Jirimiạ 47 - সান্তালী বাইবেল

Philisṭiko reaṅ

¹ Pharao do Gasa ạuriye akromonre Philisṭiko babotre Probhu Isorakʼ noa katha do Jirimiạ nạbi ṭhen sodorena,

² “Ńelme, utạr secʼ khon banbạsi rakapʼ hijukʼkana; ona do se rakabokʼkan ạtukʼ dakʼ lekage hijukʼkana. Ona do disạm ar onare menakʼakʼ joto ato ar nagraharen girobasokʼ kan sanam hoṛkoe ḍubạ esetʼkoa. Ona iạte hoṛko doko guhera; ar disạmreko girobasokʼ kan joto hoṛgeko jare jarekʼa.

³ Onko do bandhaṛ sadomkoakʼ khurạ reakʼ kaṭapʼ kaṭapʼ saḍe, bạirikoakʼ rãt gạḍiko reakʼ huḍ huḍạukʼ saḍe ar pạ̃ihạ̃ko reakʼ giṛgiṛ saḍeko ańjoma. Unre baba do akoren hoponko goṛowako lạgitʼ bako ruạṛa; onkoakʼ ti do lạbṛugokʼtakoa.

⁴ Philisṭikoren sanamko maraokʼ reakʼ din, Tur ar Sidonren mitʼke mitʼ sarecʼ gokʼṛokoakʼ gocʼ ocokʼ reakʼ din do seṭer akana. Iń Probhu Isorge Philisṭikoakʼ, metakʼme Kaphtor dip khon hecʼakan hoṛkoń maraokoa.

⁵ Gasa doe jare jarekʼa ar acʼakʼ bohokʼe ceḍeytaea; Askelon doe marao giḍi ocokʼa. E bilạn ṭạnḍiren sarecʼ hoṛko, ar tinạkʼ din apeakʼ hoṛmope getʼ sirạ soroytapea?

⁶ Ape do nonkape rakʼeda, ‘E Probhu Isorakʼ tarwaṛe, ar tinạkʼ din tayomem jirạukʼa? Amakʼ khaprege bolo ruạṛokʼme; jirạukʼme, ar thir hapeakan taheme.’

⁷ Menkhan iń do uniń hukum akawadea onate uni do cekateye jirạukʼ daṛekokʼa? Iń do Askelon ar jalapuri ḍhip aṛerenko upạrte jhãp em lạgitʼ iń hukum akadea.