Jirimiạ 51 - সান্তালী বাইবেল

¹ Probhu Isore Meneda, “Ńelpe, Leb-Kamae, metakʼme Babel ar uniren hoṛko upạrte mitʼṭecʼ jarkhaokʼ hoe iń rakapʼ ocoya.

² Ar Babel do ekʼwer lạgitʼ ar uniyakʼ disạm jarkharokʼ lạgitʼ uni ṭhen bidisiạkoń kolkoa; onko do muhin hilokʼ beṛhae secʼ khon uni upạrteko teṅgona.

³ Babelren dhinkiạko do akoakʼ akʼ aloko ṭuniạutakoma se akoakʼ mẽṛhẽtʼ aṅgrop hõ aloko horogma. Uniren juạnko do alope aṛakʼkoa; uniren lạṛhại phạdko dope marao utạrkoa.

⁴ Onko do ghạl iạte Babel reakʼ hor horte gocʼ bhinḍạṛ akanko tahena.”

⁵ Israel ar Jihudạ do phạdkoren Probhu Isor do bae bạgi akatʼkinạ, Israel do uni sonoticʼ samaṅre acʼakʼ disạmre ghạṭteye perecʼ akada.

⁶ Ape do Babel khon dạṛjoṅpe. Ar apan ạpin jiwi rukhiyạitape. Uniyakʼ kại iạte alope maraokʼa. Probhu Isor do hala hạli reakʼ okte seṭer akantaea; uniyakʼ oka kuṛại ona doe ńamgea.

⁷ Babel do Probhu Isorakʼ tire mitʼṭecʼ sona reakʼ bạṭi leka tahẽkana; uni do goṭa dhạrtiye ńũ bul ocoleda. Jạt jạtrenko do uniyakʼ darkha rasako ńũleda, onate ńithõ onko do koṅkage menakʼkoa.

⁸ Babel do ackageye ńũrena are rạputʼ dhaṅdhaserena. Uni lạgitʼ homor halaṅpe. Uniyakʼ haso lạgitʼ ran ạguiype; pasere pase uni doe boge ruạṛokʼa.

⁹ Hoṛko mena, “Ale do Babel bogeye reakʼle kurumuṭuletʼgea, menkhan uni do bae bogelena. Dela, abo do uni bon bạgi oṭowaema ar apan ạpin disạmte bon ruạṛ calakʼma, ente uniyakʼ sạjại do coṭ hạbicʼ rakapʼ akana, ar rimil hạbicʼ seṭerakana.”

¹⁰ Probhu Isorren hoṛkan bon ona do uniye udukʼ akada; aboren Probhu Isor okae ceka akatʼ dela, ona do Sionre bon lại jạhirma.

¹¹ Ape do apeakʼ sarko lasertape, ar ḍhalko hatao joṅpe. Probhu Isor do Madaeren rajkoakʼ jiue uskur akatʼtakoa, ente bạiriko upạrte uniyakʼ monejoṅakʼ do jarkharakʼge. Probhu Isor do khạṭige acʼakʼ oṛakʼ lạgitʼe hala hạlikʼa.

¹² Babelre jhãp em lạgitʼ mitʼṭecʼ nisạn rakabtape. Rurukhiyạ dolko do arhõ daṛeanko hoyocokope, pahrako dohokope, danaṅ ṭhạ̃ire lạṛhại phạdko sapṛao dohokope. Probhu Isor do Babelren hoṛko upạrte acʼakʼ monsubạ ar hukum lekageye kạmiya.

¹³ E Babel, am do ḍher dakʼ aṛerem thamgạḍi akana ar ḍher dhonem ạidạri akawana; amakʼ ses do seṭerakana, ar am kamanme reakʼ okte hõ seṭerakana.

¹⁴ Phạdkoren Probhu Isor do acʼakʼ ńutumte kiriạkateye meneda, “Iń do khạṭige mitʼ jhãk pohoko leka hoṛkote amiń perecʼmea, ar am cetanre jitạukʼ reakʼ iń andoṛa.”

¹⁵ Probhu Isor do acʼakʼ daṛete dhạrtiye sirjạu akada, ar acʼakʼ ạkiltege pirthimi reakʼ rehetʼe bạisạu akada ar uniyakʼ bujte sermae pasnao akada.

¹⁶ Uniyakʼ hukumte serma reakʼ dakʼ do chilkibilkikʼ kana; uni do dhạrti reakʼ ses simạna khon rimile rakapʼ ạguyetʼkana. Uni do dakʼ lạgitʼe bijli ocoyeda ar acʼakʼ murại khon hoeye oḍok ạguiyeda.

