Jirimiạ 50 - সান্তালী বাইবেল

Babel hatokʼ reaṅ

¹ Babel, metakʼme Babelrenkoakʼ disạm reaṅ Jirimiạ nạbi hotete Probhu Isor do noa kathae menleda,

² “Ape do jạt jạtrenko ṭhen porcarpe ar lại jạhirpe, nisạn teṅgoepe ar lại jạhirpe. Danaṅ do cetʼge alope dohoya, bickom menpe, ‘eṭakʼko do Babelko ạidạrijoṅa; Bakʼal deboda doe lajao ocokʼa, Merodok debota doe chaka chun ocokʼa. Babelren boṅga murhutʼko doko lajao ocokʼa ar uniren boṅga muṭhạnko hõko chaka chunokʼa.’

³ Utạr khon mitʼ jạtrenko do uni upạrteko hijukʼa ar uniyakʼ disạm do ujạṛakʼko hoeocoya. Okoe hõ onare do bako girobasokʼa; manwa hõ ar janwar hõko dạṛjoṅa.

⁴ Onako dinre ar ona jokhecʼ Israel ar Jihudạren hoṛko do mitʼteko hijukʼa ar rakʼ rakʼteko hijukʼa ar onkoren Probhu Isorko ńam baṛayea.

⁵ Onko do Sionte calakʼ reakʼ horko kukʼliya ar ona secʼ akoakʼ mẽtʼãhãko samaṅtakoa. Onko do hecʼkate Probhu Isor sãote nonkan mitʼṭecʼ bondobosko bandhaoa one ona do tishõ baṅ hiṛińokʼ.

⁶ “Ińren hoṛ do atʼ akan bhiḍiko lekako hoyakana; onkoren gukʼpiko do bạṛicʼ horteko ghańjeṛ idi akatʼkoa. Onko gukʼpiko iạte onko do buru burukore ar boṭkocʼ boṭkocʼko calakʼkana ar akoakʼ chaṛko hiṛińakada.

⁷ Ar jãhãege onkoko ńametʼko onkogeko tạhuṛetʼkoa; onkoren bạiriko meneda, ‘ale do dusi dole baṅkana, ente Probhu Isor upạrte, onkoakʼ sạriyakʼ reakʼ ạtiń ṭạnḍi upạrte, onkoren hapṛamkoren asicʼ uni Probhu Isor birudre onko doko kại akada.’

⁸ “E Israelko, ape do Babel khon dạṛjoṅpe; Babelrenkoakʼ disạm bạgiyakʼpe ar pal laha lahate calakʼkan merom bodako leka hoyokʼpe.

⁹ Iń do utạr reakʼ disạm khon maraṅ maraṅ jạtrenkoń jarwakoa ar onkoń buskukote Babel upạrteń ạgukoa. Onko do Babel upạrte lạṛhại phạdko sapṛaokoa ar onako ạidạrijoṅa. Onkoakʼ sar do gạkhuṛ birbão hoṛko leka baṅ ạuṛiyagokʼtakoa.

¹⁰ Babel doe luṭ ocokʼa; ar okoe uniyakʼko luṭ idiy onko do jotogeko tirpitokʼa. Iń Probhu Isorge noa katha doń meneda.

¹¹ “E Babelrenko, ape do ińakʼ ạidạripe luṭ akawana ar onatepe rạskạkʼ kana, arpe kusikʼ kana. Ape do phosol enokʼkan mĩhũ lekape don baṛaekana ar khacaṛ sadom lekape hinhạukʼ kana;

¹² ona iạte aperen eṅgat do ạḍiye lajao ocokʼa; okoeye janam akatʼpe uni doe lajao ocokʼa. Jạt jạtrenko ṭhen joto khone copotʼ ocokʼa; uni do mitʼṭecʼ hahaṅkar, khaṅgoṭ ar khaṅkar ṭhạ̃igeye hoyokʼa.

¹³ Probhu Isorakʼ edre iạte okoehõ onare do bako girobasokʼa, ona do ujạṛ utạrakʼ ṭhạ̃ige hoyokʼa. Ar Babel aṛete okoeko parom calakʼ onko jotogeko torasokʼa ar uniyakʼ sanam duk iạteko landa-dhutʼaea.

¹⁴ “E dhinkiạko, ape do jotoge lạṛhại lạgitʼ Babel beṛhaete teṅgokʼpe. Uni secʼ sar tuńpe. Okaṭakʼ sar hõ alope mãyãwakʼa, ente uni do Probhu Isor birudreye kại akada.

¹⁵ Uni beṛhaete uni upạrte lạṛhại reakʼ andoṛpe. Uni doe bhagao ocoakana, uniyakʼ rurukhiyạ bebosta do rạputʼ akana ar uniyakʼ pạcri do lạnduṛ akantaea. Probhu Isor do uni cetanreye hala hạlikʼkana, ape hõ halawaepe. Eṭakʼko cetʼ lekae ceka akawatʼko ape hõ uni onkawaepe.

