Jobakʼ 15 - সান্তালী বাইবেল

Eliphasakʼ dosar katha ( 15.1—21.34 )

¹ Unre Temaniren Eliphas doe roṛ ruạṛkeda,

² “Jãhãe ạkilan hoṛ do cetʼ nonka ạuṛiyakʼ kathae roṛa se purub reakʼ lolo hoe jomkate lacʼe bi ocoytaea?

³ Uni do cetʼ okaj kathateye reṭepeṭekʼa, se bin damanakʼ kathakoe roṛa?

⁴ Menkhan am do Isor bam botorae kana ar Isor ṭhen koejoṅ hõm akoṭ akatʼtama.

⁵ Amakʼ kại iạtege nonkan kathakom roṛeda ar sean hoṛ leka buligem bachao joṅkana.

⁶ Iń do baṅ, amakʼ mocage am doe dusiyetʼmea; amakʼ luṭikinge am upạrtekin gohayetʼkana.

⁷ “Manwako modre amge cetʼ pạhilrem janam akana? Buruko ạuri sirjạukʼre cetʼ amgem janamlena?

⁸ Isorakʼ goṭawakʼ reakʼ katha do cetʼem ańjomakada? Am eskarge cetʼ sanam ạkil dom hameṭ akawana?

⁹ Nonkan jãhãnakʼem baḍaea oka do ale bale baḍaekan, ar nonkan jãhãnakʼem bujhạueda oka do bale bujhạu daṛeakʼkan?

¹⁰ Ale talare nonkan mitʼ hoṛ menaea okoe do haṛam are pạnḍuge; uniyakʼ umer do am babawakʼ umer khon hõ bạ̃ṛtigetaea.

¹¹ Isor emakʼ jiwi raṛecʼge cetʼ am lạgitʼ do baṅ ḍhera? Am do ona kathage mạ̃hir salakʼem men ocokʼkana.

¹² Amakʼ mon do cedakʼ sạṅgińteye idiyetʼmea? Ar raṅgaote amakʼ mẽtʼ do cedakʼ jolokʼkantama?

¹³ Nonkate am do Isor upạrtem raṅgaokʼkana onako katha do amakʼ moca khonem oḍoketʼa.

¹⁴ Manwa doe celekante, uni do saphae hoedaṛekokʼa? Maejiuakʼ kukhi khon janamicʼ doe celekante, dhorome hoedaṛekokʼa?

¹⁵ Isor do acʼren goḍetko cetanre bae bhorsa daṛeakʼkan khan, ar uniyakʼ mẽtʼre serma hõ miridos baṅkan khan,

¹⁶ enḍekhan manwa, okoe do bạṛicʼ are kharapge ar ghạṭko dakʼ lekae ńũiyetʼ, uni do khạṭi bae hoedaṛeakʼa.

¹⁷ “Ińakʼ katha ańjomme, amiń bujhạuam kana; iń okań ńelakatʼ onageń lạiyam kana.

¹⁸ Ạkilan hoṛko do akoren hapṛamko ṭhen khonko ńamleda ar ona do jotogeko sodorleda.

¹⁹ Eken onkoakʼ tirege disạm do em hoylena, jãhãe bidisiạge onko talare bako hecʼ boloakan tahẽkana.

²⁰ Bedhorom hoṛ do jiwetʼ bhor dukko joma; ar kurmutạha hõ tinạkʼ din jiwetʼe tahen unạkʼ din duke joma.

²¹ Uniyakʼ luturre do torasge bajaokʼkana; ar jotowakʼge mońjge calakʼkana mente tireye hudisa unre luluṭko do uni cetanre jhãpko ema.

²² Uniyakʼ jãhãn asge bạnukʼtaea, ńut khone dạṛ pạnḍuja mente; uni lạgitʼ do botoranakʼ gujukʼge ṭhik dohoakana.

²³ Uni do jomakʼ sendare lạgitʼe ạcur baṛaea are kulijoṅa ona do okare menakʼa mente. Uni doe baḍaekana, ńut reakʼ din do sor akantaea.

²⁴ Gạr ar harkhet dokin botor ocoyedea ar daṛeanicʼ rapaj leka unire jhãp em lạgitʼkin sapṛao akana,

²⁵ ente uni do Isor upạrte tiye tuletʼtaea ar sanam daṛeanicʼ upạrteye dhomkaoeda.

²⁶ Dạriạ ar daṛeanakʼ ḍhalte hoṭokʼ keṭecʼkate Isor upạrte uni doe laha idikʼkana.

²⁷ “Uniyakʼ mẽtʼãhã do itilteye dapal akatʼtaea ar ḍanḍa do dophãṛ dophãṛ itilteye paṭhe akana.

²⁸ Uni do dhaṅdhaser nagrahareye girobasokʼ kana; okaṭakʼ oṛakʼre celege bako tahenkan, ar oka oṛakʼ do dhaṅ dhaserokʼ lạgitʼ sapṛao akan, onḍege uni doe girobasokʼ kana.

²⁹ Uni do kisạ̃ṛ ar bae tahena, uniyakʼ dhon-sompotti do baṅ ṭikạukʼtaea, hajar hajar janwar hõ bako tahentaea.

³⁰ Uni do ńut khon bae paskao oḍok daṛeakʼa; uni do nonkan dareko lekae hoyokʼa one ona reakʼ ḍạrko seṅgelte jhạ̃usạkʼ kan; Isorakʼ moca reakʼ sahẽtʼte uni doe oṭaṅokʼa.

³¹ Ạuṛiyakʼ jinis cetanre pạtiạukʼte alo jemone ṭhoka ocokʼ, ente ona bodolte uni do cetʼge bae ńama.

³² Dinko ạurirege acʼakʼ kuṛại do purạteye ńama; uniyakʼ ḍạrko do ar baṅ sarhekʼtaea.

³³ Uni do nonkan darkha nạ̃ṛĩ lekae hoyokʼa one uniyakʼ berel darkha jo do koṭa ńur akan; uniyakʼ baha do tolmocʼ ńurakan jạitun dare lekae hoyokʼtaea.

³⁴ Isor baṅ botoraekan hoṛren do cele gidrạge bako tahena; onkoakʼ ghus reakʼ oṛakʼ duạr do seṅgelte maraokʼtakoa.

³⁵ Onkoakʼ kukhire do dusṭạmi tahena ar bạṛicʼakʼko busạkʼjoṅa; ar onkoakʼ lacʼre do phikirkoge gaṛhaokʼtakoa.”