Jirimiạ 43 - সান্তালী বাইবেল

Jirimiạ do Misorteye idi ocokʼkan

^1-2 Probhu Isor do Jirimiạ okako katha hoṛko ṭhen lại jạhir lạgitʼe kollede ar tinre onako kathae lại mucạtʼkeda unre Hosaya hopon Asaria, Karea hopon Johanan ar sanam bạḍạiyan hoṛko do Jirimiạko metadea, “Am do eṛe katham roṛeda. ‘Misorte upriạ tahen lạgitʼ do alope calakʼa’ niạ katha roṛ lạgitʼ aleren Probhu Isor do bae kol akatʼmea.

³ Menkhan Neriạren hopon Baruk do ale upạrte ame uskur akatʼmea jemon Babelrenkoakʼ tirem soprotle arko gocʼle se bondikate Babelteko idile.”

⁴ Nonkate Johanan ar lạṛhại phạdkoren sanam subedarko ar sanam hoṛko do Jihudạ disạmre tahen babotre Probhu Isorakʼ hukum bako bataoleda.

⁵ Jihudạren sarecʼ hoṛko okoe do jạt jạtrenko talare chir chạtur akanko tahẽkan ar onḍe khon Jihudạ disạmre girobasokʼ lạgitʼko ruạṛ hecʼlen onkowante Johanan ar subedarko do Misorteko mohnḍayena.

⁶ Noko do onko herel hoṛko, maejiuko, gidrạko ar rajren hoponerako tahẽkana, one Babel rajren rurukhiyạ dolren subedar Nebusaradan do Gedaliạwakʼ tire onkoe doho oṭoletʼko tahẽkan. Noko sãote Jirimiạ nạbi ar Baruk hõe tahẽkana.

⁷ Nonkate onko do Probhu Isorakʼ bako bataoletʼte Misorteko boloyena ar Tahpanhes hạbicʼko senena.

⁸ Ar Tahpanhesre Probhu Isor do Jirimiại metadea,

⁹ “Am do lạṭu lạṭu dhiri hataokate Tahpanheste Pharao rajakʼ doṅgolte bolokʼ horre iṭạte tolakʼ racare Jihudikoakʼ mẽtʼãhã samaṅre onam topakakʼa.

¹⁰ Ona tayom onkom metakoa, Israelren phạdkoren Probhu Isore meneda, ‘ińren guti Babelren raj Nebukadnesar iń hoho ạguiyea ar okaṭakʼ dhiri nonḍeń oko dohoakatʼ ona cetanre uniyakʼ siṅghạsoniń bạisạua; ar ona cetanre uni do acʼakʼ raj tạmbui pasnaotaea.

¹¹ Uni do hecʼkate Misor cetanre jhãpe ema ar okoe gujukʼ lạgitʼko ṭhik dohoakan onko doko gujukʼa, ar okoe bondi idikʼ lạgitʼko ṭhik dohoakan onko doko bondi idiocokʼa ar okoe tarwaṛe lạgitʼko ṭhik dohoakan onko do lạṛhạiteko gujukʼa.

¹² Misorren debotakoakʼ mundilkore uni do seṅgele junḍiyakʼa; uni do onkoakʼ mundilkoe jeretʼ giḍikakʼa ar onkoren debotako bondikateye idikoa. Gukʼpiyicʼ cetʼleka acʼakʼ oyon aṅgrope horog onkage uni do Misorteye oyokʼa ar onḍe khon khạtirjomae oḍok calakʼa.

¹³ Uni do Misor disomre menakʼ Heliopolis reakʼ boṅga khunṭikoe rạpuda ar Misorren debotakoakʼ mundilkoe jeretʼ giḍikakʼa.’ ”