Jirimiạ 37 - সান্তালী বাইবেল

Jirimiạko hajotedekan

¹ Babelren raj Nebukadnesar do Josiạ hopon Sedekiạge Jihudạren raje hoyocokedea, onate Sedekiạ do Jehoyakimren hopon Koniạ, metakʼme Jehoyakinakʼ ṭhạ̃ire rajokʼe ehopʼena.

² Probhu Isor do Jirimiạ nạbi hotete okako kathae menletʼ onare Sedekiạge cetʼ, uniren gutikoge cetʼ, disạmren hoṛkoge baṅ cetʼ, celege uniyakʼ katha do bako ańjomletʼtaea.

³ Enhõ mitʼdin Sedekiạ raj do Selemiạ hopon Jehukal ar Maseya hopon naeke Sephaniạ tekin Jirimiạ nạbi ṭhen kolketʼkinteye roṛgotʼkada, “Am do dayakate, aboren Probhu Isor ṭhen ale lạgitʼ koeme.”

⁴ Onako oktere Jirimiạ do hoṛko talareye dãṛãnkan tahẽkana, ente unhõ uni do hajotre bae bond ocoakan tahẽkana.

⁵ Unre Babelrenko do Jerusalemko gherao esetʼakatʼ tahẽkana, menkhan onko do tinreko ańjomkeda Pharaoren lạṛhại phạdko do Misor khonko oḍok hecʼakana; unre onko do Jerusalem khonko uṭhạu calaoena.

^6-7 Ona tayom Israelren Probhu Isor do Jirimiạ nạbiye metadea, “Jihudạren raj, okoe do iń ṭhen kulijoṅ lạgitʼe kol akatʼben, uni senkate metae ben, ‘Pharaoren okoe lạṛhại phạdko ape goṛowape lạgitʼko oḍok hecʼakan onko do akoakʼ disạm Misorteko ruạṛ calakʼa.

⁸ Ar ona tayom Babelrenko do ruạṛ hecʼkate noa nagrahako akromona; ar noa dokhola ar seṅgelteko ḍahao maraoa.

⁹ “ ‘Ar noa kathate apeakʼ jiwi do alope eṛe ocoytapea je, Babelrenko do khạṭige ape ṭhen khonko uṭhạu calakʼa. Menkhan onko do bako uṭhạu calakʼa.

¹⁰ Okoe Babelren lạṛhại phạdko apeko akromonetʼpe onko jodi sanamkope bhagaoko ar onkoren eken hạ̃n akan hoṛko tạmbureko tahen, enḍekhan onkoge oḍok hecʼkate niạ nagraha do seṅgelteko ḍahao maraoa.

^11-12 Pharaoren lạṛhại phạdko iạte Babelren lạṛhại phạdko do Jerusalem khonko uṭhạu calao khan Jirimiạ do Benjạminkoakʼ ṭoṭhate acʼakʼ sompotti reakʼ bakhra ńam lạgitʼ Jerusalem bạgikateye mohnḍayena.

¹³ Menkhan tinre uni do Benjạminakʼ phaṭok duạr ṭhene seṭerena, unre Iria ńutuman mitʼṭen pahradarkoren subedar do uni sapʼkedeteye metadea, “Am dom Kạldiko secʼ lạgidokʼ kana.” Nui Iria do Selemiạren hopone tahẽkana, ar Selemiạ do Hanaiạren hopon kanae.

¹⁴ Jirimiại menkeda, “Noa do eṛe katha kana, iń do Kạldiko secʼ do bạnuńa. Menkhan Iria do uniyakʼ katha bae ańjomletʼte Jirimiại sapʼkedea ar rajkạmiyạko samaṅreye idikedea.

¹⁵ Ar onko rajkạmiyạko doko raṅgaoente Jirimiạko dalkedea, ar olokʼicʼ Jonathan oṛakʼre idikateko bondi dohokadea; onko do onage hajot khana lekako benao akatʼ tahẽkana.

¹⁶ Ona hajot khana reakʼ ot latar reakʼ mitʼṭecʼ kandhare Jirimiạko dohokadea. Ar uni do onḍe aema dine tahẽyena;

¹⁷ ona tayom Sedekiạ do hoṛ kolkate uniye oḍok ạgukedea; ar raj do acʼakʼ oṛakʼre oko okoteye kulikedea, “Probhu Isorakʼ jãhãn katha menakʼa?” Jirimiại menkeda, “hẽ, menakʼgea. Uni do arhõe menkeda, am do Babelren rajakʼ tirem soprot ocokʼa.”

¹⁸ Ona tayom Jirimiạ do Sedekiạ raj noa hõe metadea, “Iń do am upạrte, amren gutiko upạrte, noko hoṛko upạrte cetʼ iń kại akatʼte, iń do hajot khanarepe dohoakadińạ?

¹⁹ Okoe ape ṭhen noa kathako nạbiletʼ baṅma, Babel raj do am ar niạ disạm upạrte do bae hijukʼa, onko aperen nạbiko doko okayena?

²⁰ Ńitokʼ do, E ińren kisạ̃ṛ maharaj, nehõrokʼ kạnạń, dayakate ańjomtińme. Am samaṅre iń do noa nehõriń dohoyeda olokʼicʼ Jonathanakʼ oṛakʼte do alom kolkạńạ, arem kolliń khan iń do onḍegeń gujukʼa.”

²¹ Unre Sedekiạwakʼ hukum iạte Jirimiạ do pahradarkoakʼ racareko dohokadea, ar goṭa nagrahare piṭhạ ạuri cabakʼ hạbicʼ din hilokʼ piṭhạ bekʼnaoko do kulhi khon mitʼṭecʼkate piṭhạko emaekan tahẽkana. Ar nonkate Jirimiạ do pahradarkoakʼ racaregeye tahẽyena.