Jirimiạ 9 - সান্তালী বাইবেল

¹ Hae, ińakʼ bohokʼ do dakʼge hoylen khan, ar ińakʼ mẽtʼ do jharna dakʼge hoylentiń khan! Enḍekhan iń jạtren okoeko hoṛko gocʼ ocoakan onko lạgitʼ siń ar ńindạń rakʼkea.

² Hae, hahaṅkar ṭhạ̃ire horten calakʼkoakʼ mitʼṭecʼ ḍerań hoylen khan! Enḍekhan ińren hoṛko bạgikate onḍegeń sen pharakkokʼa, ente onko jotoge laṭghaṭ ar ekʼṛekoren dol kanako.

³ Probhu Isore meneda, “Onko do eṛeyakʼ sar tuń lạgitʼ akoakʼ akʼ leka alaṅko sapṛao akatʼtakoa; disạmre sạriyakʼ cetanre eṛeyakʼ jitạu akana. Onko do kại cetanko kạiyeda. Ar akoren Isor mente bako aṅgoc edeńkana.

⁴ Onko do mimitʼ gateko khon sontor akaeko tahenma ar apnar boehako hõ aloko pạtiạuako ma, ente mitʼke mitʼ boeha doko ṭhokagea ar mitʼke mitʼ gate doko okta baṛaegea.

⁵ Gate do gateye ṭhokayea ar sạri katha do okoe hõ bako roṛeda. Onko do akoakʼ alaṅre eṛe roroṛko cetʼ akada; ar ghạṭ iạteko laṅga caba akana.

⁶ Am do eṛeyakʼ talarem girobasokʼ kana! Amren hoṛko do eṛeyakʼteko perecʼgea; ar iń ṭhen do bako jimạkʼ kana.”

⁷ Ona iạte phạdkoren Probhu Isore meneda, “Ńelpe, onko doń galaokoa ariń biḍạu aṭkarkoa, ente ińren hoṛko onka akatʼ iạte ar cetʼ iń ceka daṛeakʼa?

⁸ Onkoakʼ alaṅ do gogocʼakʼ sar leka; ona do phạsiạra kathageko roṛa. Onko do mocate aḍepaserenko tulucʼ sebel sebel kathako galmaraoa menkhan ontorre do uni upạrte jhãmpako oḍaoeda.

⁹ Iń do cetʼ ona iạte bạń sạjạikoa? Nonkan jạtrenko cetanre ińge cetʼ bạń hala hạliya?”

¹⁰ Buruko ńutumteń rakʼeda ar hahaṅkar reakʼ ạtiń ṭạnḍiko lạgitʼ doń homor halaṅeda. Ente onako do dhaṅdhaser akana, ar okoehõ onkate do bako paromokʼkana. Mĩhũ meromkoakʼ bhokraokʼ hõ baṅ ańjomokʼkana. Coṭren cẽṛẽ ar janwar doko dạṛ akada arko calao cabayena.

¹¹ Probhu Isore meneda, “Jerusalem do mitʼṭecʼ dhaṅdhaserakʼ ar toyokoakʼ tahen lạgitʼ bhugạkʼgeń hoeocoya. Ar Jihudạ nagrahako do nonkań dhaṅdhasera, onḍe do ar okoehõ bako girobasokʼa.”

¹² Jãhãe nonkan ạkilanicʼ menaea, okoe do onae bujhạu daṛeakʼ? Probhu Isor ṭhen khon ańjomkate okoe ona do eṭakʼkoe baḍae ocodaṛekekoa? Okaṭakʼ disạm do jarkhar iạte hahaṅkar leka roṅgo akan, ar onkate do celege bako paromokʼ kana?

¹³ Probhu Isore meneda, “Ona reakʼ karon do hoyokʼkana, iń okaṭakʼ ạn-ạriń emakatʼko ona doko bạgi akawada; onko do ińakʼ aṛaṅ bako ańjomleda ar ona leka bako taṛamleda.

¹⁴ Ona bodolte akoakʼ ontor reakʼ kạṭhuạtetʼ lekako senokʼkana. Ar akoren apatkoakʼ cecetʼakʼ leka onko hõ Bakʼal debotako pańjayede kana.

¹⁵ Ona iạte iń do Israelren phạdkoren Probhu Isor ńutumte noa kathań roṛeda, ‘ńelme, noko hoṛ do haṛhatʼ jomakʼ ar bis dakʼ iń ńũ ocokoa.

¹⁶ Ar nonkan boṅgan hoṛ jạtrenko talareń chirchạturkoa okoe do akohõ baṅ ar akoren hapṛamko hõ bako baḍae akatʼko. Ar ạuriko marao utạrko hạbicʼ onko tayom tayomte lạṛhạiyiń kola.’ ”

¹⁷ Phạdkoren Probhu Isore meneda, “Ma ńitokʼ do hudiskate ńelpe. Homor halaṅ maejiuko hoho ạgukope; okoe do rarakʼreko gạkhuṛge onko hoho ạguko lạgitʼ hoṛko kolkope.”

¹⁸ Onko do usạra hecʼkate abo ńutumteko jare jarekʼ ma jemon aboakʼ mẽtʼ dakʼ hiḍir hiḍir jorokʼtabon.

¹⁹ Sion khon jare jare ańjomokʼ kana, “Abo dobon jarkhar utạrena! Ar ạḍitetʼ bon lajao ocoakana! Aboakʼ oṛakʼ duạr do marao utạr akana, ar onatege aboakʼ disạm do bạgiyakʼ hoyokʼtabona.”

²⁰ Ńitokʼ do E Maejiuko, Probhu Isorakʼ katha ańjompe; uniyakʼ moca reakʼ katha ańjom lạgitʼ lutur jhijtape. Ar aperen hoponerako jare jarekʼ cetʼakope ar eṭakʼko do homor halaṅ reakʼ sereń cetʼakope.

²¹ Gujukʼ do aboakʼ jalna secʼte aboakʼ gaṛkore boloakana; ona do kulhi khon gidrạko ar dobạṭiạ khon juạnkoe marao utạr akatʼkoa.

²² Probhu Isorge noa katha do memene metadińạ, “Hoṛkoakʼ mạ̃ṛĩ do gur akan tahena guricʼ leka; irokʼicʼ tayomre binḍạko leka, okoehõ ona do bako jarwaea.”

²³ Probhu Isore meneda, “Ạkilan hoṛ do akoakʼ ạkil iạte aloe sarhaokʼma, ar daṛeanko hõ akoakʼ daṛe iạte aloko sarhaokʼma ar kisạ̃ṛko hõ akoakʼ dhon iạte aloko sarhaokʼma,

²⁴ menkhan jãhãe sarhaokʼe menjoṅ kan khan uni do noa iạteye sarhaokʼma, uni do ińe orom akadińạ, metatʼme uni doe baḍae akadińạ, iń kangeạń Probhu Isor do; ińakʼ dulạṛ do asambheṛgea ar dhạrtire ińakʼ kạmi do dhorom ar sạriyakʼte perecʼgea. Ente iń do noakogeń bạsutakʼkana. Ar iń Probhu Isorge noa katha doń meneda.”

^25-26 Probhu Isore meneda, “Nonkan dinko hijukʼkana tinre iń do Misorre, Jihudạre, Edomre, Amonre, Moabre ar hahaṅkarreko girobasokʼ kan, okoe do bohokʼ banarsa aṛe reakʼ upʼko kaṭopʼetʼtako onko sanamkogeń sạjạikoa. Onko do eken hoṛmo motoko khatna akana, ontor do baṅa; Israelko hõ ontor do bako khatna akana.”