Jirimiạ 7 - সান্তালী বাইবেল

Hoṛkoakʼ bebatao ar kại

^1-2 Probhu Isor do Jirimiạ mundil reakʼ duạr ṭhen teṅgokate niạ khobor lại jạhir lạgitʼe metadea, Jihudạren okoeko hoṛ noa duạrte Probhu Isor sewawae lạgitʼko bolokʼ onko do jemon Probhu Isorakʼ kathako luturakʼ.

³ Israelren Isor phạdkoren Probhu Isor doe meneda, “Ape do apeakʼ colon beohar ar kạmiko sudhrạutape enḍekhan niạ ṭhạ̃iregeń girobas ocopea.

⁴ Probhu Isorakʼ oṛakʼ ńutumte oka eṛe katha roṛogokʼkan onare do alope bhorsakʼa.

⁵ Ape do sạrige apeakʼ colon ar kạmiko reakʼpe jutletape khan ar hoṛkoakʼ hok reakʼpe chinḍạuletako khan,

⁶ ar bidisiạko, ṭũạr amarko se rạnḍiko bape santaoko ar niạ disạmre miridoskoakʼ mãyãm bape joro ocoy ar eṭakʼ debotako bape pańjako,

⁷ enḍekhan niạ disạmre aperen hapṛamko cetʼleka piṛhike piṛhi girobasokʼ lạgitʼ iń em akatʼko ape hõ onkage nonḍeń girobas ocopea.

⁸ “Ńelpe, ape do eṛe kathakoregepe pạtiạu akana, menkhan onare do cetʼ porhoge bạnukʼa.

⁹ Ape do kombṛoko, gogocʼko, laṭghaṭko ar eṛe eṛe kiriạkʼko kanape ar Bakʼ-al debota ńutumte dhupkope jeretʼetʼ kana. Ona chaḍa okoe debotako bape orom akatʼko onkope pańjayetʼkoa.

¹⁰ Ar ona tayom do ińakʼ oṛakʼre hecʼkate iń samaṅre teṅgokatepe meneda, ale dole rukhiyạle ńamkeda. Apepe onkayeda jemon bạṛicʼ kạmikope kạmi daṛeakʼ.

¹¹ Ińakʼ oṛakʼ do cetʼ ape ṭhen ḍạkukoakʼ dander hoyakana? Iń Probhu Isorgeń meneda, iń do noakoń ńeletʼgea.

¹² “Ape do ńitokʼ Silore one ińakʼ tahen oṛakʼ okare pạhilteń hoyocoletʼ onḍe calakʼpe ar ińren hoṛ Israelkoakʼ bạṛicʼakʼ khạtirte onare cetʼ iń cekaletʼ ona ńel ạguiype.

¹³ Ape do noakope kại akada, metakʼme bar bar metatʼpere hõ ape ańjomletʼtińạ ar hohoatʼpere hõ bape goṅledińa.

¹⁴ Nokʼoe niạ oṛakʼ cetanrepe bhorsakʼkan ona oṛakʼ do ińakʼ tahen oṛakʼ iń hoyocoleda, ar niạ ṭhạ̃i do ape ar aperen hapṛamkoń ematʼko tahẽkana. Menkhan apeakʼ kại iạte niạ oṛakʼ ar niạ ṭhạ̃i do ona lekań hoeocoya one Siloreń cekaletʼ.

¹⁵ Iń do aperen boehako lạgitʼ, metakʼme Ephrayimren hoṛkore cetʼ iń cekaletʼ onkage ape hõ iń samaṅ khoniń ṭhelao giḍikapea.”

¹⁶ Probhu Isore meneda, “Noko hoṛko lạgitʼ do alom koejoṅa, onko lạgitʼ do alom raga ar jãhãnakʼ iń ṭhen alom nehõrokʼa; ar jãhãnakʼ hõ alom ạjijokʼa, ente iń do bạń ańjomtama.

¹⁷ Am do cetʼ bam ńeńelkana Jihudạ reakʼ nagrahakore ar Jerusalem reakʼ kulhikore onko do cetʼko ceka kana mente?

¹⁸ Gidrạko do sahanko halaṅeda, apatko do seṅgelko joleda ar maejiuko do holoṅko sipiyeda ar sermaren rạni ńutumte piṭhạko benaoeda. Ar iń duk ocoyiń lạgitʼ onko do debotako ńutumte coḍor samaṅokʼakʼko samaṅeda.

¹⁹ Menkhan noako kạmikate cetʼ ińko duk ocoyedeń kana?” Onko do akotege lajaoko ạgujoṅkana ar apnartetʼko dukokʼkana.”

