Jirimiạ 4 - সান্তালী বাইবেল

¹ Probhu Isore meneda, “E Israel, ruạṛ hijukʼem menetʼ khan iń ṭhenge ruạṛme. Ińakʼ mẽtʼãhã samaṅ khon amren hirkhạwan boṅga murhutʼkom sạṅgiń giḍikako ar bạṛicʼ horte bam senokʼ,

² ar sạriyakʼte, hokte ar dhoromte ‘jiwetʼ Probhu Isor ńutumtem’ kiriạkʼ, enḍekhan boṅgan hoṛ jạtrenko do unireko bhorjoṅa ar uniregeko sarhaokʼa.”

³ Probhu Isor do Jihudạ ar Jerusalemren hoṛkoe metakokana, “Arna ot abad joṅpe ar jạnumko talare itạ do alope era.

⁴ E Jihudạ ar Jerusalemren hoṛko, Probhu Isorakʼ bataotae lạgitʼ apnartetʼ khatnakʼpe, metakʼme apeakʼ ontor reakʼ ghạṭko ocokʼ giḍikakʼpe; ar baṅ khan apeakʼ bạṛicʼ kạmi iạte ińakʼ edre do seṅgel leka salgaokʼa, ar ona do okoehõ bako ĩṛĩcʼ daṛeakʼa.

Utạr secʼ khonakʼ sạjại

⁵ “Jihudạ ar Jerusalemre lại jạhirpe, ‘ar goṭa disạmre sakwa oroṅpe.’ Ar ãṭ aṛaṅte hohoate roṛpe, ‘samṭao jarwakʼpe. Dela, abo do gaṛ nagrahakote bon bolokʼ ma.’

⁶ Sion secʼ mitʼṭecʼ nisạn tul rakabtape. Ar bin bilomte ńir bańcaokʼpe, ente iń do utạr secʼ khon maraṅ jarkharokʼgeń ạgu lạgidokʼ kana.

⁷ Mitʼṭen dhạcri kul do gajaṛ bạgikateye oḍok hecʼakana; ar jạtrenko maraoko lạgitʼ hõ mitʼ hoṛe mohnḍa akana. Amakʼ disạm ujạṛ lạgitʼ uni do acʼakʼ ṭhạ̃i khone oḍok akana. Amakʼ nagrahako do jarkharokʼa, onḍe do celege bako tahena.

⁸ Onate gõṛẽ kicricʼ horokʼkate homor halaṅpe ar jare jarekʼpe, ente Probhu Isorakʼ jolokʼkan edre do abo ṭhen khon baṅ ruạṛ sen akana.”

⁹ Probhu Isore meneda, “Enhilokʼ raj ar cetan hudạren kạmiyạko do dilko adtakoa, ar naekeko ar nạbiko doko ṭhak utạrokʼa.”

¹⁰ Unreń menkeda, “Hae, hae! E Probhu Isor, noko hoṛko ar Jerusalemrenko do ạḍitetʼgem andha akatʼkoa ar nonkam roṛakada, ‘apeakʼ sulukge hoyokʼtapea,’ menkhan tarwaṛe do aleakʼ jiwi hạbicʼem ader akada.”

¹¹ Unre Probhu Isor do onko hoṛ ar Jerusalemren koe metatʼkoa, “Hahaṅkar reakʼ ceḍe ḍuṅgriko khon lolo hoe do ińren hoṛko secʼ hijukʼkana, menkhan phosol oṭaṅ saphae lạgitʼ do baṅkana;

¹² Ińakʼ hukumgete hijukʼkana ar ona hoe reakʼ daṛe do ḍhergea. Ar iń do nonkage onko upạrte ińakʼ bicạr iń jạhira.”

¹³ Ńelpe, uni do rimilko lekae oṭaṅ hijukʼkana. Uniyakʼ rãt gạḍiko do bharḍo leka hijukʼkana ar uniren sadomko do pajhaṛ cẽṛẽ khon hõko coṭkargea. Hae, hae, abo do bon jarkharena!

¹⁴ E Jerusalem, amakʼ ontor reakʼ bạṛicʼakʼko ạrupʼ saphaeme jemon bańcaoem ńam. Ar mon reakʼ bạṛicʼ hudisko hõ ar tinạkʼ dinem dohokakʼa?

¹⁵ Dan nagraha ar Ephrayim reakʼ buruko khon muhin reakʼ katha do lại jạhirokʼ kana.

