Jirimiạ 5 - সান্তালী বাইবেল

Dhorom do okoehõ bạnukʼkoa

¹ Probhu Isore meneda, “Jerusalem reakʼ ḍaharkore onte note ńir baṛaepe ar beṛhaete beṅgetʼ ạcurpe. Onḍenakʼ nagraha reakʼ haṭ bajarkore khoj hataope. Ńelpe, nonkan jãhãepe ńamea se baṅa okoe do dhorom ar sạriyakʼreye dãṛãnkan enḍekhan iń do ona nagrahań ikạkakʼa.

² Ar onkoko men, ‘jiwetʼ Probhu Isor ńutumteń kiriạkʼ kana,’ enhõ onko do eṛe eṛeko kiriạkʼ kana.”

³ E Probhu Isor, am do cetʼ sạriyakʼ bam beṅgetʼakʼ kana? Onkom hạ̃nletʼkore onko do cetʼ baṅ hasoletʼkoa; ar onkom sumạrletʼkore hõ onko do bako sudhrạulena. Onkoakʼ mẽtʼãhã do dhiri khon hõ bạ̃ṛtiko keṭecʼketʼtakote kastaokʼ hõ bako aṅgocleda.

⁴ Iń doń hudisleda, “Onko do nacar arko lelhagea, ente onko do Probhu Isorakʼ hor ar akoren Isorakʼ ạn-ạri bako baḍaea.

⁵ Onatege iń do mukhiyạko ṭheniń senokʼa ariń galmaraoakoa; onko do khạṭige Probhu Isorakʼ hor ar akoren Isorakʼ ạnko baḍaegea.” Menkhan onko do mitʼdomte arãṛ rạputʼkate tonolko topakʼ akada.

⁶ Ona iạte bir khon mitʼṭen dhạcri kul do oḍok hecʼkate onkoe gocʼkoa. Ar hahaṅkarren mitʼṭen hunḍạr doe maraokoa ar onkoakʼ nagraha ṭhen mitʼṭen tạrupʼ do tãṛãkʼ akane tahena. Ar jãhãege onḍe khonko oḍokokʼ onko doe or cirạkoa, ente onkoakʼ ghạṭ do ḍhergea ar bạṛicʼ horte calakʼ reakʼ ghoṭna hõ maraṅgetakoa.

⁷ Probhu Isore meneda, “E Jerusalem, am do cedakʼ iń ikạmea? Amren hoponko doko bạgi giḍiakadińạ ar okoe do Isorko baṅkan onkoakʼ ńutumteko kiriạkʼ kana. Iń do onkoakʼ jạruṛokʼakʼ jotowakʼ iń purun akatʼtakore hõ, enhõ onko doko laṭghaṭ akada ar kusumbikoakʼ oṛakʼte gad gadko calaoena.

⁸ Onko do lacʼ bi jomakatʼ bandhar sadomko leka eṭakʼkoren bạhu tulucʼ giticʼ midokʼ lạgitʼko hinhạuakokan tahẽkana.

⁹ Iń Probhu Isorgeń kulikana, niạ iạte onko do cetʼ bạń sạjạikoa? Nonkan jạtrenko upạrte iń do cetʼ bạń hala hạliya?

¹⁰ “Ape do Jerusalem reakʼ darkha bagwan talate sen paromokʼpe ar onako maraope menkhan purạte do alope nosṭo caba utạra. Ona reakʼ dạṛko hese giḍikakʼpe, ente noko do Probhu Isorren doko baṅkana.

¹¹ Israel ar Jihudạren hoṛko do ińre ạḍitetʼ bepạtiạranko hoyakana. Iń Probhu Isorge noa katha doń meneda.”

¹² Onko do Probhu Isor reaṅ eṛeakʼgeko roṛeda. Onko doko meneda, “Uni do cetatgeye baṅkana. Aboakʼ jãhãn loksan do baṅ hoyokʼ tabona; abo do tishõ lạṛhại ar akal do babon ńela.

¹³ Nạbiko do hoe lekako hoyakana; onkore Isorakʼ katha do bạnukʼa. Onate onko okako men ona do onkorege hoyokʼa.

¹⁴ Onatege phạdkoren Probhu Isor do nonkae meneda, “Hoṛko niạko menetʼte amakʼ mocare ińakʼ katha do seṅgel lekań hoeocoya ar noko hoṛ do kaṭ lekań hoyocokoa; ar ona seṅgel do onkoe jomkoa.”

