Jirimiạ 52 - সান্তালী বাইবেল

Jerusalem lạnduṛokʼ reaṅ

¹ Sedekiạ do bargel mitʼ bochor umerre raje hoylena. Uni do Jerusalemre gelmitʼ bochor raje calaokeda. Uniren eṅgatakʼ ńutum do Hamutal tahẽkana; uni do Libna nagraha Jirimiạren hoponerae tahẽkana.

² Jehoyakim leka Sedekiạ do Probhu Isorakʼ mẽtʼre oka bạṛicʼakʼ onageye kạmiyetʼ tahẽkana.

³ Jerusalem ar Jihudạren hoṛko iạte Probhu Isor do edreteye jaljalaoena ar mucạtʼre acʼ samaṅ khon onkoe sạṅgiń giḍikatʼkoa. Tayomte Sedekiạ do Babelren raj upạrteye hulkeda.

⁴ Ona iạte uniyakʼ rajokʼ areakʼ bochor reakʼ gelakʼ cando reakʼ gelakʼ dinre Babelren raj Nebukadnesar do acʼren sanam lạṛhại phạdkoante Jerusalem upạrte lạṛhại lạgitʼe mohnḍayena. Onko do nagraha bahrereko ḍerayena ar nagraha beṛhaete pinḍhạkoe benaokeda.

⁵ Sedekiạ rajakʼ rajokʼ gelmitʼ bochor hạbicʼ nagraha do gherao esetʼge tahẽkana.

⁶ Ar ponakʼ cando reakʼ areakʼ dinre nagrahare akal iạte nonka hoyena, hoṛkoakʼ jomakʼ lạgitʼ cetʼge baṅ tahẽlena.

⁷ Tayomte nagraha pạcri reakʼ mitʼ jaegareko bhugạkʼkeda. ar Babelrenko do nagrahako gherao esetʼ akatʼ tahẽkanre hõ ńindạ jokhecʼ Jihudạren sanam lạṛhại phạdko do rajakʼ bagwan ṭhenakʼ banar pạcri reakʼ phaṭok duạrte nagraha khonko oḍokena ar Araba secʼko dạṛkeda.

⁸ Rajren sanam lạṛhại phạdko do acʼ ṭhen khonko begarente onko doko chirchạturena ar ona jokhecʼ Babelren lạṛhại phạdko do Sedekiạ rajko khudạu idikedea ar Jerikho reakʼ bilạn ṭạnḍireko sapʼ tiyokʼkedea.

⁹ Onko do Sedekiạko bondikedea ar Hamat disạm reakʼ Riblate Babelren raj ṭhenko idikedea ar onḍe do sạjạiye reakʼ hukumko emena.

¹⁰ Babelren raj do Riblare Sedekiạ samaṅrege uniren hoponko ar Jihudạren sanam rajkạmiyạko hõe gocʼketʼkoa.

¹¹ Ona tayom uni do Sedekiạwakʼ mẽtʼkine hoṭor totʼketʼtaea, ar pitạl reakʼ sikṛite tolkate Babelteye bondi idikedea ar uni ạuriye gujukʼ hạbicʼ jel khanareye dohokadea.

Mundil dhaṅdhaserokʼ kan

¹² Babelren raj Nebukadnesar rajokʼ gel areakʼ bochor reakʼ mõṛẽakʼ cando reakʼ gelakʼ dinre rajren rurukhiyạ dolren subedar hisạbte okoe do raje sapʼ soraekan tahẽkan uni Nebusaradan do Jerusalemteye hecʼena.

¹³ Uni do Probhu Isorakʼ oṛakʼre, raj oṛakʼre ar Jerusalem reakʼ joto oṛakʼre seṅgele jeretʼada. Ar asol asol oṛakʼko hõe jeretʼ giḍikada.

¹⁴ Rajren rurukhiyạ dolren subedar tabere Babelren sanam lạṛhại phạdko do Jerusalem reakʼ pạcri bhitko rạputʼkeda.

¹⁵ Ar okoeko reṅgecʼ hoṛ do nagrahare sarecʼko tahẽyen onko modren adomko ar sarecʼ kạrigolko ar okoe do Babel raj secʼko hoylen rurukhiyạ dolren subedar Nebusaradan do onko hõ bondikateye idiketʼkoa.

¹⁶ Menkhan darkha bagwan ńel todarot ar jumi cas lạgitʼ thoṛa reṅgecʼ hoṛko disạmreye doho oṭokatʼkoa.

¹⁷ Babelrenko do Probhu Isorakʼ oṛakʼ reakʼ pitạl reakʼ tham khunṭi kin, pitạl reakʼ ganḍoko ar pitạl reakʼ maraṅakʼ luihạ do rạputʼ khanḍa khunḍikate Babelteko idikeda.