¹⁶ Jạt jạtrenko ṭhen ar Jerusalemrenko ṭhen niạ katha jạhirpe, “Gherao ekʼsetʼ lạgitʼ lạṛhại phạdko do sạṅgiń disạm khonko hijukʼkana; onko do Jihudạ reakʼ nagrahako upạrte lạṛhại lạgitʼko hohoyetʼkana.

¹⁷ Khetren pahradarko leka onko do Jerusalemko gherao eseda, ente uni do iń upạrteye hul akada. Iń Probhu Isorge noa katha doń meneda.

¹⁸ Amakʼ colon ar amakʼ sanam kạmiko iạtege noako do am upạrteko hecʼakana. Noa do amakʼ dusṭami reakʼ sạjạikana. Noa do ạḍitetʼ haṛhatʼgea; noa do amakʼ ontorre bitʼ akana.”

¹⁹ Hae, ińakʼ mon do, ińakʼ ontor do! Iń doń khadbadaokʼ kana. Hae, ińakʼ ontor, iń doń dhak dhakaokʼ kana. Iń do hape akan bạń tahẽdaṛeakʼ kana, ente sakwa reakʼ saḍe ar lạṛhại reakʼ sabadiń ańjomakada.

²⁰ Muhin cetan muhin do hijukʼkana; goṭa disạmge dhaṅdhaserokʼa. Ar thoṛa ghạṛicʼ khange ińakʼ tạmbuko, ar ackage ińakʼ tạmbu reakʼ orwalko do jarkharokʼtińạ.

²¹ Tinạkʼ din nisạn do tul akaniń ńela, ar tinạkʼ din sakwa reakʼ saḍe doń ańjoma?

²² Probhu Isore meneda, ‘Ińren hoṛko doko lelhagea; onko do bako baḍae akadińạ. Onko do bebuj hopon ar hoponera kanako; onko do bujhạu reakʼ daṛege bạnukʼtakoa. Bạṛicʼakʼ kạmiren guruko kanako, menkhan bogeakʼ kạmi do bako baḍaea.”

²³ Iń do dhạrtiń beṅgetʼada; ona do ạlmạl ar khạligea; sermako secʼ iń beṅgetʼkeda, onḍe do marsal bạnukʼa.

²⁴ Buruko secʼ iń beṅgetʼkeda, onako do dal dalaokʼ kana; ar ḍuṅgriko do ḍikạ ḍakekʼ kana.

²⁵ Beṅgetʼkateń ńelkeda, onḍe do cele hoṛge bạnukʼkoa; ar coṭren cẽṛẽ hõko dạṛ akada.

²⁶ Beṅgetʼkateń ńelkeda Probhu Isor samaṅre, uniyakʼ botoranakʼ edre samaṅre disạm do hahaṅkar hoyakana; uniyakʼ sanam nagrahako do dhaṅ dhaser akana.

²⁷ Probhu Isore meneda, “Goṭa disạmge ujạṛokʼa, menkhan purạ puri do bạń marao utạra.

²⁸ Dhạrti doe homor halaṅa ar coṭ sermako do ńutokʼa, ente ińge noa katha doń meneda. Noa do ińgeń ṭhik dohoakada; ona khon do bạń pạc ruạṛokʼa, ona doń hoeocoygea.”

²⁹ Aswari ar dhinkiạkoakʼ sabad ańjomte nagraharen sanam hoṛ doko dạṛ pạnḍuja. Adom hoṛ do gajaṛteko bolokʼa ar adom hoṛ do maraṅ maraṅ dhiriteko rakapʼa. Mitʼke mitʼ nagraha do ujạṛ akan tahẽna; onḍe do cele hoṛge bako girobasokʼa.

³⁰ E ḍahao marao akan nagraha, am do cetʼem cekaya? Arakʼ kicricʼ ar sona reakʼ gohnate do cedakʼem abhranokʼ kana? Cedakʼ mẽtʼre do aenom kajarem lagaojoṅ kana? Am do ạuṛiyakʼgem sajokʼ kana. Amren dulạṛiạko do amko kurudam kana, onko do amakʼ jiwi hatao lạgitʼko kurumuṭu kana.

³¹ Mitʼṭen maejiuakʼ bedonokʼ reakʼ aṛaṅ leka, pạhil hopone janamokʼ reakʼ bedon leka Sionren hoponerawakʼ rakʼ iń ańjomakada. Uni do sahẽtʼ ńam lạgitʼe ahkaokʼ kana ar ti tiạrkateye meneda, “Hae iń doń acetokʼ kana, khũniyạhiko do ińko seseń kana.”