Jobakʼ 14 - সান্তালী বাইবেল

¹ Maejiuakʼ kukhireye janam akan manwa do thoṛa din lạgitʼ kanae, uni do jalateye perecʼgea.

² Uni do baha lekae saṛokʼkana ar ona tayom doe tolmojokʼa; uni do umul lekae ńir calakʼkana, ar bae tahenkana.

³ Nonkan mitʼ hoṛ cetanre cetʼ amakʼ mẽtʼ do bidokʼkana? Ar bikʼcạr lạgitʼ cetʼ iń samaṅrem ạguyedekana.

⁴ Besaphaicʼ khon cetʼ jãhãe saphaicʼe benao daṛekea? Ona do okoehõ bae daṛeakʼa.

⁵ Manwakoakʼ bahaokʼ din do niṭ dohoakante; uniyakʼ candoko reakʼ lekhawakʼem ṭhik dohoakada; ar uniyakʼ simạnakom ṭhik dohoakatʼte, uni do ona bae parom daṛeakʼa.

⁶ Onate uni secʼ khon amakʼ mẽtʼ ạcurtam, ar jirạu ocoaeme; din ṭakʼlaoko lekage uni do okte khemao ocoaeme.

⁷ “Dare reakʼ hõ as menakʼa; makʼ giḍilenre hõ ona do arhõ omon ruạṛokʼa, ar ona khon arhõ nãwã kahle oḍokokʼa.

⁸ Otre ona reakʼ rehetʼ do haṛamokʼkana, ar hasare ona reakʼ gonḍa do gujukʼkana.

⁹ Enhõ dakʼ reakʼ baste ona do arhõ sagenokʼkana; ar nãwã rohoeyakʼ leka arhõ dạṛko oḍokokʼkana.

¹⁰ Menkhan manwae gocʼlen khan uni doe caba utạrokʼa; ar sahẽtʼ oḍokokʼ tayom do okateye calakʼ kana?

¹¹ Doreão reakʼ dakʼ cetʼ leka ańjedokʼ ar gaḍa cetʼ leka rohoṛokʼ,

¹² onkage manwae giticʼlen khan ar bae beredokʼa; serma ạuri cabakʼ hạbicʼ uni do bae ebhenokʼa, uni do jạpitʼ khon ar bae ebhenokʼa.

¹³ “Ohae, Sheolre baṛem oko danaṅ liń khan, amakʼ edre ạuri cabakʼ hạbicʼem doholiń khan, ar ona tayom mitʼṭecʼ oktem niṭạńte ińem disạ ocoyiń!

¹⁴ Manwa gujukʼ tayom do cetʼ arhõe jiwetʼ ruạṛokʼa? Are onkae khan, ińakʼ khaṭaokʼ reakʼ sanam dinkore nãwã arokʼ lạgitʼ ńel hor akae iń tahena, kạmi khon khalasokʼ din ạuri seṭerokʼ hạbicʼ.

¹⁵ Unre amem hohoạńạ ariń goṅ ruạṛa; ar amakʼ titeakʼ kạmiyakʼ lạgitʼem uihạrińa.

¹⁶ Unre am do ińakʼ jaṅga reakʼ taṛamem lekhaea menkhan ińakʼ kại secʼ do bam beṅgeda.

¹⁷ Ińakʼ ghạṭko do mitʼṭecʼ thạilạkʼre chapkatem bondkakʼa ar ińakʼ sanam kạikom dapalketińạ.

¹⁸ “Menkhan buruko do dasaokʼ ńurokʼkana, ar huṭupʼ dhiri do acʼakʼ ṭhạ̃i khon ocogokʼkana,

¹⁹ dakʼ do dhiriko cetʼ lekae heṛ ocoyetʼ ar ạtukʼ dakʼko cetʼ leka hasae gecʼ idiyetʼ, onkage am do manwawakʼ asem maraoetʼtaea.

²⁰ Jaejug lạgitʼ unim domonedea, are parom calakʼkana; uniyakʼ cehram bodoletʼtaea arem kol gotʼkae kana.

²¹ Hoponko manot ocokʼ kantaere hõ uni do bae baḍae daṛeakʼkana; arko bemanot ocolenre hõ uni do ona bae ńel joṅkana.

²² Uni do eken acʼakʼ hoṛmo reakʼ hasogeye ạṭkareda ar acʼ lạgitʼgeye hińjrạukʼkana.”