Jirimiạ 44 - সান্তালী বাইবেল

Boṅga sewawako reakʼ kuṛại

¹ Misor disạmre okoe Jihudiko do Migdolre, Tahpanhesre, Naphre ar Pathros ṭoṭhareko girobasokʼ kan tahẽkan onko reaṅ Probhu Isorakʼ noa katha do Jirimiạ ṭhen hecʼena.

² “Israelren phạdkoren Probhu Isorgeń menetʼkana, iń do Jerusalem ar Jihudạ reakʼ sanam atoko ar nagrahako cetanre oka muhin iń ạguletʼ ona dope ńelakatʼgea. Onako do teheń dhaṅdhaser akange menakʼa; onḍe do celehõ bako girobasokʼ kana.

³ Ona do iń khĩs ocoyiń lạgitʼ dusṭạmi kạmiko kạmiakada, onko do senkate dhupko jeretʼkeda ar eṭakʼ isorko sewawatʼkoa, one okoe do bako baḍaeakatʼko ar ape hõ baṅ ar aperen hapṛamko hõ bako baḍaeletʼko.

⁴ Iń do aema dhao ińren gutiko, metakʼme nạbikoń kolletʼkoa nonka memen lạgitʼ; noa hirkhạwakʼ do alope kạmiya okaṭakʼ iń kurudakʼkan.

⁵ Menkhan onko do bako luturada, ar bako hetaoada; ar onko do akoakʼ dusṭạmi khon bako ruạṛlena ar debotako ṭhen dhup jered hõ bako bạgiletʼa.

⁶ Onatege ińakʼ jolokʼkan edre doń dulletʼ tahẽkana; ona do Jihudạkoakʼ nagrahare ar Jerusalem reakʼ ḍaharkore jol rakapʼlena ar onate onako do teheń ujạṛakʼ ar dhaṅ dhaserakʼ hoyakana.

⁷ “Ńitokʼ iń do Israelren phạdkoren Probhu Isoriń meneda, cedakʼ apnarte nunạkʼ bạṛicʼakʼ dope kạmikana? Ape do herelko, maejiuko, ńir keṭecʼ gidrạko, nunu gidrạko Jihudạ khonpe oḍok ạguketʼkote apnartege onkope maraoetʼkoa.

⁸ Ar okare girobasokʼ lạgitʼpe hecʼakan ona Misor disạmren debotakoren boṅga murhutʼko samaṅre dhuppe jeretʼetʼte cedakʼpe khĩs ocoyedeńa ar ińakʼ pitpe caṛhao ocoyetʼtińạ? Ape do apnartegepe maraokʼ kana ar dhạrtiren sanam jạtrenko talare mitʼṭecʼ sarap ar mitʼṭecʼ henostankope hoyokʼa.

⁹ Jihudạ disạm ar Jerusalem reakʼ ḍaharkore aperen hapṛamkoakʼ, Jihudạren rapajko ar rạnikoakʼ, ape ar aperen bạhukoakʼ dusṭạmi reakʼ katha do cetʼpe hiṛińkeda?

¹⁰ Teheń hạbicʼ hõ apeakʼ ontor do dukte bape rạputʼletʼtapea se ińhõ bape botoradińa; ar aperen hapṛamko ṭhen okaṭakʼ niạmkoń ematʼko tahẽkan ona hõ bape manaoakada.

¹¹ “Ona iạte iń Israelren phạdkoren Probhu Isor doń ṭhik dohoakada, ape cetanre muhiniń ạguiya ar goṭa Jihudạ disạmgeń marao utạra.

¹² Jihudạren sarecʼ hoṛko okoe do Misorte senkate upriạ hoṛko leka girobasokʼ lạgitʼko goṭa akatʼ onko upạrte nonka bebostań hataoa onko jotoge Misorreko marao utạrokʼa. Onko do lạṛhạite ar baṅkhan akalteko gujukʼa. Ar landa dhutʼako jạtrenko hoyokʼa; onkoakʼ dosa ńelte hoṛko botorokʼa, ar onkoakʼ ńutumko sarapakʼa.

¹³ Iń do cetʼleka Jerusalem iń sạjại akadea, ar okoe Misorreko girobasokʼ kan onko hõ onkage lạṛhại, akal ar mahamạriteń sạjạikoa.

¹⁴ Nonkate Misor disạmre tahen lạgitʼko hecʼakan Jihudạren sarecʼko do cele hõ bako paskaokʼa, ar bako sarejokʼa, onko do Jihudạ disạmte ruạṛ lạgitʼko ahkaokʼgea, menkhan celege bako ruạṛa mitʼ bar ńir paskaokʼko chaḍa.”

¹⁵ Unre okoe hoṛko baḍaekan tahẽkan baṅma, akoren bạhuko do debotako ńutumte dhupko jeretʼeda ar onḍe jarwa akan sanam maejiuko, metakʼme Misor reakʼ Pathros ṭoṭhare girobasokʼ kan maejiuko do Jirimiạko metadea,

¹⁶ “Probhu Isor ńutumte okako katham lạiyale kan ona do bale ańjomtama.

