Jirimiạ 6 - সান্তালী বাইবেল

Jerusalemko esetʼ ạcuretʼ

¹ Probhu Isore meneda, “E Benjạminren hoṛko, rukhiyạ ńam lạgitʼ ńir joṅpe. Jerusalem khon ńirjoṅpe. Tekoa nagrahare sakwa oroṅpe. Beth-hakeremre cinhạ tul rakabtape, ente utạr secʼ khon jarkhar ar muhin dokin samaṅ ṭhikakada.

² Napae ar lulubucuteye tahenkan Sionren kuṛi doń maraoea.

³ Gukʼpiko cetʼleka pal bhiḍiwanteko hijukʼ onkage rapajko hõ akoren lạṛhại phạdkoante uni upạrteko hijukʼa; uni beṛhaete onko do tạmbuko ṭaṅgaoa ar apan ạpin jaegareko tahena.

⁴ Onkoko mena, ‘uni upạrte lạṛhại lạgitʼ sapṛaokʼpe. Ma beretʼpe, dela bo calakʼa, abo do tikin jokhecʼge jhãpbo ema. Menkhan hae, marsal do komao idikʼkana, ar ńut reakʼ umul do jhạl idikʼkana.

⁵ Onate ma beretʼpe, dela, ńindạge abo do jhãpbo ema ar uniyakʼ gaṛko bon mohor meṭaotaea.’ ”

⁶ Phạdkoren Probhu Isor do noa kathae meneda, “Dareko makʼ bhindạṛpe ar Jerusalem upạrte ghekʼrao pinḍhạ benaope. Niạ nagraha do sạjạite hõ sạjạiyokʼgea; ona do jor-julumte perecʼ akana.

⁷ Kuń reakʼ dakʼ cetʼleka tartạriạ tahen onkage uni do acʼakʼ dusṭạmiye tartạriạ ocoyeda. Ona bhitrire jorbojor ar jarkhar reakʼ saḍe ańjomokʼ kana; uniyakʼ rog ar ghạl do jaoge iń samaṅre menakʼa.

⁸ E Jerusalem, sontorokʼ reakʼ katha ańjomme, ar baṅkhan am ṭhen khon ruạṛ senkate amakʼ disạmiń jarkhar cabaytama ar baṅ berelokʼ disạmgeń hoeocoya.”

⁹ Phạdkoren Probhu Isore meneda, “Darkha khet khon cetʼ leka darkha joko gotʼ doṛhae onkage bạiriko do disạm khon Israel jạtrenko gotʼ dohṛakoa. Okoe hoṛ darkha joe god ar cetʼleka tiye ạwil onko hõ sarecʼ hoṛkore onkageko kạmiya.”

¹⁰ Okoeyiń galmaraoakoa ar okoeyiń sontorkoa jemon ińakʼ kathako ańjomtiń? Onkoakʼ lutur do tepetʼgete bako ańjom ńameda. Probhu Isorakʼ katha onko lạgitʼ do mitʼṭecʼ henostage hoyakana; onare jãhãn rạskạge bako ńameda.

¹¹ Menkhan iń do Probhu Isorakʼ raṅgaoteń perecʼ akana; iń do ar bạń sambṛao daṛeakʼ kana. Probhu Isore meneda, “Am do kulhiren gidrạko cetanre ar mitʼ ṭhenko jarwa akan juạnko cetanre dulme. Onate bạhu ar jãwãe hõ onarekin sabokʼa, ar haṛamko ar ḍher haṛam hoṛ hõ rukhiyạ do ohoko ńamlea.

¹² Okoe disạmreko girobasokʼkan onko upạrte tinre sạjại reakʼ tiyiń rakaba unre eṭakʼkoakʼ tite onkoakʼ oṛakʼ-duạrko, khet baṛgeko ar onkoren era uruko hõko jimạkoa.

¹³ “Huḍińko khon hapṛakʼko hạbicʼ sanamkoge labko monejoṅ kana, nạbi ar naekeko hõ eṛeyakʼko kạmikana.

¹⁴ Onko do ińren hoṛkoakʼ ghạlkoko tolkatako kana okaṭakʼ do cetʼge baṅkan. Onkoko meneda, ‘suluk, suluk,’ menkhan suluk do sạrige bạnukʼanaṅ.

