Jirimiạ 36 - সান্তালী বাইবেল

Jirimiạ olakʼ puthi jeredokʼkan

¹ Josiạ hopon Jihudạren raj Jehoyakimakʼ rajokʼ ponakʼ bochorre Probhu Isorakʼ noa katha do Jirimiạ ṭhen sodorena,

² “Am do guṛhạ akatʼ mitʼṭecʼ puthi hataome ar Josiạwakʼ rajokʼ okte khon ehopʼkate teheń hạbicʼ Israel, Jihudạ ar eṭakʼ eṭakʼ jạtrenko reaṅ okaṭakʼ kathań lạiyatʼme tahẽkan onako joto do onare olme.

³ Jihudạren hoṛko cetanre okako muhin paṛao ocoy reakʼ kathań ṭhik dohoakatʼ onko do onako muhin reakʼ katha ańjomkate pasere pase bạṛicʼ hor khonko ruạṛ botejokʼ; ar jemon onkoakʼ ghạṭ ar kạiyiń ikạ daṛeatako.”

⁴ Unre Jirimiạ do Neriạren hopon Baruke hohoadea ar Probhu Isor okaṭakʼ katha roroṛe metade tahẽkan uniyakʼ moca khon ańjomkate Baruk do guṛhạwakʼ puthire onako jotowakʼe olkeda.

⁵ Ona tayom Jirimiạ do Baruke metadea, “Iń do Probhu Isorakʼ oṛakʼte bolokʼ iń baron ocoakante onḍe do bạń bolo daṛeakʼa.

⁶ Onate am do mitʼṭecʼ upạs dinre Probhu Isorakʼ oṛakʼte bolokate noa puthire olakʼ Probhu Isorakʼ katha hoṛkom paṛhao ańjomakoa one oka do ińakʼ moca khonem ańjomakatʼ. Ar Jihudạren hoṛko okoe do akoakʼ nagraha khonko hijukʼ onko sanamko hõ onam paṛhao ańjomakoa.

⁷ Pasecʼ onko do Probhu Isor ṭhenko koejoṅa ar akoakʼ bạṛicʼ hor khonko ruạṛ hijukʼa, ente noko hoṛko birudrege Probhu Isor do edre ar khĩs reakʼ kathae roṛakada.”

⁸ Jirimiạ do Neriạren hopon Baruk oka kạmi reakʼ kathae metade tahẽkan uni do jotogeye kạmikeda; uni do Probhu Isorakʼ oṛakʼre ona puthi khone paṛhao ańjomatʼkoa.

⁹ Josiạ hopon Jihudạren raj Jehoyakimakʼ rajokʼ mõṛẽakʼ bochor reakʼ areakʼ candore Jerusalemren sanam hoṛko ar Jihudạ nagrahako khon hecʼakan hoṛko lạgitʼ Probhu Isor samaṅre upạs reakʼ kathae lại jạhirkeda.

¹⁰ Unre Probhu Isorakʼ oṛakʼ reakʼ nãwã phaṭok duạr ṭhen cetan reakʼ bakher racare Saphan hopon Gemariạ olokʼicʼakʼ kandhare teṅgokate Baruk do ona puthi khon Jirimiạ reakʼ kathako sanam hoṛkoe paṛhao ańjomatʼkoa.

¹¹ Saphanren goṛomtetʼ koṛa, metakʼme Gemariạren hopon Mikạ do tinre ona puthi khon Probhu Isorakʼ sanam kathakoe paṛhao ańjomatʼkoa,

¹² unre uni do raj oṛakʼ talare olokʼicʼakʼ kandhateye boloyena; onḍe do sanam rajkạmiyạko, metakʼme olokʼicʼ Elisama, Semayaren hopon Delaya, Akborren hopon Elnathan, Saphan hopon Gemariạ, Hanani hopon Sedekiạ ar eṭakʼ sanam mukhiyạkoko duṛupʼ akan tahẽkana.

¹³ Baruk do ona puthi khon okae paṛhao ańjomatʼko Mikạ do onko rajkạmiyạko ṭhen ona jotowakʼe lạikeda;

¹⁴ unre sanam rajkạmiyạko do Nethaniạl hopon Jehudi hotete Baruk ṭhenko roṛgotʼkada, “Okaṭakʼ puthi khon hoṛkom paṛhao ańjomatʼko ona do nonḍe ạguiyme.” Nethaniạl do Selemiạren hopone tahẽkana, ar Selemiạ do Kusren hoponge. Unre Neriạren hopon Baruk do ona puthi hataokate onko ṭhene senena.

¹⁵ Onko do Barukko metadea, “Dayakate ma duṛupʼme ar ona paṛhao ańjomaleme.” Unre Baruk do onkoe paṛhao ańjomatʼkoa.

¹⁶ Onko do sanamakʼ katha ańjomkate botorokʼ salakʼ am iń secʼko beṅgetʼana ar Barukko metadea, “Noako reakʼ joto katha do raj jạhiraetege hoyokʼa.”