¹⁷ Sanam manwage bin ạkilan ar bebuj kanako; mimitʼ sonhar do akoren boṅga muṭhạn iạteko lajao ocokʼa. Uniren dul boṅga muṭhạnko doko ạuṛiyakʼgea, onkore do sahẽtʼge bạnukʼa.

¹⁸ Onako do ạuṛiyakʼgea, lajao ocokʼakʼ jiniskangea; bicạr hilokʼ onako do marao utạrokʼa.

¹⁹ Jakob reakʼ bakhra do noako leka do baṅkana, ente unige sanamakʼ jinisko reakʼ sisirjạuicʼ kanae, ar Israel do uniyakʼ sompotti kana. Uniyakʼ ńutum do phạdkoren Probhu Isorge.

²⁰ Probhu Isore meneda, “E Babel, am kangeam ińakʼ lạṛhại reakʼ mutạk, am kangeam ińakʼ lạṛhại reakʼ khanḍa bhanḍa; am hotetege jạtrenkoń chaka chun akatʼkoa, ar am hotetege rajosṭikoń marao giḍiakada;

²¹ am hotetege sadomko ar aswarikoń chaka chun akatʼkoa, am hotete rãt gạḍiko ar rãt gạḍi cakʼlaokoń marao utạr akatʼkoa;

²² am hotetege iń do herel ar maejiukoń chirchạtur akatʼkoa, am hotetege haṛamko ar bale gidrạkoń chirchạtur akatʼkoa, am hotetege juạn ar juạnikoń chaka chun akatʼkoa;

²³ am hotete iń do gukʼpiko ar bhiḍi palkoń chaka chun akatʼkoa, am hotetege casokʼko ar ḍaṅgrakoń chaka chun akatʼkoa, am hotete disạm cakʼlaoko ar rajkạmiyạkoń chaka chun akatʼkoa.”

²⁴ Probhu Isore meneda, “Babel ar Baelre tahenko Sionre oka behokakʼko kạmiakatʼ onko do apeakʼ mẽtʼ samaṅrege kuṛạiyiń emakoa.”

²⁵ Probhu Isore meneda, “E jarkharicʼ buru, am do goṭa dhạrtiren makʼraoicʼ kanam; iń do am upạrte minạńa. Iń do am upạrte ińakʼ tiyiń tiạra ar cạṭạni khoniń kunḍlạń ńurhạmea ar am do mitʼṭecʼ lo ceḍe buru lekań hoyocomea.

²⁶ Hoṛko do konac reakʼ dhiri lạgitʼ am khon do bako hataoa, ar rehetʼ bạisạu lạgitʼ hõ bako hataoa; am do jaejug ujạṛ utạrakʼgem hoyokʼa.

²⁷ “Ape do disạmre nisạn rakabtape. Ar jạt jạtrenko upạrte siṅgạ oroṅpe. Uni upạrte lạṛhại lạgitʼ jạtrenko sapṛao dohokope; uni upạrte Ararot, Mini ar Askenasren rajko hohoakope. Uni upạrte mitʼṭen subedar bahalepe; ar sobotʼ sobotʼ pohoko leka ạḍi utạr sadom kolkope.

²⁸ Uni upạrte lạṛhại lạgitʼ jạtrenko, Madaeren rapajko, onkoren disạm cakʼlaoko ar sanam rajkạmiyạko ar onkoren ḍanṭaoko tabere sanam rajosṭiko sapṛaope.

²⁹ Disạm do daldalaokʼ kana ar mocṛa mucṛikʼ kana, ente Babel do ujạṛokʼakʼ hoeocoy lạgitʼ Probhu Isorakʼ oka goṭawakʼ ona do ṭhik dohoakana.

³⁰ Babelren birbanṭako do lạṛhạiko thirakana; onko do akoakʼ gaṛrege menakʼkoa. Onkoakʼ daṛe do ńurentakoa; ar maejiuko lekako nijor akana. Onkoakʼ tahen ṭhạ̃i do seṅgelteko jeretʼ akatʼtakoa; Babel reakʼ sanam phaṭok duạr reakʼ huṛkạṛko do rạputʼ ocoakana.

³¹ Khoboricʼ do eṭakʼ khoboricʼ daram, goḍet do eṭakʼ goḍet dakʼrame calakʼ kana, Babelren raj ṭhen lại saḍe lạgitʼ, baṅma uniyakʼ goṭa nagraha do hatena,

³² uniyakʼ gaḍa paromokʼ ghaṭko hõ dokhol akana, pạṭiol birre seṅgelko lagao akada ar lạṛhại phạdko do ạḍi botor caṛhao akatʼkoa.”

