Jirimiạ 46 - সান্তালী বাইবেল

Eṭakʼ eṭakʼ jạtrenko reaṅ nạbi katha

¹ Jirimiạ nạbi ṭhen eṭakʼ eṭakʼ jạtrenko reaṅ Probhu Isorakʼ katha.

Misor reaṅ

² Josiạ hopon Jihudạren raj Jehoyakimakʼ rajokʼ ponakʼ bochorre Babelren raj Nebukadnesar do phurạt gaḍa ṭhen Karkemisre Misorren Pharao raj Neko do okoe lạṛhại phạdkoe bhagaoletʼko Probhu Isor do onko reaṅe meneda,

³ “Kạṭicʼ ar lạṭu ḍhalko benaokate lạṛhại lạgitʼ oḍok calakʼpe.

⁴ Sadomko sapṛaokope ar onkore dejokʼpe. Bohokʼ aḍokʼ reakʼ ṭupri horokʼkate ṭhạ̃ire senkate teṅgo thạrokʼpe. Apeakʼ borlomko lasertape. Ar lạṛhại reakʼ sajbaj horogpe.

⁵ “Iń do cetʼ iạte noakoń ńeleda? Onko do botor caṛhao akatʼkoa, arko pạcakana, onkoren lạṛhại bir doko bhagao ocoyena. Onko do tayom secʼ beṅgetʼ ruạṛ baṅkate am ińko dạṛjoṅkana, ente beṛhaetege toras do menakʼa.

⁶ Coṭkarko hõ bako ńir pharak daṛeakʼkana ar lạṛhạyicʼ birbanṭa hõ baṅa. Utạr secʼ phurạt gaḍa ṭhen onko doko sombotʼ bhindạṛena.

⁷ “Okoe kanae uni do, one nil gaḍa leka, gaḍa dakʼko lekae dundunạu hijukʼkan?

⁸ Misor do nil gaḍa leka, ar gaḍa dakʼko dundunạukʼ lekageye rakapʼ hijukʼ kana. Uni doe meneda, ‘iń doń rakapʼa ar dhạrtiń ḍubạ eseda; ar nagrahako ar onaren hoṛkoń marao cabakoa.’

⁹ E sadomko, ape do ńir bhiṛạukʼpe. E rãt gạḍiko, ape do giṛgiṛạu baṛaepe. E birbanṭako, ḍhal akʼsenkan Kusren ar Puṭren hoṛko, ar Ludren dhinkiạko, ape do laha idikʼpe.

¹⁰ Menkhan ona din do phạdkoren Probhu Isorakʼ din kana. Enhilokʼ do uniren bạiriko cetanre hala hạli reakʼ dinge hoyokʼa. Tarwaṛe ạuriye tirpitokʼ hạbicʼ ar uniyakʼ mãyãm reakʼ tetaṅ ạuri meṭaokʼ hạbicʼ uni do gocʼkotegeye tahena; ente phạdkoren Probhu Isor do mitʼṭecʼ teṅgenokʼakʼ menakʼtaea utạr senakʼ disạmre, phurạt gaḍa aṛere.

¹¹ “E kũạri kuṛi Misor, am do Gileadte rakapʼ calakʼme ar haso reakʼ ran sunum ạgujoṅme. Am do ạuṛiyakʼge ạḍi lekan rankom lagao joṅkana; am do bam bogekʼa.

¹² Jạt jạtrenko do amakʼ lajao paṛao reakʼko ańjom akada; amakʼ kạuạ rạuạte dhạrti do andoṛokʼa. Ente birbão hoṛ do birbão hoṛregeye tohodokʼa ar unkin do bana hoṛge mitʼ domtekin bhindạṛokʼa.”

¹³ Babelren raj Nebukadnesar do Misor akromon lạgitʼe hijukʼ, ona reakʼ sombat Probhu Isor do Jirimiạ nạbiye lạiyade tahẽkana.

¹⁴ Uniye metade tahẽkana, “Ape do Misorre porcarpe, Migdolre lại jạhirpe, Naph ar Tophnhesre lại sodorpe, ‘ar ṭhạ̃ire teṅgokʼpe ar sapṛaokʼpe, ente tarwaṛe do ape beṛhaeteye jojomkana.’

