Jirimiạ 42 - সান্তালী বাইবেল

Hoṛko lạgitʼ Jirimiạwakʼ koejoṅ

^1-2 Ona tayom lạṛhại phạdkoren sanam subedarko, Karea hopon Johanan ar Hosaya hopon Jasniạ ar sanam hoṛko do Jirimiạ nạbi ṭhen hecʼkateko menkeda, “Dayakate aleakʼ nehõr baṛe ańjomtaleme ar noko sarecʼ hoṛko lạgitʼ amren Probhu Isor ṭhen koeme. Am do ńitem ńeletʼkangea mitʼ okte ale do ḍhergele tahẽkana ar ńitokʼ do eken thoṛa hoṛge sarecʼ menakʼlea.

³ Amren Probhu Isor ṭhen koeme jemon aleye lạiyale ńitokʼ cetʼle cekaea ar okatele calakʼa.”

⁴ Jirimiạ nạbi do onkoe roṛ ruạṛatʼkoa, “Apeakʼ katha doń ańjomakada. Apeakʼ nehõr lekate iń do aperen Probhu Isor ṭhen khạṭigeń koejoṅa. Ar Probhu Isor okae lạiyạń ona jotogeń baḍae ocopea, ape ṭhen do cetʼge bạń okoya.”

⁵ Unre onko do Jirimiạko metadea, “Amren Probhu Isor do okaṭakʼ baḍae ocole lạgitʼe kolme ar onka baṅle kạmi enḍekhan ale upạrte Probhu Isorge mitʼṭen sạri pạtiạricʼren gohae hoyokʼma.

⁶ Ale okoe ṭhenle koletʼme uni Probhu Isorakʼ kathare ale do tabe akaele tahena baṅ dole kusiyakʼ baṅ do baṅ enhõle ańjomtaea. Ar aleren Probhu Isorakʼ kathale bataotae khan ale do bhage hoyokʼtalea.”

⁷ Inạ gel din tayom Jirimiạ ṭhen Probhu Isorakʼ katha do hecʼena.

⁸ Unre uni do Johanan ar uni soṅgeten sanam lạṛhại phạdkoren subedarko ar sanam hoṛkoe hoho jarwaketʼkoa.

⁹ Uni doe metatʼkoa, “Apeakʼ nehõr joṅakʼ baḍae ocope lạgitʼ okoe ṭhenpe kolledeń uni Israelren Probhu Isor doe meneda,

¹⁰ ‘disạmrepe tahẽlen khan doń benao rakapʼ pea, ar bạń rạputʼ giḍipea; iń doń rohoepea, ar bạń totʼ giḍikapea, ente ape cetanre oka muhiniń ạguakatʼ ona iạte iń do monre dukiń ńamakada.

¹¹ Okoepe botorae kan uni Babelren raj do ar alope botoraea, ente iń do ape sãotege minạńa. Ińgeń rukhiyạpea ar ińge uniyakʼ ti khoniń bańcaopea.

¹² Iń doń dayawapete, uni hõ apeye mãyãwapea ar apeakʼ ṭhạ̃ite arhõe ruạṛ ạgupea.’

¹³ “Menkhan apepe men, ‘ale do disạmre bale tahena’ ar nonkate aperen Probhu Isorakʼ katha bape manao,

¹⁴ arpe men, ‘ale do Misorte senkatele girobasokʼa; onḍe do lạṛhại hõ bale ńela, siṅgạ reakʼ saḍe hõ bale ańjoma, ar jomakʼte hõ bale ṭonṭakʼa,’

¹⁵ enḍekhan Jihudạren sarecʼko Probhu Isorakʼ katha ańjompe. Israelren phạdkoren Probhu Isore meneda, ‘Misorte calakʼpe ṭhik dohoakatʼ khan ar onḍege girobasokʼpe menetʼ khan,

¹⁶ enḍekhan okaṭakʼ lạṛhạipe botorakʼ kan ona do ape tayomtege Misorteye pańja idipea ar ape do onḍegepe gujukʼa.

¹⁷ Noa katha do sạrikana, okoe Misorte senkate girobasokʼ lạgitʼpe goṭa akatʼ onḍe ape do jotoge lạṛhạite, akalte, mahamạritepe gujukʼa; ar oka muhin onko cetanreń paṛao ocoy ona khon onkoren mitʼṭen hoṛ hõ jiwetʼ do bako tahena ar bako paskao daṛeakʼa.’

¹⁸ Israelren phạdkoren Probhu Isore meneda, ‘Jerusalemre okoeko girobasokʼkan onko cetanre cetʼleka ińakʼ edre ar khĩs paṛaokʼ akan onkage Misortepe senlen khan ińakʼ edre do ape cetanre paṛaokʼa. Ape do ṭiṭkạri ar hirkhạwan hoṛpe hoyokʼa; ape ńelte hoṛko do botor caṛhaoakoa ar ape do ạsisankope hoyokʼa. Ar tishõ niạ ṭhạ̃i do bape ńela.’

¹⁹ “E Jihudạren sarecʼ hoṛko Probhu Isor do apeye metapekana, ‘Misorte do alope calakʼa.’ Baḍae dohokakʼpe teheń do apeń sontorkape kana,

²⁰ ape do ạḍi maraṅakʼpe bhul lạgidokʼ kana. Ape do aperen Probhu Isor ṭhen niạ mentepe kolledeńa, ‘ale lạgitʼ aleren Probhu Isor ṭhen koeme; ar uni okae men ona jotowakʼge lạiyaleme ar ale do ona lekagele calakʼa.’

²¹ Iń do teheń apeń metatʼpea menkhan okako babotre roṛ lạgitʼ aperen Probhu Isor do ape ṭhene kol akadiń ona do ńit hõ bape manao akada.

²² Onate ńitokʼ baḍaekakʼpe, okaṭakʼ ṭhạ̃ite senkate girobasokʼpe menetʼkan onḍe do lạṛhạite, akalte ar mahamaritepe gujukʼa.”