Jirimiạ 38 - সান্তালী বাইবেল

Jirimiạ do Kuńre

¹ Jirimiạ do tinre sanam hoṛkoe galmarao akokan tahẽkana unre Matan hopon Sepaṭiạ, Pasu hopon Gedaliạ, Selemiạ hopon Jukal ar Malkiạ hopon Pashurteko do ona kathako ańjomkeda.

² Jirimiạ doe menetʼ tahẽkana, “Probhu Isor do noa kathae meneda, ‘jãhãege noa nagrahareye tahen uni do lạṛhại talate ar baṅkhan akalte ar baṅkhan mahamạriteye gujukʼa, menkhan okoe Babelrenko ṭhene calakʼ uni do bae gujukʼa. Uni do jãhãlekate acʼakʼ jiwiye rukhiyạitaea.

³ Noa nagraha do khạṭige Babel rajren lạṛhại phạdkoakʼ tire emocokʼa; onko do noako ạidạrijoṅa.’ ”

⁴ Unre rajkạmiyạko do akoren rajko metadea, “Nui hoṛ do gocʼ ocokʼ lek kanae. Ente niạ nagrahare okoe lạṛhại phạdko ar hoṛko sarecʼ menakʼko uni do noako katha menteye as chuṭạu ocoyetʼkoa. Uni do noko hoṛkoakʼ bhạlại do bae khojkana.”

⁵ Sedekiạ raje roṛ ruạṛkeda, “Uni ma apeakʼ jimạrege coṅ menae; raj do ape upạrte ohoe calao daṛelena.”

⁶ Unre onko do Jirimiạko sapʼkedea ar rajren hopon Malkiạwakʼ kuńreko bhoraokedea. Noa kuń do pahradarkoakʼ raca talarege tahẽkana. Ar Jirimiạ do baberte tolkate ona kuńreko pheḍkadea. Ona kuńre dakʼ do baṅ, menkhan eken losotʼge tahẽkana; ar Jirimiạ do ona losotʼreye unumokʼkan tahẽkana.

⁷ Unre raj oṛakʼren mitʼṭen cạkrạ Kusi Ebed Melek doe ańjomkeda, Jirimiạ do kuńreko giḍi akadea. Ar raj do unre Benjạmin reakʼ phaṭok duạrreye duṛupʼ akan tahẽkana.

⁸ Ebed Melek do raj oṛakʼ khon oḍokkate raj ṭhen senkateye menkeda,

⁹ “E ińren kisạ̃ṛ maharaj, noko hoṛ do Jirimiạ nạbi cetanre okako ceka akatʼ ona do behokakʼ kana. Onko do kuńre uniko giḍi akadea; uni do onḍe reṅgecʼteye gujukʼa, ente nagrahare ar piṭhạge bạnukʼa.”

¹⁰ Unre raj do Kusi Ebed Melek noae hukumadea, “Nonḍe khon pegel hoṛ soṅgekom ar kuń khon Jirimiạ rakapʼ ạguiyem jemon aloe gujukʼ.”

¹¹ Unre Ebed Melek do onko hoṛko soṅgekate raj oṛakʼ reakʼ murại latar reakʼ mitʼṭecʼ kandhateye boloyena. Onḍe khon uni do mitʼ bar mare ar oṛecʼ kicricʼkoe hataokeda ar baberte kuńre jirimiạ ṭhene pheḍkeda.

¹² Kusi Ebed Melek do Jirimiại metadea, “Noa mare ar oṛecʼ kicricʼko amakʼ hatlakʼ latarre dohoyme jemon baberte alo hasome.” Ar Jirimiạ doe onkakeda.

¹³ Unre onko do baberte kuń khon uniko or rakapʼkedea. Inạ tayom Jirimiạ do pahradarkoakʼ racaregeye tahẽyena.

Jirimiạ ṭhen Sedekiạwakʼ kukli

¹⁴ Ona tayom Sedekiạ raj do hoṛ kolkate Probhu Isorakʼ oṛakʼte bolokʼ tesarakʼ ṭhạ̃ire Jirimiại hoho ạgukedea. Raj do Jirimiại metadea, “Mitʼ kathań kulimea, menkhan iń ṭhen khon cetʼge alom okoya.”

