Jobakʼ 19 - সান্তালী বাইবেল

Jobakʼ roṛ ruạṛ

¹ Unre Job do roṛ ruạṛketʼteye menkeda,

² “Ape do ar tin ghạṛicʼ monre kosṭope imạńa ar kathatepe holoṅ lopoṅ utạrińạ?

³ Ape do ḍher dhaope opoman akadińạ; bin lajaokʼko leka iń sãotepe beohar akada.

⁴ Bạṛicʼ secʼ sạrigeń ghańjeṛ akan khan, ona reakʼ kuṛại do eken ińakʼ kangea.

⁵ Iń upạrte sạrige apnar usulokʼpe menetʼ khan, ar ińakʼ nicạṛ dosa iạte ińre dospe sạbudetʼ khan,

⁶ enḍekhan baḍaepe, Isorge iń cetanreye behokeda; ar acʼakʼ jhạlire unigeye esetʼ ạcur akadińạ.

⁷ “Ińre behokakʼ hoyakana menteń kikiạulere hõ jãhãn roṛ ruạṛge bạń ńameda; ariń rakʼlere hõ jãhãn bicạr do bạń ńameda.

⁸ Ińakʼ hore eṭetʼ esetʼ akatʼtińte bạń parom daṛeakʼ kana; uni do ińakʼ sanam horko ńutteye dapal akatʼtińạ.

⁹ Uni do ińakʼ ṭhonoke ocokʼ akada, bohokʼ khon man ṭupriye ocokʼ akatʼtińạ.

¹⁰ Uni do sanam secʼteye ghạl akadińạ ar iń ạuriń caba utạrokʼ hạbicʼ; uni do dare leka ińakʼ ase or totʼ giḍi akatʼtińạ.

¹¹ Iń upạrte uniyakʼ edre do jolokʼkana; acʼren mitʼṭecʼ bạiri menteye hudis edeńkana.

¹² Uniren bạiri khatarenko do iń upạrteko laha hijukʼ kana; ińre jhãp em lạgitʼ onko do pinḍhạko rakapʼ akada. Ar ińakʼ tạmbu beṛhaeteko esetʼ ạcur akadińạ.

¹³ “Uni do iń ṭhen khon ińren boehakoe begar akatʼkoa; ińren oprom hoṛ do bin oprom hoṛ lekako beoharetʼ kana.

¹⁴ Ińren peṛa pạrbhạ doko calao akana; ińren gateko do ińko hiṛiń akadińạ.

¹⁵ Ińren peṛa ar kạ̃ṛmĩko do iń bako orom akadińạ; onko do bidisiạ hoṛ lekako ńeleńkana.

¹⁶ Ińren gutiń hohoaere uni do bae goṅeń kana, ińiń nehõraekanre hõ bae roṛ ruạṛạń kana.

¹⁷ Ińren bạhu do ińakʼ sahẽtʼe hirkhạwakʼ kana; ińren boehako hõ bạṛicʼko hudis edeńkana.

¹⁸ Huḍiń gidrạko hõ ińko hirkhạwạń kana; ińiń beretʼlen khan onko do iń upạrteko roṛetʼkana.

¹⁹ Ińren sanam gateko do ińko hirkhạwạń kana; ar ińiń dulạṛetʼko tahẽkan hoṛ hõ iń upạrteko teṅgonkana.

²⁰ Ińakʼ jelre harta ar jaṅ do jalatʼ caba akana, ar iń do eken jiwetʼ hataṛge minạńa.

²¹ E ińren gateko, ińakʼ dukren sãotenko hoyokʼpe, ente Isorakʼ ti doe ghạl akadińạ.

²² Isor leka ape hõ cedakʼpe khudạu edeńkana? Ape do cetʼ kosṭo imạńtegepe tahena?

²³ “Hae, ińakʼ sanam kathako do ollen khan! Ar puthi reakʼ sakamre onako do ol caṛhaolen khan!

²⁴ Dhiri reakʼ paṭare mẽṛhẽtʼ ar sisạte jaejug lạgitʼ ona do rokʼ doholen khan!

²⁵ Ińiń baḍaea ińren babańcaoicʼ doe jiwetʼgea; sesre uni do dhạrtire hecʼkateye teṅgona.

²⁶ Ińakʼ hartako marao caba utạrlen tińrehõ iń do jiwetʼ tahenrege Isoriń ńelea.

²⁷ Iń apnarge uniń ńelea; eṭakʼko do baṅa, menkhan iń nij mẽtʼte uniń ńelea. Ińakʼ ontor do iń bhitrire latwagokʼkana.

²⁸ Apepe menetʼkana, ‘kosṭo reakʼ jạṛko unire menakʼte ale hõ kosṭole emaekana,’

²⁹ enḍekhan tarwaṛe reakʼ botor do abore tahen lek kana, ente Isorakʼ edre do tarwaṛe hotetege sạjạiye ạguiya; ar nonkatepe baḍae daṛeakʼa, bicạr do menakʼgea.”