Jobakʼ 13 - সান্তালী বাইবেল

¹ “Noako joto do ińakʼ mẽtʼteń ńel akada ar nij luturte ańjomkate onań bujhạuakada.

² Ape okaṭakʼpe baḍae iń hõ ona doń baḍaegea; ape khon oka secʼte hõ bạń komaoa.

³ Menkhan sanam daṛeanicʼ sãote galmarao iń khojkana, Isor tulucʼ ińakʼ mambla chinḍạu iń khojkana.

⁴ Ape joto do eṛeakʼ khudạuko kanape; ar jotoge ạuṛiyakʼren raranko kanape.

⁵ Ah! Jotoge thir hape akaepe tahen khan! Ape lạgitʼ do onage ạkilanakʼ kạmi hoykokʼa.

⁶ “Ńitokʼ do ińakʼ jothat katha baṛe ańjompe; ińakʼ luṭi reakʼ ạjij baṛe luturakʼtińpe.

⁷ Isor ńutumte cetʼ behokakʼ kathape roṛa? Uni ńutumte cetʼ eṛeakʼ kathape roṛa?

⁸ Uni secʼge cetʼ kathape roṛ idiya? Isor ńutumte cetʼpe reṭepeṭekʼa?

⁹ Uniye biḍạu aṭkarlepe khan ape do cetʼ bhage hoyokʼtapea? Manwa cetʼ lekae ṭhoka ocokʼ onka do cetʼ unipe ṭhoka daṛekea?

¹⁰ Mẽtãhãpe beṅgetʼakʼ khan ape do khạṭigepe nisṛạu ocokʼa.

¹¹ Uniyakʼ mạhima do cetʼ bae botor ocopea? Uniyakʼ toras do cetʼ apere baṅ paṛaokʼa?

¹² Apeakʼ disạwakʼ kathako do torocʼ reakʼ kạhtukge; apeakʼ aḍokʼ reakʼ pạcriko do hasa reakʼakʼge.

¹³ “Hape thirlenpe, ar roṛ ocoạńpe; ona tayom do ińre jãhãnakʼge paṛaokʼma.

¹⁴ Cedakʼ apnar do muhinreń paṛaokʼa ar ińakʼ jiwi doń cuputʼ doho kạtińạ?

¹⁵ Ńelpe, uni doe gocʼ giḍikạńre hõ enhõ uni cetanre asiń dohoya; ar khạṭige uni samaṅre coloniń sojhetińa.

¹⁶ Ar onage ińakʼ rukhiyạkʼ reakʼ pontha do hoyokʼa, ente bạṛicʼ hoṛ uni samaṅre ohoe hecʼ daṛelena.

¹⁷ Ińakʼ katha do mone lagaokate ańjomtińpe; ar okań menetʼ apeakʼ luturre ona rebetʼ dohoype.

¹⁸ Ińakʼ roroṛteakʼ do ńit iń ṭhik dohoakada, onateń baḍaea, iń do dhorom menteń ṭarhaokʼgea.

¹⁹ Jãhãege cetʼ iń upạrteye reṭepeṭekokʼa? Ariń daṛeakʼ khan iń doń gujukʼa.

^20-21 “E Isor, iń do eken barea jinis emạńme; amakʼ ti do iń cetan khon sahaṛkakʼme, ar amakʼ toraste do alom botor ocoyińạ; enḍekhan am khon do ar bạń danaṅokʼa.

²² Ona tayom hohoạńme, ar iń doń goṅ ruạṛa, ar baṅkhan ińge roṛ ocoạńme ar am do ona reakʼ roṛ ruạṛạńme.

²³ Lạiạńme, ińakʼ behokakʼ ar kại do cetʼ kana? Ińakʼ dos ar kại baṛe udukʼạńme.

²⁴ Cedakʼ mẽtʼãhã dom danaṅ akatʼtama ar bạiri mentem hudis edeńkana?

²⁵ Hoete oṭaṅokʼkan sakam do cetʼem toras ocokea? Ar rohoṛ bhusạko do cetʼem khudạukea?

²⁶ Iń upạrte do hewer haṛhatʼ katham oletʼkana ar juạn jokhecʼ reakʼ ghạṭkom lekhawạńkana.

²⁷ Biṛi paṭate jaṅga dom tolkạtińkana; ińakʼ sanam horkorem tolas edeńkana ar ińakʼ jaṅga talka beṛhaetem simạwạńkana.

²⁸ “Manwa do sea jinis lekae garao cabakʼkana ar tejoko jomakatʼ kicricʼ lekae hoyakana.