Jirimiạ 41 - সান্তালী বাইবেল

^1-2 Elisamaren goṛomtetʼ koṛa Nethaniạ hopon Ismael do raj bõsren hoṛe tahẽkana ar uni do cetan hudạren mitʼṭen rajkạmiyạ hoṛge. Eaeakʼ candore uni do gel hoṛko soṅgekate Mispate Ahikamren hopon Gedaliạ ṭhene hecʼena. Onko do tinre mitʼteko jojomkan tahẽkana, unre Ismael ar uni soṅgeten onko gel hoṛ do Babel rajren bahalicʼ disạm cakʼlaoyicʼ Gedaliạ do tarwaṛeteko gocʼkedea.

³ Ona chaḍa Mispare Gedaliạ sãote okoe Jihudiko tahẽkan ar Babelren okoe sipạhiko onḍeko tahẽkan Ismael do onko hõe gocʼketʼkoa.

^4-5 Gedaliại khũnen dosar hilokʼ ona katha ạuri baḍaerege Sikem, Silo ar Samariạ khon irạlgel hoṛ do akoakʼ gocoko hoyo akan, kicricʼko hõ gạndur gạpur ar akoakʼ hoṛmoko getʼ sirạ sorokate jomakʼ samaṅokʼakʼ jinisko ar kunduruante Probhu Isorakʼ oṛakʼteko hijukʼkan tahẽkana.

⁶ Ar Ismael do onko sãote ńapamokʼ lạgitʼ acʼhõ rakʼ rakʼte Mispa khone oḍok hecʼena. Ar onko sãoteye ńapamen khan uni doe metatʼkoa, “Ahikamren hopon Gedaliạ ṭhen dela bon calakʼa.”

⁷ Onko do nagrahateko boloyen são sãote Ismael ar uni soṅgeten hoṛ do onko hoṛko gocʼketʼkote mitʼṭecʼ kuńreko giḍikatʼkoa.

⁸ Menkhan onko mod khon gel hoṛ do Ismaelko metadea, “Ale do alom gocʼlea. Ale do ṭạnḍire aleakʼ jao, guhum, sunum ar dumur rasakole oko dohoakada.” Ona iạte Ismael do onkoe aṛakʼkatʼkoa, ar eṭakʼko sãote bae gocʼletʼkoa.

⁹ Gedaliạ ar eṭakʼko gocʼkate okaṭakʼ kuńre onkoakʼ mạ̃ṛĩye giḍiletʼtako ona do Israelren raj Bakʼasawakʼ ti khon rukhiyạ ńam lạgitʼ Asa raj do onae benaoan tahẽkana. Ar Ismael do mạ̃ṛĩkote onae giḍi dhapaokada.

¹⁰ Ismael do Misparen sarecʼ sanam hoṛkoe bondiketʼkoa. Onko modre rajren hoponera hõko tahẽkana ar onḍeko doho oṭolen eṭakʼ sanam hoṛ hõko tahẽkana. Rajren rurukhiyạ dolren subedar Nebusaradan do noko hoṛko cetanre Gedaliại doholedea. Ismael do onkoe bondi idiketʼkote Amonrenko ṭhen parom calakʼ lạgitʼe mohnḍayena.

¹¹ Karea hopon Johanan ar uni sãoten lạṛhại phạdkoren sanam subedarko do tinre Ismaelakʼ joto behok reakʼ kathako ańjomkeda,

¹² unre onko do akoren sanam hoṛko soṅgekate uni tulucʼ lạṛhại lạgitʼko oḍok senena. Ar Gibeon reakʼ maraṅ pukhri ṭhen uniko ńamkedea.

^13-14 Ismael do Mispa khon okoeko hoṛ bondikateye idiyetʼko tahẽkana onko do Johanan ar uni sãoten lạṛhại phạdkoren subedarko ńelketʼko khan ạḍiko kusiyena ar Johanan ṭhenko ruạṛ calaoena.

¹⁵ Menkhan Ismael ar uni sãoten irạl hoṛ do Johanan ṭhen khonko dạṛketʼte Amonrenko ṭhenko calaoena.

¹⁶ Ona tayom Johanan ar uni sãoten lạṛhại phạdkoren sanam subedarko do Gibeon khon Mispare sarecʼ sanam hoṛko ruạṛ ạguketʼkoa. Ar Johanan do Gedaliại khũnen tayom Ismaelakʼ ti khon noko sanam lạṛhại phạdko, maejiuko ar gidrạko ar rajkạmiyạkoe bańcaoketʼkoa.

¹⁷ Onko do Misorte calakʼ horre Bethlehem ṭhen Gerut Kimhamre thoṛa dinko tahẽyena.

¹⁸ Onko do Babelrenko botorte Jihudạ khonko dạṛetʼkan tahẽkana, ente Ismael do Babel rajren bahalicʼ disạm cakʼlaoyicʼe gocʼledea.