Jirimiạ 32 - সান্তালী বাইবেল

Jirimiạ do mitʼṭecʼ jumiye kirińkeda

¹ Jihudạren raj Sedekiạwakʼ rajokʼ gelakʼ bochorre, metakʼme Nebukadnesarakʼ rajokʼ gel irạlakʼ bochorre Probhu Isorakʼ katha do Jirimiạ ṭhen hecʼena.

² Unre Babel rajren lạṛhại phạdko do Jerusalemko gherao esetʼ akatʼ tahẽkana ar Jirimiạ do raj oṛakʼ reakʼ pahradarkoakʼ racareko bondi akade tahẽkana. Uni do onḍegeye tahẽkana,

³ ente Jihudạ raj Sedekiạ do noa katha menteye bondi ocoledea, “Am do noa katham nạbi akada, Probhu Isore meneda, ‘noa nagraha do Babel rajakʼ tireń soprota ar uni do noae hata.

⁴ Jihudạ raj Sedekiạ do Babel rajakʼ ti khon ohoe rukhiyạ daṛelena uni do khạṭige onkoren rajakʼ tireye soprot ocokʼa. Uni do Babel raj tulucʼ samna sạmni kathae roṛa ar acʼakʼ mẽtʼte uniye ńelea.

⁵ Babelren raj do Sedekiại idiyea ar tin hạbicʼ uni secʼ bạń beṅged unhạbicʼ uni do onḍegeye tahena. Ona iạte Babelrenko tulucʼpe lạṛhạilenre hõ ape do bape jitạu daṛeakʼa.’ ”

⁶ Unre Jirimiại menleda, “Probhu Isor do iń metadińạ,

⁷ iń kaka Salumren hopon Hanamel do iń ṭhen hecʼkateye mena, ‘Anathotre ińakʼ okaṭakʼ jumi menakʼ ona kirińme, ente sor peṛa lekate ona kiriń reakʼ ạidạri do amakʼge menakʼa.”

⁸ Unre Probhu Isorakʼ katha leka iń kakaren hopon Hanamel do pahradarkoakʼ racare iń ṭhen hecʼkateye metadińạ, ‘Benjamin ṭoṭhako reakʼ Anathotre ińakʼ oka jumi menakʼ ona do amge hataome. Ona chaḍao ar dokhol reakʼ hok ạidạri do amakʼ kangea onate amge ona do kirińme.’ “Ińiń baḍaekan tahẽkana noa do Probhu Isorakʼ katha kana:

⁹ Onate iń kakaren koṛa Hanamel ṭhen khon Anathot reakʼ ona jumiń kirińkeda ar mitʼsae irạlgel eae gram rupạń soṅadea.

¹⁰ Iń do dolelreń suhiyada, ariń mohor chapada ar gohako hõń dohoketʼkoa ar tulạte ona rupạń soṅadea.

¹¹ Iń do barea dolelgeń hataokeda. Niạm lekate mohor chapakʼ mitʼṭecʼ ar begor mohor chapakʼ eṭakʼakʼ mitʼṭecʼ.

¹² Ona tayom do iń kakaren koṛa Hanamel samaṅre okoe gohako dolelreko suhiletʼ onko ar pahradarkoakʼ racareko duṛupʼ akan tahẽkan sanam Jihudiko samaṅre ona dolel do Neriạren hopon Barukiń emadea. Nui Neriạ do Maseyaren hopone tahẽkana.

^13-14 Onko samaṅrege iń do Israelren Isor phạdkoren Probhuakʼ noa hukum Barukiń emadea, ‘am do jumi kiriń reakʼ mohor chapatʼ ar baṅ mohor chapakatʼ ona banar dolelge hataokate hasa reakʼ mitʼṭecʼ bhajanre dohokakʼme jemon ona do ḍher din ṭikạu tahen,

¹⁵ ente noa disạmre oṛakʼ-duạr, jaega-jumi ar darkha bagwan do arhõ kiriń ạkhrińokʼa. Iń Israelren Isor phạdkoren Probhuge noa katha doń meneda.’

