Jobakʼ 18 - সান্তালী বাইবেল

Bildadakʼ dosar galmarao

¹ Unre Suhi Bildad do roṛ ruạṛkateye menkeda,

² “Amakʼ katha do tinre mucạdokʼtama? Ṭhik leka hudisme, enḍekhan ale do kathale roṛ daṛeakʼa.

³ Cetʼ iạte janwarko leka dom hudisetʼlea? Cedakʼ amakʼ mẽtʼre bebujko lekale hoyakana?

⁴ Am do raṅgaote jiwim cirạyetʼtama; am iạte cetʼ dhạrti do ujạṛokʼa? Se huṭupʼ dhiri do acʼakʼ ṭhạ̃i khon ucạṛokʼa?

⁵ “Bedhoromicʼakʼ diuhe do ĩṛĩjokʼtaea; Uniyakʼ seṅgel lepʼ do baṅ jolokʼa.

⁶ Uniyakʼ tạmbu reakʼ marsal do ńutokʼtaea; uni ṭhen dohoakatʼ diuhe hõ ĩṛĩjokʼa.

⁷ Uniyakʼ calakʼ reakʼ daṛe do nijorokʼtaea; ar acʼ emakʼ sopolhageye tawakʼ bhindạṛea.

⁸ Uniyakʼ jaṅgage jhạli secʼe chaṭa idiyea; ar onage khạ̃ṛireye adereya.

⁹ Uniyakʼ jaṅga iḍi do jhạlire paṛaokʼtaea, ar jhạli doe sapʼ kaṛyo maṭoyea.

¹⁰ Uni lạgitʼ otre pạsi do oḍao oko akan tahena; ar uniyakʼ horrege oḍao akan tahena.

¹¹ Botor do uni beṛhaete tahena; ar taṛam pichạge ona doe khudạu baṛayea.

¹² Muhin do uni lạgitʼe cahapʼ akatʼa; ar ghoṭna do tãṛãkʼ gure lạgitʼ sapṛaogea.

¹³ Ona do uniyakʼ hoṛmo hartae jomtaea; gujukʼren pạhilicʼ hoponge uniyakʼ hoṛmoe tạhuṛtaea.

¹⁴ Uniye bhorsakʼkan tạmbu khon do or totʼkateye giḍi ocokʼa; ar torasren rapaj ṭhene idi ocokʼa.

¹⁵ Uniyakʼ tạmbure apnarakʼ mente cetʼge baṅ tahentaea; uniyakʼ tahen ṭhạ̃ire jolokʼkan gondhok do chiṭiạukʼa.

¹⁶ Latarre uniyakʼ rehetʼko do rohoṛokʼkana ar cetanre uniyakʼ ḍạrko do gujukʼkana.

¹⁷ Dhạrti khon uniyakʼ dikʼsạko do meṭaokʼtaea; kulhikore uniyakʼ ńutum do baṅ roṛogokʼa.

¹⁸ Uni do marsal khon ńutteye pharak ocokʼa; ar dhạrti khon doe laga ńir ocokʼa.

¹⁹ Uniren hoponko do apnar jạtrenko talare bako tahena; uni okareye tahẽkan onḍe do celehõ bako tahena.

²⁰ Pạchim disạmren hoṛ do uniyakʼ dosa ńelteko hahaṛakʼa, ar purub disạmren hoṛ do bebạṛicʼko botorokʼa.

²¹ Bạṛicʼ hoṛkoakʼ tahen ṭhạ̃i do sạrige mitʼ lekan getakoa; ar okoe Isor bae baḍae akade uniyakʼ dosa hõ nonkage hoyokʼa.”