¹⁶ Babelre okoe do itạko erokʼkan ar okte nạpitreko irokʼkan onko mitʼmitʼko do maraokope. Sasantaokoakʼ tarwaṛe reakʼ botorte mimitʼko do akoren hoṛ ṭhenko ruạṛ calakʼa, ar mimitʼko do akoakʼ disạmteko dạṛjoṅa.

¹⁷ “Israel do chirchạtur akan bhiḍi palko leka kanae one dhạcri kule laga akade. Pạhilre Ạsurren raj do uniye jomkedea; ar mucạtʼre Babelren raj Nebukadnesar do uniyakʼ jaṅkoe tạhuṛketʼtaea.

¹⁸ Ona iạte iń phạdkoren Probhu Isor do Ạsurren raj cetʼ lekań sạjạilede onkage Babelren raj ar uniyakʼ disạmre hõ sạjạiyiń ạguiya.

¹⁹ Menkhan Israel do acʼakʼ ạtiń ṭạnḍiteń ruạṛ ạguiyea uni do Karmel ar Basanreye ạtińa; Ephrayim ar Gilead reakʼ burukore acʼakʼ jiwiye tirpit ocoytaea.

²⁰ Onako dinre ar onako oktere Israel reakʼ ghạṭko ńam baṛakʼa menkhan mitʼṭecʼ hõ baṅ ńamokʼa, ar Jihudạ reakʼ kạiko hõ ńam baṛakʼa menkhan mitʼṭecʼ hõ baṅ ńamokʼa, ente jiwetʼ okoyiń dohoko onko doń ikạkoa.

²¹ “E Babelren bạiriko, iń Probhu Isorgeń meneda, ape do Merathaim disạm ar okoe do Pekodreko tahenkan onko upạrte rakapʼ senokʼpe. Ape do onko laga ńirkope, ar gocʼkope ar marao utạrkope; ar apeń hukum akawatʼpe reakʼ mitʼke mitʼ palonpe.

²² Disạmre lạṛhại ar maraṅ dhaṅdhaserokʼ reakʼ saḍe ańjomokʼ kana.

²³ Goṭa dhạrti reakʼ hạtuṛ do rạputʼ kạtra kuṭrạyena. Babel reakʼ dosa ńelte sanam jạtren hoṛ doko ṭhak utạrena.

²⁴ E Babel, iń do am lạgitʼ mitʼṭecʼ jhạliń oḍao akada ar begor baḍaete onarem jhạli akana; am dom ńamakana ar sapʼ hõm sapʼ ocoakana, ente am do iń upạrtem teṅgolena.

²⁵ Ińakʼ khanḍa bhanḍa reakʼ oṛakʼ jhicʼkate ińakʼ edre reakʼ khanḍa bhanḍakoń oḍok ạguiya, ente phạdkoren Probhu Isor do Babelrenko upạrte mitʼṭecʼ kạmi reakʼ menakʼtaea.

²⁶ E Babelren bạiriko, ape do sạṅgiń khon uni upạrte hijukʼpe. Uniyakʼ murạiko jhijtaepe; jarwa akatʼ anaj leka puńjiyepe. Ar purạte marao utạrepe, uniyakʼ cetʼge sarecʼ alope dohoytaea.

²⁷ Uniren sanam ḍaṅgrako gocʼkope; onko do gocʼko lạgitʼko idi ocokʼma. Hae, onko do sạjạiyokʼ reakʼ dinge paṛao akatʼkoa.”

²⁸ Ańjompe, Babel khon ńir paskao akan hoṛkoakʼ aṛaṅ do Sionre hecʼkateko lại jạhiretʼkana, aboren Probhu Isor do cetʼleka acʼakʼ oṛakʼ iạteye hala hạlikʼ kana.

²⁹ Probhu Isore meneda, “Babelrenko birudre sanam dhinkiạko hoho jarwakope. Ona beṛhaete lạṛhại phạdkoakʼ ḍera benaope; okoehõ alope dạṛ ocokoa. Uniyakʼ kạmi reakʼ kuṛại ńam ocoyaepe. Uni okalekae ceka akatʼ ape hõ unire onkage kạmipe, ente uni do Probhu Isor upạrte, Israelren uni sonoticʼ upạrte apnarteye maraṅokʼ kana.

³⁰ Ona iạte uniren juạnko do nagraha reakʼ kulhi ar dobạṭiạkoreko gocʼ ocokʼa; ar enhilokʼ uniren sanam lạṛhại phạd doko marao ocokʼa.

