Jirimiạ 49 - সান্তালী বাইবেল

Amonrenko upạrte Probhu Isorakʼ bicạr

¹ Amonrenko reaṅ Probhu Isor do noa kathae meneda, “Israelren do cetʼ cele hoponge bạnukʼkotaea? Uniyakʼ gujukʼ tayom uniyakʼ sompottiren ạkʼạidạriko do cetʼ celege bạnukʼkoa? Enḍekhan Milkom do Gad gusṭirenkoakʼ ṭhạ̃i do cedakʼe ạidạri akawana? Cedakʼ Milkom sekʼwako do onḍenakʼ nagrahareko berel akana?

² Ńelme, okteko hijukʼkana tinre iń do Amonrenkoakʼ Raba nagraha upạrte lạṛhại reakʼ andoṛiń ańjom ocoya; unre ona do dhaṅdhaser akatʼ ḍạṅge hoyokʼa, ar ona beṛhaeteakʼ atoko do seṅgelko junḍiyakʼa. Unre Israelko do okoe ṭhenko dokhol ocolen onkogeko dokholkoa. Iń Probhu Isorge noa katha doń meneda.

³ “E Hesbon, homor halaṅme, ente Ai nagraha do jarkhar akana. E Raba nagraharen hoṛko, rakʼjoṅpe; gõṛẽ kicricʼ horokʼkate homor halaṅpe. Pạcriko talare ńir baṛaepe, ente aperen debota Milkom do sạṅgiń disạmteye bondi idiocokʼa, ar uni sãote uniren naekeko ar cetan hudạren kạmiyạko hõko idiocokʼa.

⁴ Am do amakʼ buru nala iạte cedakʼem bạḍạiyokʼ kana? E bepạtiạricʼ kuṛi, amakʼ dhon durib cetanre bhorsakatem meneda, ‘iń do okoeye akromon daṛekińạ?’

⁵ Iń phạdkoren Probhu Isorgeń meneda, am beṛhaeten sanamko ṭhen khon amre heṛan botoriń ạguiya. Ape mimitʼko dope laga ńir ocokʼa; ar dạṛjoṅ hoṛ do okoehõ bako samṭaokoa.

⁶ Menkhan tayomte Amonrenkoakʼ dosa doń ạcur ruạṛtakoa.

Edomrenko upạrte Probhu Isorakʼ bicạr

⁷ Edom babotre phạdkoren Probhu Isore meneda, “Temanre ạkil do cetʼ bạnukʼa? Budanko ṭhen khon cetʼ sopolha do caba akana? Onkoakʼ ạkil do cetʼ heṛ akantakoa?

⁸ E Dedanren hoṛko, ape do ńir ruạṛokʼpe ar dạṛjoṅpe, danaṅ ṭhạ̃ite senkate okokʼpe, ente Esao cetanre muhiniń paṛao ocoya ar uniń sạjạiyea.

⁹ Darkha jo gogotʼ hoṛ am ṭhenko hecʼlenre onko do cetʼ thoṛa darkha jo bako sarecʼ oṭokakʼa? Ar ạyupʼ jokhecʼ kombṛoe hecʼlen khan jạruṛae bhorge cetʼ bae idiya?

¹⁰ Menkhan Esaoakʼ ṭhạ̃i do ujạṛ utạrakʼ iń hoeocoya. Ar jemon aloe oko daṛeakʼ onate uniyakʼ oko ṭhạ̃ikoń sodortaea. Uniyakʼ bõsren hoṛko, peṛa pạrbhạko ar aḍepaseren hoṛ doko marao utạrokʼa ar uni hõ bae tahena.

¹¹ Amren ṭũạr amarko bạgi oṭowakome; iń do onkoakʼ jiwiń rukhiyạitakoa. Amren rạnḍi maejiuko hõ ińreko bhorsakʼma.”

¹² Probhu Isore meneda, “Okoe sạjại ńam reakʼ lekko baṅkan, ar sạjại reakʼ bạṭire ńũnũige lagaoae enḍekhan cedakʼ begor sạjạite dom tahena? Am do ona bạṭire ńũkate sạjại jojom hoyokʼtama.

