Jobakʼ 10 - সান্তালী বাইবেল

¹ “Ińakʼ jiwi do iń bhitrire laṅgayentińạ, ińakʼ duk reakʼ katha do khulạsateń roṛa ar ińakʼ jiwi reakʼ hewer haṛhatʼrege kathań roṛa.

² E Isor, iń do alom bicạr dusiyińạ menkhan iń upạrte oka khanḍa khạnḍi menakʼtam ona baḍae ocoyińme.

³ Iń kosṭom imạńte amakʼ do cetʼ lab? Amakʼ ti teakʼ kạmi do cetʼem nihạ̃t giḍikakʼa ar bạṛicʼkoakʼ ponthako dom kusiyakʼa?

⁴ Amakʼ mẽtʼkin do cetʼ harta reakʼ mẽtʼkana? Manwa leka cetʼ am hõm ńeńelkangea?

⁵ Manwa reakʼ din lekage cetʼ amakʼ dinko paromokʼ kana? Onko lekage cetʼ amakʼ bochorko hõ paromokʼ kana?

⁶ Ona iạte cetʼ ińakʼ doskom sendra kana ar ińakʼ ghạṭkom suṭhik bakʼṛa kana?

⁷ Baḍaegeam dusi doń baṅ kana ar amakʼ ti khon okoehõ bako rukhiyạ daṛeạńạ.

⁸ “Amakʼ tikinge iń doe gaṛhao akadińạ, are benao akadińạ; ńitokʼ do cetʼ ruạṛ hecʼkatem marao giḍikạńạ?

⁹ Disạime, hasa reakʼ bhajan lekam benao akadińạ; am do cetʼ arhõ dhuṛim hoe ocoyińạ?

¹⁰ Toa lekagem dul akadińạ ar gotom lekam gaṛdha ocoakadińạ.

¹¹ Harta ar jeltem oyo akadińạ, jaṅ ar sirkotem benao akadińạ.

¹² Jiwim emakawạdińa, ar asambheṛ dulạṛem udukʼakadińạ; amakʼ jotonte ińakʼ jiwim rukhiyạ akatʼtińạ.

¹³ Menkhan noako do amakʼ monrem baeakada, ińiń baḍaea noakoge am dom disạ akada,

¹⁴ Ińiń kại khan, onam ạribạndhiyetʼ kana ar ińakʼ dos reakʼ sạjại begor do bam aṛagińạ.

¹⁵ Ińiń dusige khan iń cetanre do muhin hecʼ paṛaoạńạ. Ar bin dusạniń hoylenre hõ bohokʼ do bạń rakapʼ daṛeạtińa, ente lajaoteń perecʼ akana ar kosṭoteń unum akana.

¹⁶ Dhạcri kul leka bohokʼ iń rakapʼle khan iń iạte am do tãṛãkʼ akanem tahena ar amakʼ botoranakʼ daṛe do arhõm udukʼạńạ.

¹⁷ Iń upạrte am do nãwã nãwã gohakom teṅgoyetʼkoa ar iń upạrte amakʼ edrem baḍhaoetʼtama; amakʼ akromon do mitʼṭecʼ mitʼṭecʼkate iń upạrte hijukʼkana.

¹⁸ “Cedakʼ eṅgạńakʼ kukhi khon dom oḍokkedińa? Jãhãn mẽtʼ ạuriye ńeleńre cedakʼ bạń gocʼlena?

¹⁹ Hae, tishõ bạń benaolen khan, se lacʼ khon sojhe topateń idi ocolen khan!

²⁰ Ińakʼ thoṛa din reakʼ bahaokʼ do cabayena; ar ńitokʼ do aṛakʼkạńme jemon thoṛa ghạṛicʼ iń rạskạ daṛeakʼ.

²¹ Iń do usạrage ńut ar moron dhund disạmteń calakʼa; ar tishõ bạń ruạṛ hijukʼa.

²² Ona do kaṛaṅ ńutakʼ disạm kana, moron dhund reakʼ disạmge; onḍe do marsal reakʼ rãtge bạnukʼa.”