³¹ Iń phạdkoren Probhu Isorgeń meneda, E bạḍạiyicʼ, ńelme, am birudrege minạńa, ente sạjại ńam reakʼ din do seṭer akantama.

³² Uni bạḍạiyicʼ doe sombotʼ bhindạṛokʼa ar berede lạgitʼ do celege bako goṛowaea; uniyakʼ nagrahakore seṅgeliń junḍiyakʼa, ar beṛhaeteakʼ jotowakʼ doń jeretʼ giḍikataea.”

³³ Phạdkoren Probhu Isore meneda, “Israel ar Jihudạren hoṛ doko santao ocokʼkana. Okoe onkoko sapʼakatʼko onko jotoge kajakteko sapʼ dohoakatʼkoa, ar bako sen ocoako kana.

³⁴ Menkhan onkoren chakʼḍaoicʼ doe daṛeangea; uniyakʼ ńutum do phạdkoren Probhu Isorge. Uni do onkoakʼ mamblae calaotakoa jemon onkoakʼ disạmre suluke ạgui ar Babelren hoṛkoe ḍamaḍol ocoko.”

³⁵ Probhu Isore meneda, “Babelrenko upạrte, uniren hoṛko upạrte ar uniren cetan hudạren kạmiyạko ar ạkilan hoṛko upạrte tarwaṛe do menakʼgea.

³⁶ Uniren bhonḍ nạbiko upạrte hõ tarwaṛe menakʼa; onko do lelhako hoyokʼa. Uniren birbão hoṛko upạrte hõ tarwaṛe menakʼa; onko do botor caṛhaoakoa.

³⁷ Uniren sanam sadomko, rãt gạḍiko ar bidisiạ lạṛhại phạdko upạrte hõ tarwaṛe menakʼgea; onko do maejiu lekako nijorokʼa. Uniyakʼ dhon duribko upạrte hõ tarwaṛe menakʼgea; onako do luṭ idikʼtaea.

³⁸ Akalte uniyakʼ sanam dakʼko ańjedokʼa, ente ona do boṅgakoakʼ disạm kana, ar onko boṅgako do onḍenko hoṛko koṅka ocokoa.

³⁹ “Ona iạte hahaṅkarren jiwiyanko, toyoko ar ũṭ cẽṛẽko do onḍeko tahena. Onḍe do cele hoṛge bako tahena, herelko hõ baṅ ar maejiuko hõ bako berelokʼa.

⁴⁰ Ar beṛhaeteakʼ atoko sudhạ cetʼ leka Sodom ar Gomorań ḍahao maraoletʼ, onkage onḍe do celege bako girobasokʼa; ar onare cele manwage bako tahena. Iń Probhu Isorge noa katha doń meneda.

⁴¹ “Ńelpe, utạr disạm khon mitʼ dol maraṅ lạṛhại phạdko hijukʼkana; pirthimi reakʼ ses simạna khon mitʼ maraṅ jạtrenko ar aema rapajko udgạu ocokʼkana.

⁴² Onko do akʼ sar ar tarwaṛe sasapʼko kanako; onko do kurmutạha ar bin dayakʼ hoṛ kanako. Sadomte decʼ hijukʼ jokhecʼ, jalapuri reakʼ hud hud saḍe leka onkoakʼ sabad do; E Babel kuṛi, onko do lạṛhại reakʼ sajbajte amre jhãp em lạgitʼko hijukʼkana.

⁴³ Babelren raj do onko babotre khobore ańjom akada ar uniyakʼ ti do lạbṛukʼ akantaea. Ar bedonokʼkan maejiu lekage haso rakapʼ akawadea.

⁴⁴ Jordan reakʼ bir khon cetʼleka dhạcri kul do mońj ạtiń ṭạnḍire sikạr lạgitʼe oḍokʼ hijukʼ onkage mitʼ ripitʼre Babelrenko do akoakʼ disạm khoniń laga ńirkoa. Onḍe do ińren bachao akan hoṛkoń bahalkoa. Iń lekanicʼ do okoe menaea? Ar iń upạrte do okoeye teṅgo daṛekokʼa? Jãhãe gukʼpiyicʼ do cetʼ iń samaṅreye teṅgo daṛekokʼa?”

⁴⁵ Onate Probhu Isor do Babel upạrte okae goṭa akatʼ, ar Babelren hoṛko upạrte okae pontha akatʼ ona ańjompe. Palren kạṭicʼ hoponko hõko or idi ocokʼa; ar onkoakʼ kạmi khạtirtege ạtiń ṭạnḍi doe maraoa.

⁴⁶ “Babel do dokhol akana.” Noa reakʼ saḍete dhạrti do dal dalaokʼa; ar jạt jạtrenko talare uniyakʼ rakʼ reakʼ aṛaṅ ańjomokʼa.