³³ Iń phạdkoren Probhu Isorgeń meneda, “Babel kuṛi do phosol enokʼ jokhecʼ reakʼ khạrại lekageye hoyakana; ar phosol samṭao leka uni samṭaoe reakʼ okte do usạrage hijukʼa.”

³⁴ Jerusalemren hoṛko meneda, “Babelren raj Nebukadnesar do aboe utʼ akatʼbona, abo doe chaka chun akatʼbona, ar eken kanḍa lekae hoyocoakatʼ bona. Danob leka uni doe utʼ akatʼbona ar aboakʼ bhage bhage jomakʼ do lacʼ bicʼe jomakada, ar tayomte do haḍapʼ siṭhạ akatʼ jaṅ lekae giḍi sạṅgiń akatʼ bona.”

³⁵ Sionren hoṛko meneda, “Aleakʼ hoṛmo cetanre oka santao hoyakana ona do Babel cetanre hoyokʼma. Babelre okoeko girobasokʼ kan onko do aboakʼ mãyãm reakʼ dạyiko tahenma.”

³⁶ Ona iạte Probhu Isore meneda, “E Jerusalem, iń doń am sejokʼa ar am huyạteń hala hạlikʼa; uniyakʼ jalapuri doń rohoṛtaea ar sanam bhumbuk koń ańjetʼ ocoytaea.

³⁷ Babel do ujạṛ akatʼ ḍạṅge hoyokʼa, toyokoakʼ tahen ṭhạ̃ige hoyokʼa ar landa-dhutʼakʼ ṭhạ̃i hõ. Onḍe do celege bako girobasokʼa; uniyakʼ dosa ńelte hoṛ doko torasokʼa.

³⁸ Uniren hoṛko do jotoge dhạcri kul lekako hạnḍrạukʼa, dhạcri kul hopon lekako gõ gõkʼa.

³⁹ Onkoko jaljalaolenre iń do mitʼṭecʼ bhojiń teara. Ar onkoń bul ocokoa jemonko rạskạ daṛeakʼ, ar ona tayom do jaejug lạgitʼko jạpitʼjoṅa, ar tisge bako ebhenokʼa.

⁴⁰ Bhiḍi hoponko leka, bheḍako leka ar merom bodako leka iń do gurko reakʼ ṭhạ̃iteń tiyạkʼ idikoa.

⁴¹ “Sesak, metakʼme Babel do cetʼ leka dokholokʼa! Goṭa dhạrtiren sarhaoańicʼren hopon hõ cetʼ lekae ạidạri ocokʼa! Babel ńelte jạtrenko doko torasokʼa.

⁴² Babel cetanre jalapuri do rakapʼ hijukʼa, uniyakʼ haḍak ḍabak ḍheoko do uniye unumea.

⁴³ Uniyakʼ nagrahako do marao utạrokʼa. Onako do khaṅgoṭokʼa ar hahaṅkar disạm leka hoyokʼa; ona disạmre do okoehõ bako tahena, ar ona talate okoehõ bako calao hijukʼa.

⁴⁴ Iń do Babelren Bel debotań sạjạiyea ar uni okae utʼ akatʼ ona doń becʼ oḍok ocoyea. Jạt jạtrenko do uni ṭhen ạtukʼ dakʼ leka ar bako calakʼa. Ar Babel reakʼ pạcri bhit hõ dạsuṛokʼa.

⁴⁵ “E ińren hoṛko, Babel khon oḍok hijukʼpe. Apan ạpin jiwi rukhiyạitape. Probhu Isorakʼ jolokʼkan edre khon ńir pharakokʼpe.

⁴⁶ Tinre aema kathako unạnokʼa unre alom hadosokʼa se alom botorokʼa; mitʼ bochorre mitʼṭecʼ katha unạnokʼa ar eṭakʼ bochorre ar mitʼṭecʼ katha unạnokʼa. Ona unạnokʼ katha do kana, Babelre santao hoyokʼkana ar mitʼ disạmren cakʼlaoyicʼ do eṭakʼ disạmren cakʼlaoyicʼ upạrteye teṅgonkana.

⁴⁷ Nonkan okteko khạṭige hijukʼ kana iń do Babelren boṅga murhutʼkoń sạjạikoa; uniyakʼ goṭa disạmge lajaoakʼ hoyokʼa ar uniren gocʼ ocokʼ hoṛ do ona talareko gurokʼa.