²⁰ Ona iạte Probhu Isor doe meneda, “Ińakʼ edre ar raṅgao do niạ ṭhạ̃i cetanre, manwa ar janwarko cetanre, ṭạnḍi reakʼ dare nạ̃ṛĩko cetanre ar jumi reakʼ phosolko cetanreń paṛao ocoya, ar ona edre do jolokʼtege tahena, baṅge ĩṛĩjokʼa.”

²¹ Israelren phạdkoren Probhu Isore meneda, “Apeakʼ eṭakʼ samaṅokʼakʼ sãote jeredokʼ samaṅokʼakʼ samaṅkate ona reakʼ jel do cedakʼ bape jomeda?

²² Iń do noa kathań meneda, ente Misor disạm khon aperen hapṛamko tinreń oḍok ạguletʼkoa unre jeredokʼ ar eṭakʼ samaṅokʼakʼ reakʼ katha iń do bạń metatʼko tahẽkana se bạń hukumatʼko tahẽkana,

²³ menkhan noań hukumatʼko tahẽkana, ‘ińakʼ katha leka senokʼpe, iń do aperen Isoriń hoyokʼa ar ape do ińren hoṛpe hoyokʼtińạ. Ar oka horte calakʼ reakʼ iń hukumakatʼpe ona horte calakʼpe jemon bhạlại hoyokʼtape.’

²⁴ Menkhan onko do ona bako ańjomleda ar mone hõ bako moneyada; ona bodolte akoakʼ kusi leka, akoakʼ bạṛicʼ mon reakʼ kạṭhuạtetʼ lekako taṛamkeda. Onko doko pạc ruạṛena, ar bako lahalena.

²⁵ Aperen hapṛamko Misor disạmko bạgiyatʼ tayom khon teheń hạbicʼ dinke din ape ṭhen ińren gutiko, metakʼme nạbikoń kolletʼkoa.

²⁶ Menkhan ińakʼ katha do bape ańjomleda se mone hõ bape moneyada. Ape do hoṭokʼpe keṭecʼketʼtapete aperen hapṛamko khon hõ ḍher bạṛicʼakʼpe kạmi akada.

²⁷ “Am do noako katham galmaraoakore onko do amakʼ katha bako ańjomtama; arem hohoakore hõ onko do bako goṅama.

²⁸ Onate onkom metakoa, ‘ape do onko jạtrenko kanape, okoe do Probhu Isorakʼ sana leka bako senlen ar uniye sudhrạuletʼkore hõ bako hetaoatʼtaea. Sạriyakʼ do cabayena; ar ona do onkoakʼ moca khon getʼ gidiyena.’ ”

²⁹ E Jerusalem, amakʼ upʼ getʼkate sạṅgińte giḍikakʼme; ceḍe ḍuṅgrikore homor halaṅme, ente Probhu Isor do acʼe raṅgao akan piṛhirenko nihạ̃t are giḍi sae akatʼkoa.

Hinnom reakʼ otetre bạṛicʼ kạmiko

³⁰ Probhu Isore meneda, “Jihudạren hoṛ do iń nońjorre bạṛicʼakʼko kạmi akada. Ińakʼ oṛakʼre akoren hirkhạwan boṅgako doho akatʼkote onako bhonḍakada.

³¹ Onko do akoren hoponko ar hoponerako seṅgelre khadleko lạgitʼ Bin-hinom buru lodam reakʼ Tophet ńutumanakʼ than boṭkocʼko benao akada. Menkhan niạ hukum iń do bạń em akana, ińakʼ monre hõ ona do baṅ rakapʼlena.

³² Ona iạte ńelme, nonkan dinko hijukʼkana hoṛko do ona ṭhạ̃i Tophet se Bin-hinom tapol do ar bako metakʼa, bickom khukhun buru nalako metakʼa, ente tinạkʼ din Tophtre jaega tahena unạkʼ din onḍege onko do gocʼkoko topakoa.

³³ Ona tayom noko hoṛkoakʼ mạ̃ṛĩ do coṭren cẽṛẽko ar dhạrtiren janwarkoakʼ jomakʼ hoyokʼa ar onko lagako lạgitʼ do celehõ bako tahena.

³⁴ Iń do Jihudạ reakʼ nagrahakore ar Jihudạ reakʼ sanam horkore rạskạ ar hulạs reakʼ aṛaṅ ar jãwãe ar bạhu kuṛiyakʼ aṛaṅiń thir ocoya, ente disạm do mitʼṭecʼ jarkharakʼge hoyokʼa.