Jirimiạ 33 - সান্তালী বাইবেল

As reakʼ gokʼ katha

¹ Jirimiạ do unhõ pahradarkoakʼ racare bondi akane tahẽkana ar nonkan oktere Probhu Isorakʼ katha do dosar dhao uni ṭhen sodorena,

² Probhu Isore menkeda, “Ińakʼ ńutum do Probhu kana, iń doń kạmikana; ar okaṭakʼ iń kạmi ona reakʼ doń goṭa lahayetʼkana ariń kạmi sạtetʼkana. Ińiń meneda,

³ hohoạńme, ar iń doń roṛ ruạṛama ar nonkan maraṅ ar nonkan danaṅakʼko reaṅ kathań lạiyama one oka do bam baḍaekan.

^4-5 Babelrenko sãote lạṛhại jokhecʼ pạcri sãote benao akatʼ pinḍhạ ar tarwaṛe khon rukhiyạkʼ lạgitʼ noa nagraha reakʼ okako oṛakʼ-duạr ar Jihudạ reakʼ raj dolanko rạputʼ hoylen onako do onko hoṛkoakʼ mạ̃ṛĩkote perejokʼa one okoe do ińakʼ edre ar raṅgao iạteń gocʼko. Onkoakʼ sanam dusṭami iạte niạ nagraha secʼ khon ińakʼ mẽtʼãhãń doń betʼakatʼtińạ. Ar iń Israelren Probhu Isorge noa katha doń meneda.

⁶ “Enhõ iń do napae hoṛmoteń dohoya ariń ran bogea; ińren hoṛkoń ran bogekoa ar sạriyakʼ reakʼ asambheṛ suluk nirại ar khạtirjoma iń khulạuakoa.

⁷ Iń do Jihudạ ar Israelren hoṛko bondi dosa khoniń ruạṛ ạgukoa ar onkoakʼ disạm do arhõ lahate lekań benao ruạṛa.

⁸ Ar iń upạrte okako kại akatʼ ona khoniń saphakoa ar iń upạrteko kạmi akatʼ onkoakʼ sanam bedhoromakʼ ar hulko hõń ikạitakoa.

⁹ Unre niạ nagraha do dhạrtiren sanam jạtrenko samaṅre ińe rạskạ ocoyińạ are manot ocoyińạ are sarhao ocoyińạ. Ar uni okakoń bhạlạiye ona do onko jạtrenko ańjom ńama, ar uniń em akawade asambheṛ bhạlại ar suluk ńelte hoṛko doko botorokʼa arko thar tharaokʼa.

^10-11 “Ape do niạ ṭhạ̃i reaṅpe meneda, ‘noa do ujạṛ akana; nonḍe do manwa se janwar hõ bạnukʼkoa.’ Menkhan Jihudạ reakʼ okako nagraha ar Jerusalem reakʼ okako ḍahar do ujạṛge menakʼ, one okare manwa se janwar hõ bako tahenkan onḍe do arhõ rạskạ ar hulạs reakʼ aṛaṅ ańjomokʼa ar jãwãe koṛa ar bạhu kuṛiyakʼ aṛaṅ hõ ańjomokʼa; ar okoe Probhu Isorakʼ oṛakʼre gun manao reakʼ samaṅokʼakʼko ạgui onkoakʼ aṛaṅ hõ ańjomokʼtakoa. Onko doko mena, ‘phạdkoren Probhu Isor sarhaoepe, ente Probhu Isor doe bhagegea, ar uniyakʼ daya do jaejug hạbicʼ tahẽakae tahenkana.’ Iń do lahate lekage niạ disạm reakʼ dosań ạgu ruạṛa.

¹² Noa potit jumi, okare manwa ar janwar celege bạnukʼko, onḍe ar onḍenakʼ sanam nagraha ar atoko do arhõ gukʼpiko ar bhiḍiko lạgitʼ ạtiń ṭạnḍige hoyokʼa.

