Jobakʼ 12 - সান্তালী বাইবেল

Jobakʼ roṛ ruạṛ

¹ Unre Job doe roṛ ruạṛkeda,

² “Ape do ạkilanko mentepe hudisokʼkana apeakʼ gujukʼ são sãote ạkil hõ gujukʼtapea.

³ Menkhan ape leka iń hõ buj do menakʼtińgea; ape khon oka lekate hõ bạń komaoa; okape menetʼ ona do okoe bhala bae baḍaea?

⁴ Iń do Isoriń hohoaekan tahẽkana are ańjometʼtiń tahẽkana, enhõ ińren gateko do ińko landa-dhutʼạń kana.

⁵ Sukren hoṛ do duk kosṭoko nindạueda; onkoko hudiseda ona do leńjedokʼkan hoṛkoakʼ kana.

⁶ Luluṭkoakʼ tạmbure jãhãn gulmalge bạnukʼa; Onko do Isorko edre ocoyedere hõ khạtirjomako tahenkana; Isorge onko do jotowakʼe emako kana.

⁷ “Janwarko ṭhen kulijoṅme, onko do amko cetʼama; coṭren cẽṛẽko ṭhen kulijoṅme, onko hõko lạiyama;

⁸ dhạrti lạiyaeme, uni do ame cetʼama; doreãoren hako ṭhen kulijoṅme onko hõ amko lạiyama.

⁹ Onko sanamgeko baḍaea Probhu Isorakʼ daṛegeye nonkayeda.

¹⁰ Uniyakʼ tirege sanam jiwiyankoakʼ jiwi do menakʼa; sanam manwakoakʼ sãhetʼ hõ uniyakʼ tirege menakʼa.

¹¹ Alaṅ do cetʼleka jomakʼe cakha ạikạuetʼ onkage lutur hõ katha reakʼe biḍạu aṭkareda.

¹² Apepe meneda, haṛam hoṛko ṭhen do akel ńamokʼa ar ḍher din bahaokʼicʼ ṭhen do buj menakʼa.

¹³ “Menkhan akel ar daṛe do Isor ṭhenge menakʼa; sopolha ar buj hõ uni ṭhenge.

¹⁴ Uniye rạputʼ giḍilere celege bako benao ruạṛa; ar jãhãe hoṛe siń esetʼlere celege bako jhijea.

¹⁵ Uni do dakʼe akoṭ ocole khan akal hoyokʼa; ar onae jhicʼle khan disạm do ḍahao maraokʼa.

¹⁶ Daṛe ar akel do uniyakʼ kangea; ekʼṛeyicʼ ar eṛe ocokʼicʼ bana hoṛge uni latarren kanakin.

¹⁷ Uni do sosolhakoakʼ kicricʼ totʼkate onkoe bondikoa ar bikʼcạrko do lelhae hoyocokoa.

¹⁸ Uni do rajakʼ kicricʼe recʼ hataoa ar uniye bondiyea.

¹⁹ Uni do naekekoakʼ kicricʼ totʼkate onkoe bondikoa ar daṛeanko doe totʼ giḍikakoa.

²⁰ Uni do pạtiạran hoṛkoakʼ mocae bondtakoa ar haṛam hoṛkoakʼ bud doe nosṭo ocoytakoa.

²¹ Cetan hudạren hoṛko cetanre acʼakʼ kurude dula ar daṛeanko doe eken ti ocokoa.

²² Ńut reakʼ okoakʼkoe sodor ocoya ar dhund do marsalteye oḍok ạguyeda.

²³ Uni do jạtrenkoe maraṅetʼkoa arhõe maraokoa, onkoe baḍhao ocokoa arhõe bondi ocokoa.

²⁴ Dhạrtiren mukhiyạkoakʼ buj doe sạṅgińʼtakoa; ar nisun jaegakoreye dãṛãbaṛa ocokoa.

²⁵ Onko do marsal begorte ńutreko taham tukucʼ baṛaea; ar bul hoṛ lekae konḍa manḍe ocoyetʼkoa.