¹⁶ “Jumi kiriń reakʼ dolel do Neriạren hopon Baruk emade tayom iń do Probhu Isor ṭhen noań koekeda,

¹⁷ ‘E Probhu Isor, am do amakʼ maraṅ daṛete ar amakʼ daṛeanakʼ tite serma ar otem benao akada. Am ṭhen bin leṭecʼakʼ do cetʼge bạnukʼanaṅ.

¹⁸ Am do hajar hajarko amakʼ asambheṛ dayam udukʼako kana ar apatkoakʼ ghạṭko reakʼ sạjại do onkoren hoponkom emakokana. E maraṅ ar daṛeanicʼ Isor, amakʼ ńutum do sanam daṛeanicʼ Probhuge;

¹⁹ amakʼ hudisko do sorosgea ar amakʼ sanam kạmiko do daṛete perecʼgea. Manwakoakʼ sanam cạl colon secʼ amakʼ mẽtʼkin do beṅgetʼ akaege menakʼa; am do mimitʼko akoakʼ cạl colon ar kạmi reakʼ kuṛạiyem emakokana.

²⁰ Am do Misor disạmre aema cinhạkom udukʼ akatʼa ar hahaṛawakʼkom kạmileda ar teheń hõ Israel ar sanam manwako talare onakom kạmikana, onate amakʼ ńutum do pasnao idikʼkantama.

²¹ Am do cinhạ ar hahaṛawakʼ kạmikom udukʼ akada ar daṛe ar ektiạri perecʼ ti tiạrkate botoranakʼkote amren hoṛ Israelko onḍe khonem oḍok ạguletʼkoa.

²² Oka disạmre toa, dumur rasa ar jãhãnakʼ reakʼ okulạnge bạnukʼ ona disạm emako reakʼ katha onkoren hapṛamko ṭhenem gokʼleda ar onam ematʼko tahẽkana.

²³ Onko do hecʼkate onako ạidạrian tahẽkana, menkhan onko do amakʼ katha bako ańjomleda ar amakʼ ạn-ạri leka bako senlena; ar okaṭakʼ cekae lạgitʼem hukumatʼko tahẽkan ona reakʼ cetʼge bako kạmileda. Ar onatege noako muhin do onkorem paṛao ocoleda.

²⁴ Nagraha hatao lạgitʼ cetʼleka pạcri sãote pinḍhạ benao hoyokʼkan ona baṛe ńelme. Lạṛhại, akal ar mahamạri hotete nagraha do Babelrenkoakʼ tire calakʼ lạgitʼ. Ar ona dom ńeletʼkangea, ar okam menletʼ onage hoyakana,

²⁵ menkhan E Probhu Isor, Babelrenkoakʼ tire nagraha hatlenre hõ am dom metadiń tahẽkana, iń do jemon rupạte jumiyiń kiriń ar onaren gohakoń dohoko.’ ”

²⁶ Tayomte Probhu Isorakʼ noa katha do Jirimiạ ṭhen sodorena,

²⁷ “Iń Probhu Isorge, sanam manwakoren Isor kạnạń. Iń lạgitʼ Jãhãnakʼ cekae do cetʼ baṅ hoedaṛeakʼa?

²⁸ Onate noa nagraha do Babelrenko ar onkoren raj Nebukadnesarakʼ tireń soprota. Uni do noae hatjoṅa.

²⁹ Babelrenko do nagrahate bolokate onare seṅgelko junḍiyakʼa. Ar okako oṛakʼ reakʼ chat cetanre hoṛko do Bakʼal debota ńutumte dhupko jeretʼetʼ tahẽkan ar eṭakʼ debotako ńutumte coḍorkate ińko khĩs ocoyedeń tahẽkan onko do ona oṛakʼ-duạr sudhạ nagrahako jeretʼ giḍikakʼa.

³⁰ “Israel ar Jihudạren hoṛko do huḍiń khonge ińakʼ mẽtʼãhã samaṅre eken bạṛicʼakʼ chaḍa ar cetʼge bako kạmi akada; sạrige Israelren hoṛko do akoakʼ tite benaoakʼ jiniskote ińko bekusi ocoakadińạ.