¹⁸ Ona chaḍa onko do sanam ṭukucʼko, kạ̃ṛchũko, sultạ saphae reakʼ cimṭạko, belcako ar koejoṅ oṛakʼ reakʼ sekʼwa kạmi lạgitʼ eṭakʼ sanam pitạl reakʼ jiniskoko idikeda.

¹⁹ Rajren rurukhiyạ dolren subedar do sona se rupạte benaoakʼ bhajanko, seṅgel dohoy reakʼ celaṅko, bạṭiko, diuhe dohowakʼko, belcako, coḍor lạgitʼ loṭako ar eṭakʼ okako bhajan tahẽkan onako jotoko idikeda.

²⁰ Solomon raj do Probhu Isorakʼ oṛakʼ lạgitʼ okaṭakʼ barea tham khunṭi, maraṅ karahe ar ona latar reakʼ gelbar goṭecʼ pitạlren ḍaṅgrako ar okako bhajane benaoletʼ tahẽkan ona reakʼ sanam pitạlko do ojon daṛekokʼ khon hõ ḍherge tahẽkana.

²¹ Mimitʼ goṭecʼ khunṭi do gel irạl moka usul ar ona reakʼ beṛ do gelbar moka tahẽkana; mimitʼ goṭecʼ khunṭi reakʼ pitạl do pon kạṭupʼ dạriạ ar bhitri do kholge tahẽkana.

²² Mitʼṭecʼ khunṭi reakʼ muthni do mõṛẽ moka usul tahẽkana ar ona beṛhaete do pitạl reakʼ sikṛi ar pitạl reakʼ ḍạlim jokote sajao tahẽkana. Ar eṭakʼakʼ khunṭi hõ onkage tahẽkana.

²³ Pitạl reakʼ sikṛi beṛhaete do mitʼsae ḍạlim joko tahẽkana, menkhan samaṅ secʼ khon do eken aregel turui goṭecʼ ńelokʼkan tahẽkana.

²⁴ Jihudikoren maraṅ naeke Seruya, dosaricʼ naeke Sephaniạ ar pene pahradarko do uni rurukhiyạ dolren subedare bondi idiketʼkoa.

²⁵ Ar okoe do unhõ nagrahareko tahẽkan onko mod khon uni do birbão hoṛko cetanre bahal akade mitʼṭecʼ kạmiyạ hoṛ ar rajren eae goṭen sopolhakoe sapʼketʼkoa. Ona chaḍa subedarren olokʼicʼ, okoe do lạṛhại phạdre hoṛkoe bhoraoetʼko tahẽkan uni ar nagrahareko ńamen arhõ turuigel hoṛkoe sapʼketʼkoa.

²⁶ Subedar Nebusaradan do onko sanamkoe bondiketʼkote Riblate Babelren raj ṭhene idiketʼkoa.

²⁷ Ar raj do Hamat disạm reakʼ Riblare noko sanam hoṛkoe gocʼketʼkoa. Nonkate Jihudạren hoṛko bondikate apnarakʼ disạm khon sạṅgińteko idiocoyena.

²⁸ Nebukadnesar do okoe Jihudikoe bondi idiletʼko onkoakʼ lekha do hoyokʼ kana eae bochorre pe hajar bargel pe hoṛ,

²⁹ Nebukadnesarakʼ rajokʼ gel irạlakʼ bochorre Jerusalem khon irạl sae pegel bar goṭen Jihudiko;

³⁰ ar uniyakʼ rajokʼ reakʼ bargel pe bochorre rajren rurukhiyạ dolren subedar Nebusaradan do eae sae pongel mõṛẽ Jihudikoe idiletʼkoa. Onkoakʼ leka do jotote pon hajar turui sae tahẽkana.

Jehoyakin do chaḍaoe ńamketʼ

³¹ Jihudạren raj Jehoyakine bondi idi ocokʼre pe gel eae bochorre Ewil Merodak do Babelren raje hoyena. Uni do inạ bochor reakʼ gelbar cando reakʼ bargel mõṛẽakʼ dinre Jehoyakin do hajot khone aṛakʼkedea.

³² Uni do Jehoyakin sãote mońjteye galmaraokeda ar Babelre uni sãote ar okoe rajko tahẽkan onko khon hõ ḍher manotakʼ ṭhạ̃ireye duṛupʼkedea.

³³ Jehoyakin do jel khana reakʼ kicricʼe bocʼkeda ar jion reakʼ sarecʼ dinko do raj sãote jom ńũkateye paromkeda.

³⁴ Ar tinạkʼ din jiwetʼe tahẽkan unạkʼ din raj do din hilokʼ mitʼṭecʼ bhata lekae emaekan tahẽkana.