¹³ Iń do ińakʼ ńutumteń kiriạkʼ kana, Bosra doe marao utạrokʼa ar hirkhạwạnicʼe hoyokʼa. Uniyakʼ dosa ńelte hoṛko torasokʼa ar uniyakʼ ńutumko sarapakʼa. Uniyakʼ sanam ato ar nagrahako do jaejug ujạṛakʼge hoyokʼa.”

¹⁴ Probhu Isor ṭhen noa sombatiń ańjom akada je, mitʼṭen goḍet do jạt jạtrenko ṭhene kol ocoakana. Uniye meneda, “Edomre jhãp em lạgitʼ jarwakʼpe. Ar lạṛhại lạgitʼ beredokʼpe.”

¹⁵ Probhu Isore meneda, “Ńitokʼ do jạt jạtrenko talareń huḍińmea ar hoṛko talare hirkhạwạnicʼ iń hoyocomea.

¹⁶ E dhiri paṛakʼkore girobasokʼ kan buru reakʼ usul ṭhạ̃iren ạidạriyicʼ, am dom torasanicʼ kanre hõ amakʼ ontor reakʼ bạḍạikoge am doe eṛe akatʼmea. Am do pajhaṛ cẽṛẽ leka coṭrem tukạlere hõ latarteń or pheḍ ạgumea.

¹⁷ “Edom reakʼ dosa ńelte hoṛko torasokʼa; ar okoe ona aṛeteko parom calakʼ onko do botor caṛhaoakoa ar uniyakʼ sanam ghạl iạte uniko landa-dhutʼaea.

¹⁸ Iń Probhu Isorge noa katha doń meneda, aḍepase atoko sudhạ cetʼ leka Sodom ar Gomorań ḍahao maraoletʼ onkage Edomre hõ celege bako girobasokʼa; onare cele manwage bako tahena.

¹⁹ “Jordan reakʼ bir khon cetʼleka dhạcri kul do sikạr lạgitʼe oḍokʼ hijukʼ onkage mitʼ ripitʼre Edom do acʼakʼ disạm khoniń laga ńirea. Onḍe do ińren bachao akan hoṛkoń bahalkoa. Iń lekanicʼ do okoe menaea? Ar iń upạrte do okoeye teṅgo daṛekokʼa? Jãhãe gukʼpiyicʼ do cetʼ iń samaṅreye teṅgo daṛekokʼa?”

²⁰ Onate Probhu Isor do Edom upạrte okae goṭa akatʼ, ar Temanren hoṛko upạrte okae pontha akatʼ ona ańjomme. Palren kạṭicʼ hoponko hõko or idi ocokʼa; onkoakʼ kạmi khạtirtege ạtiń ṭạnḍi doe maraoa.

²¹ Onkoakʼ gurokʼ reakʼ saḍete dhạrti do dal dalaokʼa; onkoakʼ rakʼ do arakʼ gaḍa hạbicʼ ańjomokʼtakoa.

²² Ńelpe, onkoren bạiri do pajhaṛ leka coṭteye uḍạukʼa ar Bosra cetanre phạ̃kṛạ̃kʼe lap lapaete sã sãye pheḍ hijukʼa. Enhilokʼ Edomren lạṛhại phạdkoakʼ mon do bedonokʼkan maejiuakʼ mon leka hoyokʼtakoa.

Damesek upạrte Probhu Isorakʼ bicạr

²³ Damesek babotre Probhu Isore meneda, “Hamat ar Arpad dokin andmandao akana, ente unkin do bạṛicʼ khoborkin ańjomakada. Unkin dokin as chuṭạu akana, ar haḍak ḍabakokʼkan doreão lekakin hoyakana.

²⁴ Damesek doe lạbṛukʼ akana, uni do dạṛ lạgitʼe ruạṛ akana ar botor caṛhao akadea; bedonokʼkan maejiu leka bedon rakapʼ akawadea.