¹⁷ Ale okale roṛakatʼ ona do khạṭigele kạmiya. Cetʼ leka aleren hapṛamko, rapajko ar rajkạmiyạko do Jihudạ nagrahakore ar Jerusalem reakʼ ḍaharkore sermaren rạni ńutumte dhupko jeretʼetʼ tahẽkan arko coḍoretʼ tahẽkan onkage ale hõle kạmiya. Ona jokhecʼ aleakʼ do aḍhela jomakʼ tahẽkana ar ale hõ ạḍi bhagele tahẽkana ar jãhãn kosṭoge bale ńamleda.

¹⁸ Menkhan tin khon sermaren rạni ńutumte dhup jered ar coḍorle bạgikeda, un khon ale do reṅgejokʼle ehopʼena ar lạṛhạite, akaltele marao idikʼ kana.”

¹⁹ Maejiuko do arhõko menkeda, “Ale do tinre sermaren rạni ńutumte dhuple jeretʼetʼ tahẽkana arle coḍoretʼ tahẽkana ar uni lekage piṭhạle benaoetʼ tahẽkana unre cetʼ aleren jãwãeko do ona katha bako baḍaekan tahẽkana?”

²⁰ Jirimiạ do sanam hoṛko, metakʼme herel hoṛko ar maejiukoe metatʼkoa

²¹ “Jihudạ reakʼ atoko ar nagrahakore ar Jerusalem reakʼ ḍaharkore ape ar aperen hapṛamko, aperen rapajko, rajkạmiyạko ar disạmren eṭakʼ hoṛko okoe do dhupko jeretʼetʼ tahẽkan ona do cetʼ Probhu Isorakʼ disạ do bạnukʼtaea ar ona reaṅ uni do cetʼ bae dạndikʼ kana?

²² Apeakʼ bạṛicʼ ar hirkhạwakʼ kạmiko Probhu Isor do tinre bae sahao daṛeada unre apeakʼ disạm do ujạṛakʼ, maraoakʼ ar hirkhạwakʼ ṭhạ̃ige hoyena ar ona disạm reakʼ ńutum do hoṛkoko sarapakʼa. Ar teheń hạbicʼ hõ ona do onkage menakʼa.

²³ Ape do dhuppe jeretʼ akada ar Probhu Isor upạrtepe kại akada; uniyakʼ kathape bemanot akada ar uniyakʼ ạnko, niạmko ar kathako bape ańjomaletʼtaea; ona iạte niạ muhin do apere hecʼ paṛao akana. Ar ona dope ńeletʼ kangea.”

²⁴ Ona tayom Jirimiạ do sanam herel hoṛko ar maejiukoe metatʼkoa, “Misorre upriạ lekate girobasokʼ kan Jihudạren sanam hoṛko, ape do Probhu Isorakʼ katha ańjompe.

²⁵ Phạdkoren Probhu Isor do noa kathae meneda, ‘apepe menleda, sermaren rạni ńutumte dhup jered ar coḍor reakʼ okale kiriạ akan ona do khạṭigele onkaea. Apeakʼ ona kiriạ lekate ape ar aperen bạhukoakʼ kạmi hotete ona dope udukʼ akada.’ “Onate okaṭakʼpe kiriạ akan ona baṛe onkaepe. Apeakʼ kiriạwakʼko purạutape.

²⁶ Menkhan Misorre girobasokʼ kan sanam Jihudiko, ape do Probhu Isorakʼ katha ańjompe. Probhu Isore meneda, ‘iń do ińakʼ maraṅ ńutumteń kiriạkʼ kana, Misorre jãhã ṭhạ̃iregeko girobasokʼ kan Jihudạren hoṛko do iń ńutumte kiriạkate bako mena, jiwetʼ Isor ńutumteń kiriạkʼ kana.

²⁷ Onkoakʼ bhạlại lạgitʼ do baṅ menkhan bạṛicʼ lạgitʼte onko cetanre kheyaliń dohoyeda; Misorreko girobasokʼ kan Jihudiko do lạṛhại ar akalteko marao utạrokʼa.

²⁸ Ar okoe do lạṛhại khonko bańcaokʼte Misor khon Jihudạ disạmteko ruạṛ hijukʼ onkoakʼ lekha do thoṛage hoyokʼa. Ona tayom Jihudạren sarecʼ okoeko hoṛ Misorte girobasokʼ lạgitʼko hecʼakan onko doko baḍae daṛeakʼa okoeyakʼ katha ṭhik tahena, ińakʼ se onkoakʼ.

²⁹ “ ‘Iń Probhu Isor do ape lạgitʼ mitʼṭen cinhạń emokʼa, niạ ṭhạ̃ire apeń sạjạipea jemonpe baḍae daṛeakʼ ape oka botoriń udukʼatʼpe tahẽkan ona do ṭhikgea mente. Ar ona cinhạ do noage,

³⁰ Jihudạren raj Sedekiạ do okoeṭakʼ bạiri goje reakʼe kurumuṭuletʼ uni Babelren raj Nebukadnesarakʼ tire cetʼ lekań soprotlede, ṭhik onkage Misorren Pharao raj Hopra hõ uniren bạirikoakʼ tireń soprotea one okoe do uniyakʼ jiwi hataotae lạgitʼko kurumuṭuyetʼkan.’ ”