Jirimiạ 48 - সান্তালী বাইবেল

Moab dhaṅdhaserokʼ reaṅ

¹ Moab reaṅ phạdkoren Probhu Isor doe meneda, “Nebore do hae hae! Ona do marao utạrokʼa. Kiriạthaim doe lajao ocokʼa ar eṭakʼkoakʼ tireye paṛaokʼa; uniyakʼ gaṛko do lajao ocokʼte rạputʼ dhaṅ dhaserokʼa.

² Moab do ar bae sarhao ocokʼa; uniyakʼ ńurokʼ lạgitʼ hoṛko do Hesbonre soṛojontro tulucʼko mena, ‘dela, abo do onko jạtren bon marao utạrkoa.’ E Madmen, am hõm marao ocokʼa; tarwaṛe do ame khudạumea.

³ Horonaim khon do rakʼ ańjomokʼkana, jarkhar ar dhaṅdhaser reakʼ rakʼge ańjomokʼ kana.

⁴ Moab doe dhaṅdhaser ocokʼa; onaren huḍińko doko rakʼjoṅkana.

⁵ Luhit rakapʼ calakʼ horre hoṛko do rakʼ rakʼteko rakapʼ calakʼa; ar Horonaim secʼ okaṭakʼ hor pheḍ sen akan onḍe do dhaṅdhaser iạte guher ańjomokʼa.

⁶ Dạṛjoṅpe, apan ạpin jiwi rukhiyạitape; hahaṅkarren mitʼṭen arna gadha leka hoyokʼpe.

⁷ Am do amakʼ kạmi ar dhon cetanrem bhorsa akanre hõ am dom bondi idi ocokʼa, ar Kemos do acʼren naeke ar rajkạmiyạko sãote bondikate saṅgińteye idi ocokʼa.

⁸ Mitʼke mitʼ nagraha upạrte dhaṅdhasericʼe hijukʼa ar oka nagrahage bae paskao daṛeakʼa. Ińakʼ katha leka buru nala do maraokʼa ar bilạn ṭạnḍi do jarkharokʼa.

⁹ Moab do phạ̃kṛạ̃kʼ emaepe jemone uḍạu sen daṛeakʼ; uniyakʼ nagrahako do ujạṛokʼtaea, onḍe do celege bako berelokʼa.”

¹⁰ Probhu Isore meneda, “Ińakʼ kạmire okoe hoṛe asketokʼ unire do sarap paṛaokʼma. Okoe acʼakʼ tarwaṛere mãyãm bae joro ocoy uni cetanre hõ sarap paṛaokʼma.

¹¹ “Mitʼ kanḍa khon eṭakʼ kanḍare ạuri dul hạbicʼ cetʼleka bubulakʼ do acʼakʼ gadrege tahen onkage Moab do acʼakʼ huḍiń umer khon khạtirjomae tahenkana; uni do bondi dosare bae sen akana. Onate ona reakʼ sebel do lahate lekage menakʼa, ona reakʼ mońj so do baṅ bodol akana.

¹² Menkhan dinko hijukʼ kana tinre iń do kanḍa dũṛũcʼ lạgitʼ hoṛkoń kolkoa, onko do uniko dul oḍokea; uniyakʼ kanḍako khạliytaea ar uniyakʼ bhajan doko rạputʼ gejertaea.

¹³ Israelko Bethelre pạtiạukate cetʼlekako lajao ocolen onkage Moab hõ Kemos reaṅ iạteko lajao ocokʼa.

¹⁴ “Ape do cekatepe meneda, ‘birbao hoṛ kanale, ale do dilan lạṛhại bir kanale?’

¹⁵ Moab do jarkharokʼa ar uniyakʼ nagrahako do dokholokʼtaea; uniren juạn koṛako do gocʼ ocokʼ lạgitʼko pheḍ calakʼkana.” Okoeyakʼ ńutum do phạdkoren Probhu Isorkan uni rajge noa katha doe meneda,

¹⁶ “Moabakʼ ńurokʼ do sor hecʼakana; uniyakʼ muhin do usạrage hijukʼa.