²⁵ Ona namḍak nagraha, oka nagraha iạte ạḍiń kusikʼkan tahẽkan, hoṛko do cedakʼ ona bạgikate bako calao akana?

²⁶ Iń phạdkoren Probhu Isorgeń meneda, uniren juạnko do khạṭige nagraha reakʼ kulhikore ar dobạṭiạkoreko gujukʼa; enhilokʼ uniren sanam lạṛhại phạdko doko marao utạrokʼa.

²⁷ Damesek reakʼ pạcrikore iń do seṅgeliń junḍiyakʼa; ona do Benhadad gaṛkoe lo poṭor cabaea.”

Kedar ar Hasor nagraha upạrte bicạr

²⁸ Babelren raj Nebukadnesar do Kedar ar Hasorren okoekin raje bhagaoletʼ kin unkin babotre Probhu Isor doe meneda, “Beretʼpe, ar Kedarte rakapʼ calakʼpe ar purub disạmren hoṛko jarkharkope.

²⁹ Hoṛko do onkoakʼ tạmbuko ar onkoren ạsul janwarkoko hatkoa ar onkoakʼ sanam jinisko, tạmbu reakʼ orwalko ar ũṭkoko idikoa. Ar hoṛko do ãṭ aṛaṅteko ańjomakoa, ‘torasge, beṛhaete torasge!’ ”

³⁰ Probhu Isore meneda, “E Hasorren hoṛko, usạrate dạṛpe. Ar danaṅ ṭhạ̃ire senkate tahenpe. Babelren raj Nebukadnesar do ape upạrteye soṛojontro kana, ape upạrte mitʼṭecʼe goṭa ṭhik akada.

³¹ E Babelrenko, ape do beretʼpe, ar khạtirjomako tahenkan onko jạtrenko cetanre jhãp empe. Onko jạtrenko do phaṭok duạr hõ bạnukʼtakoa, huṛkạṛ hõ bạnukʼa; onko do ako motogeko girobasokʼ kana.

³² Onkoren ũṭko do luluṭren malko hoyokʼa ar onkoren ạsul janwarko do luṭren jinisgeko hoyokʼa. Okoe do bohokʼ upʼko kaṭopʼetʼkan onko do beṛhaeteń chirchạturkoa ar onko cetanre joto secʼ khon muhiniń ạguiya.

³³ Hasor do toyokoakʼ tahen reakʼ ṭhạ̃i ar jaejug ujạṛakʼge hoyokʼa. Onḍe do okoe hõ bako girobasokʼa, ar cele manwage onare do bako tahena.”

Elam upạrte Probhu Isorakʼ bicạr

³⁴ Jihudạren raj Sedekiạwakʼ rajokʼ pạhil secʼ Elam reaṅ Probhu Isorakʼ noa katha do Jirimiạ nạbi ṭhen sodorena,

³⁵ “Iń phạdkoren Probhu Isorgeń meneda, iń do Elamrenkoakʼ akʼ kạnạń, onkoakʼ asolakʼ khunṭi doń rạputʼ giḍiya.

³⁶ Iń do serma reakʼ beṛhae khon ponea hoe Elom upạrteń ạguiya. Ona hoe do onko beṛhaeteń pasnaoa; ar Elame sạṅgiń akatʼko bondiko do sanam jạtrenko talareń chirchạturkoa.

³⁷ Ar okoe onko gocʼko reakʼko monejoṅ onko bạiriko samaṅrege iń do Elamrenkoń dhaṅdhaserkoa; ińakʼ jolokʼkan edre do onko cetanreń paṛao ocoya. Ar ạuriko cabakʼ hạbicʼ onko upạrte tarwaṛeń kola.

³⁸ Iń do Elamre siṅghạsoniń bạisạua ar uniren raj ar kạmiyạko hõń maraokoa,

³⁹ menkhan tayom daram dinre iń do Elam reakʼ dosań ruạṛ ạguiya. Iń Probhu Isorge noa katha doń meneda.”