³¹ Oka hilokʼ noa nagraha benaolen enhilokʼ khon teheń hạbicʼ onage ińakʼ khĩs ar edre do nonkae rakapʼ ocoakada je, ińakʼ mẽtʼãhã samaṅ khon ona doń ocokʼ giḍikakʼa,

³² ente Israel ar Jihudạren hoṛko, onkoren sanam raj ar rajkạmiyạko, naekeko ar nạbiko, Jihudạ ar Jerusalemren hoṛko do akoakʼ sanam bạṛicʼakʼ kạmi hotete ińko bekusi ocoakadińạ.

³³ Onko do iń secʼko dea akada, mẽtʼãhã do baṅa; iń do aema dhao onkoń cetʼ akawatʼko tahẽkanre hõ enhõ onko do ińakʼ ḍanṭao bako aṅgocleda.

³⁴ Onko do ińakʼ oṛakʼre akoren hirkhạwan murhutʼko doho akatʼkote onako bhonḍakada.

³⁵ Onko do Molok debota ńutumte akoren gidrạko samaṅko lạgitʼ Bin-hinom buru nalare Bakʼal debota ńutumte boṭkocʼ thankoko benao akawana. Iń do tishõ ona bạń hukum akawatʼkoa se ińakʼ monre tishõ baṅ hecʼakana, onko do nonkan bạṛicʼakʼ kạmikate Jihudạko kại ocoyea mente.

³⁶ “Ape do noa nagraha reaṅpe roṛeda, ‘lạṛhại, akal ar mahamạri hotete noa do Babel rajakʼ tire emakana,’ menkhan iń Israelren Probhu Isorgeń meneda,

³⁷ ińakʼ khĩs ar jolokʼkan edre iạte okako disạmre onkoń sạṅgiń giḍiletʼko onḍe khon khạṭigeń jarwakoa. Ar noa ṭhạ̃iteń ruạṛ ạgukoa ar khạtirjomań girobas ocokoa.

³⁸ Onko do ińren hoṛko hoyokʼa, ar iń do onkoren Isoriń hoyokʼa.

³⁹ Iń do nonkan mon ar ontoriń emakoa onko do eken iń secʼgeko ạwilokʼa; onate onko do ako apnarte ar onkoren hopon ar hoponerakoakʼ bhạlại lạgitʼ jao okte ińko botorạńạ.

⁴⁰ Onko lạgitʼ iń do noa jaejug bondobosiń dohoya ar onko lạgitʼ bhạlại do tisge bạń bonda. Iń do onkoakʼ monre botoriń rakapʼ ocoytakoa jemon iń khon tishõ aloko ruạṛ calakʼ.

⁴¹ Iń do kusi monte onkoń bhạlạikoa ar ińakʼ goṭa mon ar ontorte niạ disạmre khạṭige onko do cara lekań rohoekoa.

⁴² “Iń do noko hoṛko cetanre cetʼleka niạ maraṅ muhiniń ạguakatʼ onkage onko do ińakʼ gokʼakʼ sanamakʼ bhạlạiyiń danakoa.

⁴³ Okaṭakʼ disạm reakʼpe menetʼ tahẽkan, ‘noa do mitʼṭecʼ potit jomikana, noare manwa se janwar celege bạnukʼkoa, ente noa do Babelrenkoakʼ tire em ocoakana,’ ona disạmre jumi do arhõ kiriń ạkhrińokʼa.

⁴⁴ Benjạmin ṭoṭhare, Jerusalem beṛhaeteakʼ ṭoṭhare, Jihudạ ar Negeb reakʼ sanam ato ar nagrahakore ar usul-copotʼ buru ṭoṭha reakʼ sanam ato ar nagraha reakʼ jumiko kirińokʼa, dolelre suhikʼa ar mohor chapakʼ hoyokʼa ar gohakoko dohokʼa, ente iń do onkoakʼ lahateakʼ dosań ạgu ruạṛtakoa. Iń Probhu Isorge noa katha doń meneda.”