¹⁷ Ape okoe do uni beṛhaetepe girobasokʼ kan, ar okoe uniyakʼ ńutum reakʼpe ańjom akatʼ, ape do jotoge uni lạgitʼ homor halaṅpe. Uni metaepe, ‘daṛeanakʼ raj ṭheṅga, ona ṭhonokanakʼ ṭheṅga do cekate rạputʼena?’ ”

¹⁸ Probhu Isore meneda, “E Dibonren hoṛko, apeakʼ ṭhonok reakʼ ṭhạ̃i khon pheḍ hijukʼte khaṅgoṭ otre duṛupʼpe, ente Moabren dhaṅdhasericʼ do ape upạrte hecʼkate apeakʼ gaṛkoe dhaṅdhasertapea.

¹⁹ E Aroerren hoṛko, ape do hor aṛere teṅgokate ńelpe. Ar dạṛjoṅkan hoṛko kulikope, ‘cetʼ hoyakana mente?’

²⁰ Moab doe lajao ocoakana, ente uni doe talga tạuạkʼ ocoakana. Ape do rakʼjoṅpe ar homor halaṅpe. Ar Arnon gaḍa aṛere noa porcarpe, Moab do jarkhar akana.

²¹ Bilạn ṭạnḍi reakʼ noa sanam ṭhạ̃ikore bicạr reakʼ okte do seṭer akana- Holonre, Jahsare, Mephatre,

²² Dibonre, Nebore, Beth-Diblathayimre,

²³ Kiriyạthayimre, Beth-Gamulre, Beth-Meonre,

²⁴ Keriyothre ar Bosrare, metakʼme Moab disạm reakʼ sor ar sạṅgińre menakʼ sanam ato ar nagrahako cetanre bicạr do seṭer akana.

²⁵ Moabakʼ reakʼ dereń do makʼ giḍiyena; uniyakʼ ti do rạputʼentaea.

²⁶ “Moab bul ocoyepe, ente uni do iń upạrte apnartetʼ maraṅe udugokʼ kana. Uni do acʼakʼ becʼreye jobe akana; uni do landa-dhutʼicʼgeye hoyokʼa.

²⁷ E Moab, Israel do cetʼ amren landa-dhutʼicʼ bae tahẽkana? Uni do cetʼ kombṛoko talareye ńamlena, onate uni reaṅem roṛ pichạ hirkhạte bohokʼem rukuyetʼtama?

²⁸ E Moabren hoṛko, nagraha bạgikate huṭupʼ dhirikore berelokʼpe. Ar onkan potamko leka baṛe hoyokʼpe, okoe do khandṛaṅ moca ṭhen tukạko benaojoṅ kan.

²⁹ “Moab do ạḍi bạḍại hoṛkanae. Abo do uniyakʼ bạḍại reakʼ katha, uniyakʼ eṛeteakʼ, uniyakʼ edre reakʼ ar uniyakʼ phulạukʼ reakʼ katha bon baḍaegea.

³⁰ Iń do uniyakʼ bạḍạite perecʼ dhomok reakʼ katha hõń baḍaegea, menkhan ona do eṛeteakʼ kana ar uniyakʼ bạḍại do jãhãn kạmirege baṅ lagaokʼa.

³¹ Onate iń do Moab lạgitʼ iń homor halaṅa, goṭa Moab lạgitʼ iń raga, Kir-Heresren hoṛko lạgitʼ doń hae haeyokʼa.

³² E Sibnar darkha nạ̃ṛĩ, iń do Jaser lạgitʼ cetʼ lekań rakʼetʼkan ona khon bạ̃ṛti do am lạgitʼ hõń raga. Amakʼ ḍạrko do jalapuri hạbicʼ pasnao akana; onako do Jaser reakʼ jalapuri hạbicʼ seṭer akana. Menkhan amakʼ niron din reakʼ jo ar darkha jo jarkharicʼ doe hecʼ sor akana.

³³ Moabakʼ bagwan reakʼ jo, metakʼme Moab disạm khon rạskạ ar kusi do ocokʼ akana. Iń do darkha lelen kunḍ khon darkha rasań ańjetʼ akada; rạskạ ar hulạsate okoe hõ ona do bako lena. Hoho menakʼgea menkhan rạskạ reakʼ do baṅkana.