⁴⁸ Serma, ot ar onako tala reakʼ sanamakʼge Babel iạteko hulạs rạskạkʼa, ente makʼraoko do utạr secʼ khon hecʼkate unire jhãpko ema. Iń Probhu Isorge noa katha doń meneda.

⁴⁹ Babel iạte goṭa dhạrtiren hoṛko cetʼlekako gocʼlen onkage Israelkoakʼ gujukʼ hotete Babelrenko hõko gocʼ ocokʼa.

⁵⁰ Ape okoe do gujukʼ reakʼ ti khon rukhiyạpe ńamakatʼ dela hijukʼpe, alope biloma. Sạṅgiń disạmre tahenrege Probhu Isor disạiyepe ar Jerusalem reaṅ dạndikʼpe.

⁵¹ “Apepe meneda, ‘ale babotre henosta kathale ańjom akatʼte ale dole lajao ocoakana. Lajao do aleakʼ mẽtʼãhãe betʼ akatʼtalea, ente Probhu Isorakʼ oṛakʼ reakʼ sonot ṭhạ̃ikore bidisiạkoko bololena.’

⁵² Menkhan ińiń meneda, dinko hijukʼ kana iń do Babelren boṅga muṭhạnkoń sạjạikoa ar Babel reakʼ sanam ṭhạ̃ire ghạl akan hoṛ doko hae haeyokʼa.

⁵³ Babel do serma hạbicʼe usullenre hõ ar onḍe kajak aotan gaṛpe benaolerehõ, enhõ iń do uni upạrte jarkharicʼ iń kolea.”

⁵⁴ Babel khon rakʼ ańjomokʼ kana, Babelrenkoakʼ disạm khon do maraṅ okocʼ ḍhao maraokʼ reakʼ andoṛge ańjomokʼ kana,

⁵⁵ ente Probhu Isor do Babele ḍahao maraoa; uni do ona reakʼ botor andoṛe thir ocoya. Bạiriko do lạṭu lạṭu ḍheoko leka haḍak ḍabakko hijukʼa; ar onko do ãṭ aṛaṅteko hohoea.

⁵⁶ Babel upạrte jarkharkoko hijukʼa; uniren birbão hoṛ doko sapʼ ocokʼa ar onkoakʼ akʼ do rạpudokʼtakoa; ente Probhu Isor do hala hạliren Isor kanae; Babel reakʼ kuṛại do purạtegeye emaea.

⁵⁷ Okoeyakʼ ńutum do phạdkoren Probhu Isor kan uni raje meneda, “Iń do uniren rajkạmiyạko, ạkilan hoṛko, disạm cakʼlaoko, cetan hudạren kạmiyạko ar birbão hoṛkoń bul ocokoa. Onko do jaejug lạgitʼko jạpitʼjoṅa; ar bako ebhenokʼa.

⁵⁸ Babel reakʼ moṭa pạcri rạputʼkate soman ocokʼa ar ona reakʼ usul phaṭok duạrko do seṅgelte ḍahao maraokʼa. Hoṛko do ạuṛiyakʼgeko laṅga ocokʼa, ar jạt jạtrenkoakʼ khaṭaokʼ reakʼ kuṛại do seṅgelte lo roṅgo cabakʼa.”

⁵⁹ Jihudạren raj Sedekiạwakʼ rajokʼ ponakʼ bochorre Maseyarren goṛomtetʼ koṛa, metakʼme Neriạ hopon Seray okoe do rajren kạmiyicʼe tahẽkan, uni do tinre raj sãote Babelteye senlena unre Jirimiạ do thoṛa hukume emade tahẽkana.

⁶⁰ Babel cetanre okako muhin hijukʼ, metakʼme Babel reaṅ okako katha ol hoylen Jirimiạ do ona mitʼṭecʼ guṛhạ puthireye ol doholeda.

⁶¹ Jirimiạ do Seraye metadea, “Am do tinre Babelrem seṭerokʼa unre hoṛko noakom paṛhao ańjomakoa.

⁶² Ar ona tayomem mena, ‘E Probhu Isor, am do niạ ṭhạ̃i marao reakʼ katham meneda, onate manwa se janwar okoe hõ celege bako basokʼa; noa do jaejug lạgitʼ ujạṛ akange tahena.’

⁶³ Niạ puthi paṛhao sạtkate onare mitʼṭecʼ dhiri tolkate phurạt gaḍare giḍiyme.

⁶⁴ Ona tayomem mena, ‘Nonkage Babel hõ unumokʼa, ar baṅ rakapʼa, ente Probhu Isor do ona cetanre muhine ạguiya. Uni doe marao utạrokʼa.’ ” Jirimiạ reakʼ katha do nonḍege mucạtʼena.