Jirimiạ 34 - সান্তালী বাইবেল

Sedekiạ raj lạgitʼ Probhu Isorakʼ katha

^1-2 Babelren raj Nebukadnesar, ar uniren sanam lạṛhại phạdko ar uni tabe reakʼ sanam rajosṭiko ar jạtrenko tinre Jerusalem ar ona beṛhaeteakʼ nagrahako upạrteko lạṛhạikan tahẽkana unre Israelren Probhu Isor do Jirimiại metadea uni do jemon Jihudạren Sedekiạ raj ṭhen senkateye metae, “Iń Probhu Isorge noa katha doń meneda, noa nagraha do Babel raj ṭheniń soprota ar uni do seṅgelteye ḍahao maraoa.

³ Ar uniyakʼ ti khon do bam rukhiyạ daṛeakʼa; am do khạṭige sapʼkate uniyakʼ tireko soprotmea; ar apnar mẽtʼte Babelren rajem ńelea; uni do am samaṅre kathae roṛa, ar am do Babeltem calakʼa.

⁴ “E Jihudạren Sedekiạ raj, enhõ ińakʼ katha ańjomme. Am reaṅgeń menetʼkana, tarwaṛete am do bam gujukʼa;

⁵ menkhan suluktegem gujukʼa. Amren hapṛamko, metakʼme am lahate okoe rajko tahẽkan onko manot emako lạgitʼ cetʼleka dhupko jeretʼetʼ tahẽkan onkage hoṛko do am manotme lạgitʼ dhupko jereda ar ‘haere hae kisạ̃ṛtale do’ niạ menteko halaṅ homora. Iń Probhu Isorge noa katha doń meneda.”

⁶ Unre Jirimiạ nạbi do Jerusalemre Jihudạ raj Sedekiạ onako kathae metadea.

⁷ Ona jokhecʼ Babel rajren lạṛhại phạdko do Jerusalem, Lakis ar Aseka upạrteko lạṛhạikan tahẽkana, ente Jihudạ disạm talare eken pạcrite esetʼ nagrahakoge ạidạri lạgitʼ sarecʼ tahẽkana.

Golamkoakʼ chaḍaokʼ reakʼ

⁸ Probhu Isor do Jirimiạ tulucʼ arhõ kathae roṛkeda. Noa lahare Sedekiạ raj do Jerusalemren sanam hoṛko sãote golamkoakʼ chaḍaokʼ reaṅ niạme goṭa akatʼ tahẽkana.

⁹ Ona niạm do hoyokʼ kana, joto hoṛge akoren Ibri guti kạ̃ṛmĩko aṛakʼkoa; ar Jihudi boeha do okoehõ guti mente bako doho daṛeakoa.

¹⁰ Onate rajkạmiyạko ar sanam hoṛko do niạ hukumko manaokeda ar akoren guti ar kạ̃ṛmĩko aṛakʼko lạgitʼko rạjiyena ar golam mente bako dohokoa menteko ṭhikkeda. Unre onko do akoren gutikoko aṛakʼkatʼkoa.

¹¹ Menkhan tayomte onko do monko ạcurketʼtakoa ar okoeko guti ar kạ̃ṛmĩkoko aṛakʼletʼko onko ruạṛ ạgukate arhõ golamko benaoketʼkoa.

¹² Ona iạte Probhu Isor do Jirimiại metadea,

¹³ “Iń Israelren Probhu Isoriń meneda, aperen hapṛamko tinre Misor disạm khon, golam oṛakʼ khoniń oḍok ạguletʼkoa unre onko do noa bondobos lekateń metatʼko tahẽkana,

¹⁴ ‘jãhãe Ibri boeha acʼte ape ṭhene ạkhriń akan khan enḍekhan eaeakʼ bochorre uni do aṛakʼkae hoyokʼtapea. Uni do turui bochor ape ṭhen golame khaṭaokʼa ar ona tayom do aṛakʼkae hoyokʼa.’ Menkhan aperen hapṛamko do ińakʼ katha bako ańjomleda, ar ińakʼ katha mone hõ bako moneyada.

¹⁵ Thoṛa dinge hoyakana ape do monpe ạcur akatʼtapea ar ińakʼ mẽtʼre oka ṭhikakʼ kan, metakʼme ape sanamkoge aperen Ibri boehako aṛakʼko reakʼpe lại sodor akada. Ar ape do ińakʼ oṛakʼre iń samaṅre ińakʼ niạmko manao lạgitʼpe rebenlena.

¹⁶ Menkhan ńitokʼ dope ạcur calao akana ar ińpe henosta akadina; ape do okoe guti ar kạ̃ṛmĩko akoakʼ kusi leka calakʼ lạgitʼpe aṛakʼletʼko onko do ruạṛ ạgukate arhõ aperen guti ar kạ̃ṛmĩpe benao akatʼkoa.

¹⁷ “Ona iạtegeń meneda, ape do bape bataoletʼtińạ, ente aperen jạt bhạiko lạgitʼ ape do chaḍao reakʼ bape lại jạhirleda. Ona iạte ńitokʼ iń do ape lạgitʼ chaḍaokʼ reakʼ iń lại sodoreda; ona chaḍaokʼ do hoyokʼ kana lạṛhại, akal ar mahamạrige. Iń do nonka dosań hoyocoe tapea ona ńelte dhạrtiren sanam rajosṭiren hoṛ do botorteko thar tharaokʼa.

^18-19 Jihudạ ar Jerusalemren mukhiyạko, rajkạmiyạko, naekeko ar disạmren sanam hoṛko do kuṭrạ akade mĩhũ talate taṛam paromkate ińakʼ niạm pańjae lạgitʼko gokʼleda, menkhan onko do ińakʼ niạmko rạputʼ akada ar ona gokʼakʼ do bako purạuleda.

²⁰ Ona iạte okoe bạiriko onko gocʼko reakʼko menetʼkan onko bạirikoakʼ tiregeń soprotkoa. Onkoakʼ mạ̃ṛĩ do coṭren cẽṛẽko ar birren janwarkoakʼ jomakʼge hoyokʼa.

²¹ “Ar okoe bạiriko do Jihudạren raj Sedekiạ ar uniren kạmiyạko gocʼkoko menetʼkan iń do onko bạirikoakʼ tirege onkoń soprotkoa. Babel rajren okoe lạṛhại phạdko ape khonko ruạṛ sen akan iń do onkoakʼ tirege apeń soprotpea.

²² Iń do onkoń hukumakoa ar niạ nagrahategeń ruạṛ ạgukoa. Onko do noa nagraha upạrteko lạṛhạiya arko hatjona ar onako jeretʼ giḍikakʼa. Iń do Jihudạ nagrahakoń marao ar ujạṛakʼ iń hoeocoya.”