Jobakʼ 16 - সান্তালী বাইবেল

Jobakʼ roṛ ruạṛ

¹ Unre Job do roṛ ruạṛketʼteye menkeda,

² “Nonkan katha do ḍhergeń ańjom akada; ạḍi bạpuṛicʼ jiwi rakʼṛecʼko kangeape ape do!

³ Apeakʼ katha do hoe idiyetʼkan leka ona do cetʼ tishõ baṅ mucạdokʼtapea? Ar do cetʼ hoyakantapea, onatepe reṭepeṭekʼkana?

⁴ Ape hõ iń leka hoylentape khan enḍekhan iń hõ ape lekań galmarao daṛekea, ape upạrte ạḍi utạr kathakoń roṛkea ar ape ńelte bohokʼ iń rukukea.

⁵ Menkhan bạń onkakea, bickom mocateń udgạukepea; ińakʼ luṭikin reakʼ jiwi raṛecʼ katha do hasoe raṛecʼketapea.

⁶ “Katha roṛlere hõ ińakʼ haso do baṅ komaokʼtińạ; ar thir akaniń tahẽlenre hõ baṅ cabakʼtińạ.

⁷ E Isor, am do ińem laṅga ocoakadińạ; ińakʼ goṭa gharońjgem marao akatʼtińạ.

⁸ Ińakʼ hoṛmo dom osokʼ akatʼtińạ, onage iń upạrte goha hoyakana; ińak osokʼ akan dosage iń upạrte gohae emetʼkana.

⁹ Isor do ạḍitetʼe ghạl akadińạ edrete iń doe cirạ akadińạ; iń ńelteye togocʼ ḍaṭayetʼ kana; ar iń upạrte mẽtʼ jolokʼkantaea.

¹⁰ Iń landa-dhutʼạń lạgitʼ hoṛ do mocako cahapʼ akatʼtakoa; siṛogate johareko thapa edeńkana ar iń upạrte mitʼ sãoteko jarwakʼ kana.

¹¹ Isor do bedhorom hoṛko ṭhene soprot akadińạ; bạṛicʼ hoṛkoakʼ tireye capatʼ khadle akadińạ.

¹² Sulukteń tahẽkana menkhan uni doe chaka chun akadińạ; hoṭokʼre sapʼkate uni doe tawakʼ gejerkedińa. Uni do bejha leka tuń joseń lạgitʼe dohoakadińạ.

¹³ Uniren dhinkiạko do ińko esetʼ ạcur akadińạ; kurmutạha leka ińakʼ kunḍikoe paṛakʼ akatʼtińạ ar ińakʼ haṛhatʼ sisir do otreye giḍikatʼtińạ.

¹⁴ Bar bar ińakʼ rurukhiyạ bhit doe rạputʼetʼtińạ, birbão hoṛ leka uni do iń secʼe ńir hijukʼkana.

¹⁵ Ińakʼ harta cetanre gõṛẽ kicricʼ iń horokʼakada; ar ińakʼ bạḍại do dhuṛireń laplonḍe akatʼtińạ.

¹⁶ Rakʼ rakʼte ińakʼ mẽtʼãhã do aral koral caba akana, ińakʼ mẽtʼ pipnikinre do moron dhundge menakʼa;

¹⁷ Enhõ iń do celege bạń jor julum akatʼkoa ińakʼ koejoṅ do saphagetińa.

¹⁸ “E ot, ińakʼ mãyãm do alom loṭomtińạ; ińakʼ rakʼ do jaoge ańjomokʼtińma.

¹⁹ Ńitokʼ hõ ińren goha do sermare menaea; iń secʼ okoe kathae roṛ uni do coṭre menaea.

²⁰ Okoe iń secʼ menae uni do ińren gate kanae, ar Isor ṭhen iń do mẽtʼ dakʼ iń joroyetʼtińạ.

²¹ Manawa cetʼleka gate secʼ kathae roṛ onkage eken mitʼ hoṛ iń ńutumte Isor ṭhen kathae roṛ daṛeakʼ khan!

²² Ente iń do ar thoṛa bochor khange ona horteń senokʼa, ar ona khon do bạń ruạṛa.