¹⁵ Aperen lạṛhại phạdko do cedakʼko bhagao ocokʼa? Onko do ghuriạ bako teṅgo daṛeakʼa, ente Probhu Isorge latarteye ṭhelao ńurkoa.

¹⁶ Onko do ghane ghạṛicʼko tohodokʼa; ar hạni nại cetanre lade ghuguko bhindạṛokʼa. Onkoko mena, ‘ma beretʼpe, dela abo do sasantaokoakʼ tarwaṛe samaṅ khon aboren hoṛko ṭhen ar apnarakʼ disạmte bon ruạṛ calakʼa.’

¹⁷ Onḍenko hoṛko meneda, ‘Misorren Pharao raj do murukte rukʼkan mitʼṭecʼ ghonṭa kanae; uni do acʼakʼ ạte atʼ akatʼtaea.’ ”

¹⁸ Phạdkoren Probhu Isor doe lại jạhiretʼkana, “Iń ńutumteń kiriạkʼ kana, nonkan mitʼ hoṛe hijukʼa okoe do buruko tala reakʼ Tabor leka, Jalapuri aṛe reakʼ Karmel leka.

¹⁹ E Misorrenko, sạṅgińte bondi idiocokʼ lạgitʼ apeakʼ jinisko sapṛaotape, ente Naph do ujạṛakʼ ar dhaṅ dhaserakʼge hoyokʼa.

²⁰ “Misor do mitʼṭen mońj okocʼ mĩhũ kanae, menkhan utạr secʼ khon uni upạrte mitʼṭen rõ doe hijukʼkana.

²¹ Misorren din mạjuri lạṛhại phạdko do lodgopʼ mĩhũ leka kanako. Onko hõ ruạṛkate mitʼ domteko dạṛ pharakokʼa; ar bako teṅgo ṭarhaokʼa, ente onko cetanre maraokʼ reakʼ dinge hijukʼkana, onkoakʼ sạjại ńam reakʼ okte do sor hecʼ akana.

²² Bạiriko tinreko laha hijukʼa unre Misorrenko do biń lekako leń calakʼa arko dạṛa; ar bạiriko do ṭeṅgocʼante Misor upạrteko hijukʼa.

²³ Onko do Misor reakʼ bir gajaṛko makʼ saphaea. Onko do pohoko khon hõ lekhateko ḍhergea; ar ohoko lekha caba daṛelena.

²⁴ Misorren hoṛ doko lajao ocokʼa ar utạr secʼren hoṛkoakʼ tireko soprot ocokʼa.”

²⁵ Israelren phạdkoren Probhu Isore meneda, “Ńelpe iń do Thebesren boṅga Amon, ar Pharao ar Misor, ar onaren boṅgako ar onaren rapajko sudhạ Pharao ar unire bhorsakʼ kanko upạrte sạjạiyiń ạguiyeda.

²⁶ Okoe onkoakʼ jiwiko sendara kan Babelren raj Nebukadnesar ar uniren lạṛhại phạdkoakʼ tire onkoń jimạkoa. Ona tayom do Misorre arhõ lahate leka hoṛko girobasokʼa. Iń Probhu Isorge noa katha doń meneda.”

²⁷ “E ińren golam Jakob, am do alom botorokʼa; E Israel, bin udgạuicʼ do alom hoyokʼa. Iń do sạṅgiń disạm khon, bondi akan disạm khon am ar amren hoponko khạṭigeń bańcaopea. Jakob do arhõ sulukte ar khạtirjomae tahena, celege bako botor ocoyea.

²⁸ E ińren guti Jakob, alom botorokʼa, ente iń do am sãorege minạńa. Okoe jạtrenko talareń laga ńirletʼme onko jạtrenkoń marao utạrlekore hõ am do purạte bạń maraomea. Ar begor sạjạite hõ bạń aṛakʼmea, menkhan hok reakʼ bicạrtegeń ḍanṭaomea.”