyakʼ jionge uni ṭhen do jiwi kana; manwa do jiwi bańcaotae lạgitʼ oka menakʼtae ona jotowakʼgeye emokʼa.

⁵ Ti tiyạrtam ar hạneme, khạṭige uni do am upạrte henosta reakʼ kathae roṛa.”

⁶ Unre Probhu Isor do Soetane metadea, “Bhagegea; uni do amakʼ tireń jimạkedea, menkhan uni do alom gojea.”

⁷ Inạ tayom Soetan do Probhu Isor samaṅ khone oḍok calaoena ar Jobakʼ bohokʼ khon jaṅga talka hạbicʼ hasote perecʼ ghaoe kolladete kosṭo emaye ehopʼena.

⁸ Unre Job do torocʼre duṛupʼkate mitʼṭecʼ kelhatʼ hataokate gạdurokʼe ehopʼena.

⁹ Unre uniren bạhu doe menkeda, “Am do cetʼ ńitokʼ hõ bin dusigeam mentem dạbiyetʼkana? Isor dusiyete gujukʼme baṛe.”

¹⁰ Menkhan Job do uniye metadea, “Am do mitʼṭen dundhi maejiu leka katham roṛeda. Abo do cetʼ Isor ṭhen khon eken bhạlạige bon ataṅa, ar be bhạlạiyakʼ do baṅa?” Niạko hoyenre hõ Job do acʼakʼ kathate bae kạileda.

Jobren pea gate

¹¹ Temani Eliphas, Suhi Bildad, Namathi Sophar ńutuman Jobren pea gate tinre Jobakʼ muhin reakʼ kathako ańjomkeda unre onko do akoakʼ oṛakʼ khonko mohnḍayena. Ar jarwakateko sopolhawana, onko do senkate uni sãoteko dukokʼa ar jiwi raṛecʼko emaea.

¹² Onko do sạṅgiń khon bako orom daṛeadea. Onate onko do ãṭ aṛaṅte rarakʼko ehopʼena ar apnarakʼ kicricʼko oṛecʼketʼte bohokʼ cetante dhuṛiko uḍiyạukeda.

¹³ Ar ona tayom do eae siń ar eae ńindạ uni sãote otreko duṛupʼ tahẽyena. Ar uni do cetʼhõ bako metadea, ente uniyakʼ harkhet do ạḍitetʼ maraṅge tahẽkana.