Jobakʼ 11 - সান্তালী বাইবেল

Sopharakʼ pạhil galmarao

¹ Unre Namathi Sophar doe roṛ ruạṛkeda,

² “Niạko reakʼ roṛ ruạṛ do cetʼ baṅ emogokʼa? Mocawan hoṛ do cetʼ dhorome ṭarhaokokʼa?

³ Amakʼ noa ạuṛiyakʼ katha ańjomkate hoṛ do cetʼ hape akanko tahena? Amem landawakore cetʼ am do bako lajao ocomea?

⁴ Am do Isorem metaekana, amakʼ pạtiạure jãhãn khutge bạnukʼa ar uniyakʼ mẽtʼre am dom khạṭigea.

⁵ Aha, Isor jemon katha baṛeye roṛ, am upạrte luṭikin baṛeye jhijtae

⁶ ar ạkil reakʼ okoakʼkoe baḍae ocome, ente uni do ạḍi lekan bud menakʼtaea. Ar noa baḍaekakʼme amakʼ ghạṭ lekate Isor do sạjại do bae emama.

⁷ Isorakʼ okoakʼko reakʼ khạndritetʼ do cetʼem baḍae daṛeakʼa? Sanam daṛeanicʼakʼ simạna baṅ tinạkʼ sạṅgiń ona do cetʼ suṭhik katem ńel daṛekea?

⁸ Serma khon hõ usulge ona do cetʼem bujhạu daṛeakʼ kana? Seol khon khạndrige, ona hõ cetʼem baḍae daṛeakʼ kana?

⁹ Onam jokhale khan pirthimi khon hõ jeleńgea ar jalapuri khon hõ osargea.

¹⁰ Uni do hecʼkate hajotreye bondilem khan ar bicạr ṭhene idilem khan, enḍekhan okoe uni doe akoṭ daṛekea?

¹¹ Uni do bhõnḍ hoṛko khạṭigeye orom akatʼkoa; bạṛicʼ jãhãnakʼe ńelle khan uni do cetʼ bae ạribạndhiya?

¹² Bir gadha hopon cetʼleka manwa huyạte bae janam daṛeakʼ, onkage lelha hoṛ hõ ạkilan hoṛ bae hoedaṛeakʼa.

¹³ “Menkhan amakʼ mon purạtem emae khan, ar uni secʼ amakʼ tiyem tiyạrle khan,

¹⁴ amre oka kại menakʼ onam sạṅgiń lekhan, ar bedhorom amakʼ oṛakʼre bam tahẽ ocowakʼ khan,

¹⁵ enḍekhan am do bin dusạnte bohokʼem rakabtama ar begor botorte kajaktem teṅgokʼa.

¹⁶ Unre amakʼ kosṭo khạṭigem hiṛińa, ona do ạtukʼkan dakʼ lekagem hudisa.

¹⁷ Amakʼ jion do tikin khon hõ bạ̃ṛti marsalokʼa ar ńut do setakʼ bela leka hoyokʼa.

¹⁸ Amakʼ do dil tahena, ente as menakʼgetama; beṛhaetem beṅgeda ar khạtirjomam jirạujoṅa;

¹⁹ Giticʼ jirạu joṅre celege bako comkao ocomea. Ar ḍher hoṛ do amakʼ daya ńam lạgitʼko aroja.

²⁰ Menkhan bedhoromkoakʼ mẽtʼ do ạndhạukʼtakoa onko do cetʼ asrayge bako ńama; mucạtʼ sãhetʼge hoyokʼa onkoakʼ as do.