¹⁷ Ona tayom onko do Barukko kulikedea, “Lạiyaleme noako katha do cekatem olkeda? Jirimiạwakʼ moca khon ańjomkate cetʼ noa kom olakada?”

¹⁸ Baruke roṛ ruạṛkeda, “Hẽ, uni do noako kathae menakada ar iń do kạlite noa puthireń ol akada.”

¹⁹ Unre rajkạmiyạko do Barukko metadea, “Do, senkate okokokʼ ben, am hõ ar Jirimiạ hõ. Ar okoe hõ jemon aloko baḍae daṛeakʼ okare menakʼbena mente.”

²⁰ Ar rajkạmiyạko do olokʼicʼ Elisamawakʼ kandhare ona guṛhe puthiko doho oṭokada ar bakher racare raj ṭhenko senena ar jotowakʼko baḍae ocokedea.

²¹ Unre raj do ona puthi ạguiy lạgitʼ Jehudiye kolkadea. Ar Jehudi do olokʼicʼ Elisamawakʼ kandha khon ona guṛhe puthi ạgukate raj ar uni aṛere teṅgo akan sanam rajkạmiyạko samaṅre ona paṛhao ańjomakoe ehopʼena.

²² Unre areakʼ cando tahẽkana. Ar raj do rabaṅ din khemao reakʼ oṛakʼreye duṛupʼ akan tahẽkana ar uni samaṅre seṅgel reakʼ karahere seṅgel do jolokʼkan tahẽkana.

²³ Jehudi do ona puthi khon pe pon sakame paṛhaoketʼ khan raj do olokʼicʼakʼ churite ona hĩskoe getʼ kuṭrạkeda ar seṅgelreye khadlekeda; nonkate purạ puthige seṅgelteye atar giḍikada.

²⁴ Ar onko do okoehõ bako toraslena raj hõ baṅ ar uniren golamko modren tinạkʼko ańjomketʼ onko hõ baṅ. Ar akoakʼ kicricʼko hõ bako oṛecʼletʼtakoa.

²⁵ Elnathan, Delaya ar Gemariạ do ona puthi alo rapag lạgitʼ rajko nehõrade tahẽkana, menkhan raj do onkoakʼ katha bae ańjomletʼtakoa.

²⁶ Ona bodolte uni do olokʼicʼ Baruk ar Jirimiạ nạbi tạkin sapʼ ạgukin lạgitʼ raj hopon Jirohomel, Asrayelren hopon Sorae ar Abdiyelren hopon Selimi takoye hukumatʼkoa. Menkhan Probhu Isor do unkine oko dohokatʼkinạ.

²⁷ Jirimiạwakʼ nạbi kathako Baruk okaṭakʼ puthireye olletʼ raj do onae jeretʼ giḍikatʼ khan Probhu Isorakʼ noa katha do Jirimiạ ṭhen hecʼena,

²⁸ “Ar Jihudạren raj Jehoyakim okaṭakʼ puthiye jeretʼ giḍiletʼ ona pạhilakʼ puthire okako ol tahẽkan ona jotoge ar mitʼṭecʼ guṛhạ puthire olme.

²⁹ Ona chaḍa Jihudạren raj Jehoyakimem metaea, Probhu Isore meneda, ‘puthi jeretʼ giḍikateyem kulikana Jirimiạ do cedakʼ ona puthireye ol akada, Babelren raj do khạṭige hecʼkate noa disạme jarkhara ar manwa ar janwarkoe maraokoa?

³⁰ Ona iạte am reaṅ iń Probhu Isorgeń meneda, Dạudakʼ siṅghạsonre duṛubokʼ lạgitʼ amren do celege jiwetʼ bako tahena; amakʼ mạ̃ṛĩ do bahrete giḍi ocokʼa siń reakʼ setoṅ lạgitʼ ar ńindạ reakʼ rataṅ lạgitʼ.

³¹ Iń do am ar amren hoponko ar amren kạmiyạkoakʼ behokakʼko iạteń sạjạipea; iń do ape upạrte okako muhin reakʼ kathań roṛakatʼ ona sanamakʼge ape cetanre, Jerusalemre ar Jihudạren hoṛko cetanreń paṛao ocoya, ente ape do ińakʼ katha bape ańjomletʼtińạ.’ ”

³² Unre Jirimiạ do ar mitʼṭecʼ guṛhạ dohoakatʼ puthi hataokate Neriạren hopon Baruke emadea; ar okaṭakʼ puthi do Jihudạren raj Jehoyakim seṅgelteye jeretʼ giḍiletʼ ar onare okako ol tahẽkan onako kathage Jirimiạwakʼ moca khon ańjomkate Baruk do arhõe olkeda. Ar ona lekan arhõ aema kathako hõ ona sãote juṭucʼ idiyena.