Jirimiạ 39 - সান্তালী বাইবেল

Jerusalem lạnduṛokʼkan

¹ Jerusalem do nonka leka dokhol hoylena. Jihudạren Sedekiạwakʼ rajokʼ areakʼ bochor reakʼ gelakʼ candore Babelren raj Nebukadnesar do acʼren sanam lạṛhại phạdkoante Jerusalem upạrte hecʼkate nagrahae gherao esetʼkeda.

² Sedekiạ rajakʼ rajokʼ gelmitʼ bochor ponakʼ cando reakʼ areakʼ dinre nagraha pạcri reakʼ mitʼ jaegare bhugạkʼ hoyena .

³ Unre Babel rajren sanam rajkạmiyạko, metakʼme Nergal Saretser, Samgar Nebo, Sarkim ńutuman mitʼṭen maraṅ kạmiạyicʼ; Nergal Saretser ńutuman cetan hudạren mitʼ rajren kạmiạyicʼ ar Babel rajren eṭakʼ sanam kạmiyạko do hecʼkate tala phaṭok duạr ṭhenko duṛupʼena.

⁴ Jihudạren Sedekiạ raj ar uniren sanam lạṛhại phạdko do onko ńelteko dạṛkeda; onko do ńindạ jokhecʼ rajakʼ bagwan ṭhenakʼ banar pạcri reakʼ phaṭok duạrte nagraha khonko oḍokena ar Araba secʼko dạṛkeda.

⁵ Menkhan Babelren lạṛhại phạdko do onkoko khudạu idiketʼkote Jerikho reakʼ bilạn ṭạnḍire Sedekiạko sapʼ tiyokʼkedea. Arko sapʼkede khan Hamat disạm reakʼ Riblare Babelren raj Nebukadnesar ṭhenko idikedea. Ar Nebukadnesar raj do uni sạjạiye reakʼe hukumkeda.

⁶ Babelren raj do Riblare Sedekiạ samaṅrege uniren hoponkoe gocʼketʼkoa ar Jihudạren sanam rajkạmiyạko hõe gocʼketʼkoa.

⁷ Ona tayom uni do Sedekiạwakʼ mẽtʼkine hoṭor totʼketʼtaea ar pitạl reakʼ sikṛite tolkate Babelteko bondi idikedea.

⁸ Babelrenko do rajakʼ oṛakʼre ar hoṛkoakʼ oṛakʼkore seṅgelko jeretʼada ar Jerusalem reakʼ pạcriko rạputʼkeda.

⁹ Ar rurukhiyạ dolren subedar Nebusaradan do unre okoeko nagraharegeko tahẽkan, ar okoe do Babel secʼrenko hoyen ar okoe do disạmre sarecʼko tahẽyen onko bondikate Babelteye idiketʼkoa.

¹⁰ Menkhan rurukhiyạ dolren subedar Nebusaradan do begor jaega jumiyan thoṛa hoṛ do Jihudạ disạmregeye doho oṭokatʼkoa; ona jokhecʼ uni do darkha bagwan ar thoṛa jumi hõe ematʼkoa.

¹¹ Babelren raj Nebukadnesar do Jirimiạ babotre rajren rurukhiyạ dolren subedar Nebusaradan noa hukumadea,

¹² “Unim ńel todarotea; ar jãhãnakʼ alom loksantaea bickom uni okae men onam onkawaea.”

^13-14 Onate rurukhiyạ dolren subedar Nebusaradan, Nebusasban ńutuman mitʼṭen maraṅ hudạren kạmiạyicʼ, Nergal-Sareser ńutuman eṭakʼ ar mitʼṭen cetan hudạren kạmiạyicʼ ar Babel rajren cetan hudạren eṭakʼ kạmiyạko do hoṛ kolkate pahradarkoakʼ raca khon Jirimiạko oḍok ạgukedea. Ar onko do Saphan hopon Ahikamren hopon Gedaliạwakʼ tireko jimạkadea; jemon uni do acʼakʼ oṛakʼteye idiye. Nonkate Jirimiạ do acʼren hoṛko talareye tahẽyena.

¹⁵ Jirimiạ do pahradarkoakʼ racare tinre bondi akane tahẽkana unre Probhu Isorakʼ katha do uni ṭhen hecʼena,

¹⁶ “Kusiren Ebed Melek ṭhen senkate metaeme, Israelren phạdkoren Probhu Isore meneda, ‘bhạlạite do baṅ begor bhạlại talatege iń do noa nagraha upạrte ińakʼ katha purạu lạgitʼ iń calakʼkana. Ar ona do amakʼ mẽtʼ samaṅrege purạukʼa,

¹⁷ menkhan iń do amiń bańcaomea. Am okoeyem botor akokan onkoakʼ tire bam jimạ ocokʼa.

¹⁸ Iń do khạṭige amiń rukhiyạmea; ar bam gocʼ ocokʼa, bickom jãhãlekatege amakʼ jiwim rukhiyạitama, ente am do ińrem bhorsa akana. Iń Probhu Isorge noa katha doń meneda.’ ”