¹⁵ Onko do akoakʼ ona baṛicʼ kạmi iạte cetʼko lajaokʼ kana? Baṅa, onko do cetʼ lajaoge bạnukʼtakoa; onko do lajaokʼge bako baḍaea. Ona iạte onko do gurokʼko sãoteko gurokʼa. Ar tinreń sạjạikoa unre onko doko tawakʼ ńurokʼa. Iń Probhu Isorge noa katha doń meneda.”

¹⁶ Probhu Isor do acʼren hoṛko nonkae metakokana, “Dobạṭiạkore teṅgokate ńelpe ar sedae jug reakʼ suṛucʼ horko kulijoṅpe; bhage hor do okare menakʼa mente ar ona horte calakʼpe. Onate ape do apan ạpin jiwi lạgitʼ jirạupe ńama. Menkhan apepe meneda, ‘ale do ona horte bale taṛama.’

¹⁷ Ape cetanre pahradarko bahalkateń metatʼkoa, ‘sakwa reakʼ saḍe moneyakʼpe.’ Menkhan apepe meneda, ‘ale do bale moneyakʼa.’

¹⁸ Onate E jạt jạtrenko, ańjompe; ińren hoṛkoakʼ oka hoyokʼ ona ạribạndhipe.

¹⁹ E pirthimi, ańjomme, iń do hoṛko cetanre muhiniń paṛao ocoya; ona do onkoakʼ hudis joṅ reakʼ joge hoyokʼa, ente ińakʼ katha do bako ańjomleda ar ińakʼ ạn-ạri hõko nihạ̃t giḍiakada.

²⁰ E ińren hoṛko, Seba disạm khon oka kunduru hijukʼkan se sạṅgiń disạm khon oka soros boc hijukʼkan onate ińakʼ do cetʼ jạruṛ? Apeakʼ jeredokʼ samaṅokʼakʼko bạsutokʼakʼko do baṅkana; ar apeakʼ janwar dãṛẽteakʼko hõ bae kusi ocoyediń kana.”

²¹ Onate Probhu Isore meneda, “Noko hoṛ samaṅre iń do aema tạkʼkicʼakʼ iń dohoya. Apat ar hoponko onare mitʼ domteko tohodokʼa; aḍepaseren hoṛ ar gateko doko marao utạrokʼa.”

²² Probhu Isor do noa kathae meneda, “Ńelpe, utạr disạm khon mitʼ dol maraṅ lạṛhại phạdko hijukʼkana; pirthimi reakʼ ses simạna khon mitʼ maraṅ jạtrenko udgạu ocokʼkana.

²³ Onko ṭhen do akʼ sar ar borlom menakʼa; onko do kurmutạha ar bin dayakʼ hoṛ kanako. Sadomte decʼ hijukʼ jokhecʼ onkoakʼ sabad do jalapuri reakʼ hud hud saḍe leka; E Sionren hoponera, onko do amre jhãp em lạgitʼ lạṛhại bir lekako thạrakana.”

²⁴ Onko reaṅ khoborle ńamakada ar onate aleakʼ ti do lạbṛugokʼkantalea. Ale do hasotele thakao akana; bedonokʼkan maejiu lekage haso rakapʼ akawatʼlea.

²⁵ Nagraha bahrete alope oḍok calakʼa se kulhikore hõ alope dãṛãna, ente bạirikoakʼ tire do tarwaṛe menakʼa ar goṭage bạṛicʼ botor menakʼa.

²⁶ E ińren hoṛko, gõṛẽ kicricʼ horogpe ar torocʼre kunḍlạṅ baṛaepe. Sadher hoponakʼ gujukʼre cetʼleka hoṛko homor halaṅ onkage homor halaṅpe, ente jarkharicʼ do acʼkage abo cetanreye hijukʼa.

²⁷ Probhu Isore meneda, “Am do hoṛkoren biḍạu aṭkaricʼ iń doho akatʼmea jemon onkom biḍạu aṭkar daṛeakote onkoakʼ horkom ńel daṛeakʼ.

²⁸ Onko do jotoge huhulko kanako; onko do okta cintại lạgitʼko dãṛãbaṛaea. Onko do pitạl ar mẽṛhẽtʼ lekan kanako; ar jotogeko kharap caba akana.

²⁹ Seṅgelte sisạ jeredokʼ lạgitʼ cạpwạ do ạḍitetʼ hoeye emokʼkana; menkhan ạuṛiyakʼgeko galao saphakʼkana, ente bạṛicʼko do bako ocokʼ giḍikʼkana.

³⁰ Onko do nihạ̃t giḍiakan rupạ kanako, ente iń Probhu Isorge onko doe nihạ̃t giḍi akatʼkoa.”