Jirimiạ 35 - সান্তালী বাইবেল

Rekabiạkoakʼ batao

¹ Josiạ hopon Jihudạren raj Jehoyakime rajokʼ oktere Probhu Isor do Jirimiại metadea,

² “Am do Rekabiạ bõsren hoṛko ṭhen senokʼme ar ińakʼ oṛakʼ reakʼ mitʼṭecʼ kandhate hijukʼ metakom ar darkha rasa ńũ ocokom.”

³ Unre iń do Habasianiạ ren goṛomtetʼ koṛa, metakʼme Jirimiạren hopon Jasaniạ ar uniren sanam boeha ar hoponko, metakʼme Rekabiạkoren goṭa bõsrengeń ạguketʼkoa.

⁴ Iń do Probhu Isorakʼ oṛakʼte Isorren hoṛ Igdaliaren hopon Hananren hoponkoakʼ kandhateń idiketʼkoa. Ona do Salumren hopon pahradar Maseyawakʼ kandha cetanre kạmiyạkoakʼ kandha aṛere tahẽkana.

⁵ Ona tayom iń do onko Rekabiạko samaṅre darkha rasate perecʼ ṭhiliko ar bạṭikoń ạguketʼte onkoń metatʼkoa, “Ape do darkha rasa ńũiype.”

⁶ Menkhan onko doko roṛ ruạṛkeda, “Darkha rasa do bale ńũiya, ente aleren hapṛam Rekabiạren hopon Jonadab do noa reakʼe mana akatʼlea, ‘ape se aperen hoponko darkha rasa do alope ńũiya.

⁷ Ona chaḍa ape do tishõ oṛakʼ duạr alope benaojoṅa, ir hõ alope ira se darkha bagwan hõ alope kirińjoṅa ar cas hõ alope casa; menkhan jao okte tạmburege girobasokʼpe. Enḍekhan oka disạmre bidisiạko lekape tahen onḍe do ḍher dinpe tahẽdaṛeakʼa.’

⁸ Aleren hapṛam Rekabiạren hopon Jonadab okae hukum akatʼle ona do jotogele manao ạgu akada. Ale ar aleren bạhuko se gidrạko okoege darkha rasa do bale ńũ akada,

⁹ ar girobasokʼ lạgitʼ oṛakʼ hõ bale benaoleda se darkha bagwan, anaj se phosol reakʼ khet hõ bale benao joṅan tahẽkana.

¹⁰ Ale do tạmbukorele girobasokʼkan tahẽkana ar aleren hapṛam Jonadab okae hukum akatʼle ona jotoge purạtele manao ạguyetʼkana.

¹¹ Menkhan Babelren raj Nebukadneser do tinre niạ disạme hatkeda unrele menkeda, ‘Babel ar Aramren lạṛhại phạdko ṭhen khon dela bon ńir paskaokʼma ar Jerusalemte bon calakʼma.’ Onate ale do Jerusalemregele tahẽyena.”

^12-13 Ona tayom Israelren phạdkoren Probhu Isor do Jihudạ ar Jerusalemren hoṛko ṭhen senkate noa katha lạlạiye metadińạ, “Iń Probhu Isorgeń meneda, cedakʼ ińakʼ sikhnạt do bape ataṅeda ar ińakʼ kathako bape manaoeda?

¹⁴ Rekabiạren hopon Jonadab do acʼren hoponko darkha rasa ńũiye baronletʼkoa ar onko do ona hukumko bataoleda. Ar teheń hõ onko do darkha rasa bako ńũiyeda, ente onko do akoren hapṛamkoakʼ hukumko bataoetʼkana. Menkhan iń do aema dhao apeń metatʼpe tahẽkanre hõ, ińakʼ katha do bape ańjomletʼtińạ.

¹⁵ Iń do ińren sanam gutiko, metakʼme nạbiko aema dhao ape ṭheniń kolletʼkoa. Onkoko metatʼpe tahẽkana, ‘bạṛicʼ hor khon ruạṛpe ar colonko bhageytape; ar debotako sewawako lạgitʼ do alope pańjakoa. Enḍekhan okaṭakʼ disạm do ape ar aperen hapṛamkoń em akatʼpe onḍepe thamgạḍi akanpe tahena.’ Menkhan ape do ińakʼ katha bape moneyada ar ańjom hõ bape ańjomleda.

¹⁶ Rekabiạren hopon Jonadabren bõsko do akoren hapṛamkoakʼ emakʼ hukumko batao ạguyetʼkana, menkhan ape do ińakʼ katha bape ańjomletʼtińạ.

¹⁷ “Ona iạte iń Israelren phạdkoren Probhu Isoriń meneda, ‘ańjompe, Jihudạ ar Israelreko girobasokʼ kan mimitʼko upạrte oka muhin reakʼ kathań men akatʼ ona reakʼ jotowakʼ do onko cetanreń paṛao ocoya. Iń do onkoń metatʼko tahẽkana, menkhan bako ańjomletʼtińạ; hohowatʼko tahẽkạnạń, menkhan bako goṅledeńa.’ ”

¹⁸ Ona tayom Jirimiạ do Rekabiạkoe metatʼkoa, Israelren phạdkoren Probhu Isore meneda, “Ape do aleren hapṛam Jonadabakʼ hukumpe pańjayetʼkante ona lekape calakʼ kana ar uniyakʼ hukum lekagepe kạmikana.

¹⁹ Ona iạte iń do Israelren phạdkoren Probhu Isoriń meneda, iń sewawạń lạgitʼ Rekabiạren hopon Jonadabakʼ bõsre tishõ hoṛkoakʼ khạnti do baṅ hoyokʼtakoa.”