³⁴ “Onkoakʼ rakʼjoṅ reakʼ aṛaṅ do Hesbon khon Elial ar Jahas hạbicʼ ańjomokʼ kana, Soar khon Horonayim ar Eglath Selisiạ hạbicʼ rakapʼ akana, ente Nimrim reakʼ dakʼ hõ ańjetʼ akana.

³⁵ Iń Probhu Isorge noa katha doń meneda, Moabre okoe do than boṭkocʼkore samaṅokʼakʼko samaṅetʼ tahẽkan ar onkoren debotako ńutumte dhupko jeretʼetʼ tahẽkan onko doń marao utạrkoa.

³⁶ Onate Moab reakʼ ar Kir-Heresren hoṛko lạgitʼ ińakʼ ontor do tirio leka ńohoṛ ńohoṛokʼkantińạ. Ar okaṭakʼ dhonko jarwaletʼ ona hõ cabayentakoa.

³⁷ Onko do duk sodor lạgitʼ mitʼke mitʼ bohokʼko ceḍe akatʼtakoa ar gocoko hoyo giḍi akatʼtakoa; tiko getʼ sirạsoro akana ar ḍanḍare gõṛẽ kicricʼko horokʼ akawana.

³⁸ Moab reakʼ sanam oṛakʼ chatkore, nagraha reakʼ kulhi ar dobạṭiạkore homor halaṅ chaḍa ar cetʼge baṅ ańjomokʼ kana, ente okaṭakʼ bhajan celege bako bạsutakʼkan onkage Moab doń rạputʼ gejer akadea.

³⁹ Uni doe talga tạuạkʼ akana! Uni do sanam hoṛko lạgitʼe homor halaṅeda! Moab do cetʼleka lajaoteye dea akada! Uni do beṛhaeten sanam hoṛko ṭhen landa-dhutʼicʼe hoyakana, uniyakʼ dosa ńelte onko hoṛ doko toras akana.”

⁴⁰ Probhu Isore meneda, “Ńelpe, mitʼṭen hoṛ do pajhaṛ cẽṛẽ lekae ạphir hijukʼkana ar Moab upạrte acʼakʼ phạ̃kṛạ̃kʼe lap lapa akatʼtaea.

⁴¹ Uniyakʼ sanam nagrahako do hatokʼa ar aotan gaṛko hõ ạidạrikʼtaea. Enhilokʼ Moabren birbão hoṛkoakʼ mon do bedonokʼkan maejiuakʼ mon leka hoyokʼtakoa.

⁴² Jạtrenko lekate Moab doe marao ocokʼa, ente iń upạrte acʼteye usul akana.

⁴³ E Moabren hoṛko, ape lạgitʼ botor, ghaḍlakʼ ar jhãmpa doe koyokʼ hor akada.

⁴⁴ Okoe toras khone dạṛjoṅ uni do ghaḍlakʼreye ńurokʼa, ar okoe ghaḍlakʼ khone rakapʼ hijukʼ uni do jhãmpareye sabokʼa; ente iń do Moab reakʼ sạjạiyiń ṭhik dohoakada. Iń Probhu Isorge noa katha doń meneda.

⁴⁵ “Hesbon reakʼ umulte ńir paskaoen hoṛ do latwakʼgeye teṅgo akana, ente Hesbon khon seṅgel ar Sihon reakʼ tala khon seṅgel reakʼ lepʼge oḍok akana; ar ona do Moab reakʼ simạkoe jomakada ar hulmalren hoponkoakʼ bohokʼ doe jeretʼ akatʼtakoa.

⁴⁶ E Moab, hae am do! Kemosren hoṛ doko marao utạrena; ar amren hoponko do sạṅgiń disạmteko idiakatʼkoa ar amren hoponerako hõko bondi ocoakana.

⁴⁷ Menkhan tayom daram dinre Moab reakʼ dosa doń ạcur ruạṛa. Iń Probhu Isorge noa katha doń meneda.” Moabakʼ bicạr reakʼ katha do nonḍege mucạtʼena.