¹⁵ Unre Jirimiạ do Sedekiại metadea, “Amiń lạiyam khan do ińem gojeńa. Ar solhań emam khan hõ ińakʼ katha do bam ańjomtińạ.”

¹⁶ Onate Sedekiạ raj do danaṅre Jirimiạ ṭhen kiriạyenteye menkeda, “Okoe sahẽtʼe em akawatʼ bon uni jiwetʼ Probhu Isor ńutumte kiriạkateń meneda, am do bạń gocʼmea ar okoe am gocʼme reakʼko kurumuṭukan onkoakʼ tire hõ bạń soprotmea.”

¹⁷ Unre Jirimiạ do Sedekiại metadea, “Israelren phạdkoren Probhu Isore meneda, ‘Babel rajren subedar ṭhen bhagao ocokʼ reakʼem aṅgocetʼ khan amakʼ jiwi do bańcaokʼtama ar noa nagraha do seṅgelte baṅ ḍahao maraokʼa; ar am gharońjrenpe bańcaokʼa.

¹⁸ Menkhan Babel rajren subedar ṭhen bhagao ocokʼ reakʼ bam aṅgoc enḍekhan noa nagraha do Babelrenkoakʼ tire soprotokʼa ar onko do seṅgelte noako ḍahao maraoa; ar amhõ onkoakʼ ti khon rukhiyạ do bam ńama.’ ”

¹⁹ Sedekiạ raj do unre Jirimiại metadea, “Okoe Jihudiko Babelteko idi ocoakan iń do onkoń botor akokana, ente Babelrenko do hoedaṛeakʼa onkoakʼ tireko soprotińạ ar onko do iń tulucʼ bạṛicʼko beohara.”

²⁰ Jirimiại roṛ ruạṛkeda, “Onko do bako soprotmea. Iń okań metamkan onam onkaete Probhu Isorakʼ bataotaeme. Enḍekhan amakʼ bhage hoyokʼa, ar amakʼ jiwim bańcaotama.

²¹ Menkhan bhagao ocokʼ reakʼ bam aṅgocetʼ khan Probhu Isor iń ṭhen okae sodorakatʼ ona do nonka kana:

²² Jihudạ rajakʼ oṛakʼren sarecʼ maejiuko do Babel rajren subedar ṭhenko idi ocokʼa. Onko maejiuko do amko metama, ‘amren gateko do bạṛicʼ horteko idiakatʼmea, ar amko bhagao ocoakatʼmea. Losotʼre jaṅga do thạli akantama; ar amren gateko do amko bạgi akatʼmea.’

²³ Amren sanam bạhuko ar hoponko ar hoponerako do Babelrenko ṭhenko idi ocokʼa. Ar amhõ onkoakʼ ti khon rukhiyạ do bam ńama bickom Babel rajakʼ tirem sapʼ ocokʼa, ar noa nagraha do seṅgelte ḍahao maraokʼa.”

²⁴ Unre Sedekiạ do Jirimiại metadea, “Noa katha jemon okoehõ aloko baḍae, arko baḍaele khan am dom gujukʼa.

²⁵ Ar rajkạmiyạkoko ańjomle khan, am sãote kathań roṛakada mente, ar onko hecʼkateko kulime, ‘raj okam men akawade ar okae men akatʼme ona ale hõ lạiyaleme; arem danaṅle khan amle gocʼmea,’

²⁶ enḍekhan onkom metakoa, ‘raj iń nehõrade tahẽkana jemon Jonathanakʼ oṛakʼte aloe ruạṛ idiyiń, ente onḍeye kolkạń khan iń do gujukʼ hoyokʼtińạ.’ ”

²⁷ Rajkạmiyạko do senkate Jirimiạko kulikede khan raj oka katha memene hukumade tahẽkan onkage uni doe lạiyatʼkoa. Unre onko do cetʼge bako metadea, ente raj sãote uniyakʼ galmarao do okoehõ bako ańjomletʼ tahẽkana.

²⁸ Babelrenko do tinạkʼ din Jerusalemko dokholakatʼ tahẽkan unạkʼ din Jirimiạ do pahradarkoakʼ ona racaregeye tahẽyena.