¹⁵ Probhu Isore meneda, “E Israel jạtrenko, am upạrte sạṅgiń disạm khon mitʼ jạtrenkoń ạgukoa. Onko do sedae jugren ṭikạu akan jạtrenko kanako; onko hoṛkoakʼ pạrsi do bape baḍaea ar onkoakʼ katha hõ bape bujhạu daṛeakʼa.

¹⁶ Onkoakʼ sar ṭhoṅga do jhicʼ akatʼ kobor leka; onko jotoge daṛean bir kanako.

¹⁷ Onko do apeakʼ phosol ar jomakʼko jomtapea, aperen hopon ar hoponerakoko jomkoa; onko do aperen bhiḍi-merom-ḍaṅgra palko jomkoa, ar apeakʼ sanam darkha bagwan ar loa dareko jom cabaetapea. Ar okaṭakʼ gaṛ nagraharepe bhorsakʼkan ona do tarwaṛeteko dhaṅdhasera.”

¹⁸ Probhu Isore meneda, “Enhõ onako dinre purạte do bạń dhaṅdhasera.

¹⁹ Tinre hoṛko kulimea, ‘aboren Probhu Isor do abore cedakʼ nonkae kạmikeda?’ Unre onkom metakoa, ‘cetʼleka iń bạgikate apeakʼ disạmre debotakope sewawako kan onkage okaṭakʼ disạm apeakʼ baṅkan ona disạmre senkate ńit ape do bidisiạkope sapʼsorakoa.’ ”

²⁰ Probhu Isor do Jakob bõsrenko niạ katha lạiyako ar Jihudạ ṭhen niạ katha jạhirako lạgitʼe meneda,

²¹ “E lelha ar bebuj hoṛko, okoe do mẽtʼ tahen tulucʼ bape ńeńelkan, lutur tahen tulucʼ bape ańjomkan, ape do luturakʼtińpe.

²² Iń do cetʼ bape botorạń kana? Iń samaṅre cetʼ bape thar tharaokʼ kana? Ińge jaejug reakʼ mitʼṭecʼ bondobos lekate gitilte doreão reakʼ simạnań ṭhik dohoakada, jemon jalapuri do ona bae parom daṛeakʼ. Ona reakʼ ḍheoko hecʼlenre hõ ona do bae leṭecʼ daṛeakʼa; ar ona do hud hudạukʼre hõ bae parom daṛeakʼa.

²³ Menkhan noko hoṛkoakʼ ontor do keṭecʼgetakoa ar onko do huhul jạtren kanako. Onko do bạṛicʼ horteko ghańjeṛ akana.

²⁴ Onko do mone monete hõ bako mena, ‘dela, aboren Probhu Isor bon botorae ma, ente uni do jao okte lolo ar rabaṅ dinreye dakʼ abon kana, ar phosol irokʼ jokhecʼ hõ jaogeye rukhiyạyetʼ bona.’

²⁵ Apeakʼ bedhorom kạmi iạte noako do sạṅgińre dohoakana; apeakʼ ghạṭ iạte apeakʼ bhạlại do baṅ hoyoktapea.

²⁶ “Ińren hoṛko talare bạṛicʼ hoṛ menakʼkoa okoe do cẽṛẽ jhãmpako leka tãṛãkʼ akaeko tahenkan; onko do pạsi oḍaokate manwako sapʼkoa.

²⁷ Khańca do cẽṛẽkote cetʼleka perecʼge onkage onkoakʼ oṛakʼ hõ eṛe cholkote perecʼgea. Onate onko do kisạ̃ṛ ar daṛeanko hoyakana,

²⁸ Onko do moṭa arko cĩkạ̃ṛ akana. Onkoakʼ bạṛicʼ kạmi reakʼ simạko do bạnukʼtakoa; ṭũạr amarko jemon hok reakʼ bicạr aloko ńam onate onko secʼ bako teṅgokʼ kana ar nacarkoakʼ ạidạri hõ bako rukhiyạyetʼtakoa.

²⁹ Onate cetʼ onko do bạń sạjạikoa? Iń do cetʼ nonkan jạtrenko cetanre bạń halaea? Iń Probhu Isorge noa katha doń meneda.

³⁰ “Disạm talare ạḍi botoranakʼ ghoṭnakoge hoyokʼkana.

³¹ Nạbiko do eṛeyakʼko nạbiyeda, naekeko do akoakʼ tirege ạidạri dohokateko ḍanṭao kana, ar ińren hoṛko do nonkageko dulạṛkana. Menkhan E ińren hoṛko, ona reakʼ mucạtʼ hecʼlenre cetʼpe cekaea?”