¹³ Usul ar copotʼ buru ṭoṭha reakʼ sanam ato ar nagrahakore, Benjạmin ṭoṭhakore, Jerusalem beṛhaete ar Jihudạ ar Negeb reakʼ sanam ato ar nagrahakore bhiḍi gukʼpiko do akoren bhiḍiko lekha lekhateko chaṛ sạ̃itạukoa. Iń Probhu Isorge noa katha doń meneda.”

¹⁴ Probhu Isore meneda, “Israel ar Jihudạren hoṛko ṭhen oka bhạlại reakʼ iń gokʼletʼ ona okteko do hijukʼkana ar iń do onań purạua.

¹⁵ Onako dinre ar onako oktere iń do Dạudakʼ bõs khon mitʼṭecʼ dhorom reakʼ mitʼṭecʼ ḍạr iń omon ocoya; uni do dhạrtire dhorom ar sạriyakʼteye bicạra.

¹⁶ Ona jokhecʼ Jihudạren hoṛ do bańcaoko ńama ar Jerusalemren hoṛ do khạtirjomako girobasokʼa. Uni do niạ ńutumgeye hoho ocokʼa, ‘Probhu Isorge aboakʼ dhorom do.’

¹⁷ Israel reakʼ siṅghạsonre duṛubokʼ lạgitʼ Dạudakʼ bõsren hoṛ do tishõ bako khạntikʼa.

¹⁸ Iń samaṅre teṅgokate jaoge jeredokʼ samaṅokʼakʼ lạgitʼ, jomakʼ samaṅokʼakʼ lạgitʼ ar janwar samaṅokʼakʼ lạgitʼ Liwi naekeko modre hõ bako khạntikʼa.”

¹⁹ Inạ tayom Probhu Isorakʼ noa katha do Jirimiạ ṭhen hecʼena,

²⁰ “Iń Probhu Isorgeń meneda, siń ar ńindạ lạgitʼ iń bandhao akatʼ ińakʼ bondobospe rạputʼ daṛeakʼ khan, onate okte nạpitre siń ar ńindạ baṅ hoyokʼ,

²¹ enḍekhan ińren guti Dạud lạgitʼ ar iń samaṅre teṅgokate okoe do sekʼwa reakʼko kạmikan onko Liwi naekeko lạgitʼ oka bondobosiń bandhao akatʼ ona hõ rạpudokʼa ar Dạudakʼ siṅghạsonre rajokʼ lạgitʼ uniren cele hoponge bako tahena.

²² Ińren guti Dạudren hoponko ar okoe Liwiko do iń samaṅre teṅgokate sekʼwa reakʼko kạmikan onko do sermaren ipil lekako saṅgekʼa, ar ohogeko lekha caba daṛelena.”

²³ Ona tayom Probhu Isor do Jirimiạ arhõe metadea,

²⁴ “Hoṛko okako menetʼ, baṅma, ‘Probhu Isor do Israel ar Jihudạren hoṛkoe bachaoan tahẽkana, menkhan ńitokʼ do onkoe nihạ̃t giḍikako kana,’ ona do cetʼ bam kheyaletʼ kana? Onko do ińren hoṛko nihạ̃tetʼkoa ar jạtrenko lekate bako ńeletʼkoa.

²⁵ Menkhan iń Probhu Isorgeń meneda, siń ar ńindạ lạgitʼ ińakʼ bondobos ar serma ar pirthimi lạgitʼ ạriko bạń bandhao akatʼ khan,

²⁶ enḍekhan Jakob ar ińren guti Dạud bõsrenko hõń nihạ̃t giḍikakoa ar Abraham, Isạhak ar Jakobakʼ bõsrenko cetanre rajokʼ lạgitʼ Dạud bõsrenko khon mitʼ hoṛ hõ bạń bachaojoṅa. Iń do khạṭige onkoakʼ bhage dosań ruạṛkatakoa ariń mãyãwakoa.”