Jirimiạ 40 - সান্তালী বাইবেল

Jirimiạwakʼ chaḍaokʼ

¹ Jerusalem ar Jihudạren sanam bondiko tinre Babelteko idi ocokʼkan tahẽkana unre Babel rajren rurukhiyạ dolren subedar Nebusaradan do onko sãote Jirimiạ hõ sikṛite tolkateye idikedea. Menkhan uni do Ramare Jirimiại aṛakʼkedea. Ona tayom Probhu Isor do Jirimiạ ṭhen kathae roṛkeda.

² Jirimiại aṛage jokhecʼ Nebusaradan do uniye metade tahẽkana, “Amren Probhu Isor do Jihudạ upạrte niạ maraokʼ reakʼgeye roṛleda.

³ Ar Probhu Isor do ńitokʼ onageye onka akada. Noako do hoyakana, ape do Probhu Isor upạrtepe kại akada ar uniyakʼ aṛaṅ hõ bape ańjomletʼtaea.

⁴ Menkhan teheń iń do amakʼ ti reakʼ tonol baber khoniń chaḍaoketʼmea. Amem khoj khan iń sãote Babeltem sen daṛeakʼa, iń do amiń ńel sãohamea; ar iń tulucʼ calakʼ bam menetʼ khan alom calakʼa. Ńelme, goṭa disạmge am samaṅre menakʼa; amakʼ kusi lekam tahẽ daṛeakʼa.”

⁵ Menkhan Jirimiạ onḍe khon ạuriye calakʼrege Nebusaradan doe menkeda, “Am do Saphanren goṛomtetʼ koṛa, metakʼme Ahikamren hopon Gedaliạ ṭhen ruạṛ calakʼme. Babelren raj do Jihudạ reakʼ sanam nagrahako cetanre uniye bahal akadea. Am do uni sãoten hoṛko talaregem tahẽdaṛeakʼa se amakʼ kusi leka eṭakʼ secʼ hõm sen daṛeakʼa.”

⁶ Unre Jirimiạ do Mispate Ahikamren hopon Gedaliạ ṭhen senkate disạmren sarecʼ hoṛko talareye tahẽyena.

Gedaliạ do Jihudạren disạm cakʼlaoicʼe hoyen

⁷ Ona jokhecʼ Jihudạren lạṛhại phạdkoren okoe subedarko ar onkoren okoeko hoṛ do ṭạnḍireko tahẽkan onko doko ańjomkeda je, Ahikam hopon Gedaliạ do disạm cakʼlaoyicʼe bahal ocoakana ar okoe do Babelte bako bondi idi ocoakan onko reṅgecʼ herel hoponko ar maejiuko ar onkoren hoponko hoponerakoakʼ bhar do uni tire emakana.

⁸ Unre onko lạṛhại phạdko, metakʼme Nethaniạren hopon Ismael, Kareyer hoponkin Johanan ar Jonathan, Tanhumet hopon Seraya, Netophati Ephaeren hoponko ar Makathiren hopon Jasaniạ ar onkoren hoṛko do Mispate Gedaliạ ṭhenko senena.

⁹ Saphanren goṛomtetʼ koṛa, metakʼme Ahikamren hopon Gedaliạ do onko ar onkoren hoṛko ṭhen kiriạkate noa kathae metatʼkoa, “Babelrenko gobolre tahen do alope botorokʼa; disạmre girobasokʼpe ar Babel raj gobolre hijukʼpe, onate ape do bhage hoyokʼtapea.

¹⁰ Iń apnarge Mispareń tahena ar Babelren okoeko abo ṭhenko hijukʼ onko ṭhen ape huyạte kathań roṛa; menkhan ape do darkha rasa, niron din reakʼ pholḍol ar sunumko samṭao jarwaepe ar apeakʼ bhajankore bae dohoepe ar okako ato ar nagrahakope dokhol akatʼ onḍege girobasokʼpe.”

¹¹ Moabrenko, Amonrenko, Edomrenko ar eṭakʼ disạmren sanam Jihudikoko ańjomkeda baṅma Babelren raj do Jihudạ disạmre thoṛa hoṛe bạgi oṭo akatʼkoa ar Gedaliạ do onko cetanre disạm cakʼlaoyicʼ dohoakadea.

¹² Unre onko do okako disạmreko chirchạtur akan tahẽkan onḍe khon Jihudạ disạm reakʼ Mispate Gedaliạ ṭhenko ruạṛ hecʼena. Onko do asambheṛ darkha rasa ar niron din reakʼ pholḍolko jarwakeda.

Gedaliạwakʼ gujukʼ

¹³ Ar Karea hopon Johanan ar ṭạnḍireko tahẽkan lạṛhại phạdkoren subedarko do Mispate Gedaliạ ṭhen hecʼkateko menkeda,

¹⁴ “Am do cetʼ bam baḍaea, Amonren Bakʼalis raj do gocʼme lạgitʼ Nethania hopon Ismaele kol akadea mente? Ahikamren hopon Gedaliạ do onkoakʼ katha bae pạtiạuada.

¹⁵ Unre Karea hopon Johanan do Mispate hecʼkate hape hapete Gedaliại metadea, “Amem hukum lekhan iń do senkate Nethania hopon Ismaeliń gojea, ona do okoehõ bako baḍae daṛeakʼa; uni do cedakʼ ame gocʼmea? Onate okoe Jihudiko am beṛhaeteko jarwa akan onko doko chirchạturokʼa ar Jihudạren sarecʼ hoṛ doko marao utạrokʼa.”

¹⁶ Menkhan Ahikam hopon Gedaliạ do Karea hopon Johanane metadea, “Onka do alom kạmiya. Ismael reaṅ okam menetʼkan ona do ạuṛiyakʼgea.”