Jobakʼ 17 - সান্তালী বাইবেল

¹ “Ińakʼ mon do rạputʼ akantińạ, ar bahaokʼ dinko hõ mucạtʼ hijukʼkana, ar kobor hõ iń lạgitʼe ńel horetʼkana.

² Cikʼgạriko do sạrige iń beṛhaete menakʼkoa; onkoakʼ siṛog doń ńel ńameda.

³ “E Isor, okaṭakʼ jạminem khojkan ona do amge teṅgonme; iń ńutumte do okoeye jạminkokʼa?

⁴ Onkoakʼ mon do buj khonem danaṅ akatʼtakoa, onate onko do bam jitạu ocokoa.

⁵ Lab reakʼ aste jãhãe acʼren gatekoe dusileko khan uniren hoponko do duk jojom hoyokʼtakoa.

⁶ “Isor do hoṛkoakʼ kạhtukgeye hoyoco akadińa, mẽtʼãhãre sanam hoṛko thoyạńkan lekage.

⁷ Ińakʼ mẽtʼ do dukte ạndhuạ akantińạ; ar goṭa hoṛmo do umul leka hoyakana.

⁸ Noate dhorom hoṛ do ạḍiko hahaṛakʼa, ar miridosicʼ do bedhoromicʼ upạrteye salgaokʼa.

⁹ Menkhan dhorom hoṛ do akoakʼ horteko laha idikʼa, ar okoeyakʼ ti saphage onko do dinke dinko daṛe idikʼa.

¹⁰ “Bhagegea, ape do hecʼkate arhõ kurumuṭuipe. Ape talare akelanicʼ do okoehõ bạń ńelekana.

¹¹ Ińakʼ bahaokʼ din do caba hijukʼkantińạ, ińakʼ sanam goṭawakʼ do ạuṛiyakʼena, ińakʼ mon reakʼ sana hõ cewecʼentińạ.

¹² Noko hoṛ do siń doko ńindạ ocoyeda, ar ńutre doko meneda, ‘marsal hijukʼkana.’

¹³ Ińakʼ oṛakʼ do Sheolgeń asokʼkan khan, ar ńutre ińakʼ giticʼakʼ iń aṭetʼletiń khan,

¹⁴ ar Sheoliń metae, ‘am dom iń baba kana,’ ar tejo baṛeń metako, ‘ińren eṅgạń’ se ‘ińren miserako kanape,’

¹⁵ enḍekhan ińakʼ as do okare? Ar ińakʼ as reakʼ perecʼtetʼ do okoeye ńel tiyoga?

¹⁶ Ona as do Sheol reakʼ duạr hạbicʼ baṅ pheḍokʼa; ar iń sãote ona do dhuṛire baṅ mesaokʼa.”