Jirimiạ 31 - সান্তালী বাইবেল

¹ Probhu Isore meneda, “Un jokhecʼ iń do Israelkoren sanam gusṭiren Isoriń hoyokʼa, ar onko do ińren hoṛko hoyokʼa.”

² Probhu Isor do arhõe meneda, “Israelko jirạu ńam lạgitʼko calakʼkan tahẽkanre tinạkʼ do tarwaṛe khonko paskaolen onko do hahaṅkarre ińakʼ dayako ńamleda.”

³ Ona jokhecʼ Israelko doko menleda, Probhu Isor do sạṅgiń khon onko ṭhene ńel ocolena. Ar Probhu Isor do unre onkoe metatʼko tahẽkana, “Asambheṛ dayateń dulạṛ akatʼpea; ar asambheṛ mãyãtege iń ṭheniń or sorakatʼpea.”

⁴ Ńitokʼ do uniye meneda, “E kũạri kuṛi Israel, iń do arhõń jut ruạṛmea, onate am do arhõm jut dohṛakʼa. Am do arhõ amakʼ tablam hataoa ar rạskạkʼko tulucʼem enecʼa.

⁵ Samariạ burure am do arhõ darkha bagwanem benaojoṅa; ar okoe bagwanko benaojoṅ onko do ona reakʼ joko joma.

⁶ Nonkan dinko hijukʼa tinre Ephrayimakʼ buru coṭre pahradarko do hohoateko mena, ‘Dela, Sionte aboren Probhu Isor ṭhen bon calakʼa.’ ”

⁷ Probhu Isore meneda, “Ape do Jakob lạgitʼ kusi monte sereńpe; sanamko khon soros jạtrenko lạgitʼ sarhao sereńpe. Ape do sarhao sereńate menpe, ‘E Probhu Isor, amren hoṛko, Israelren sarecʼ hoṛko baṛe bańcaokom.’

⁸ Ńelpe, utạr disạm khon iń do Israelkoń ạgukoa ar dhạrti reakʼ ses simạna khoniń jarwa mitʼkoa. Onko modre kãṛãko, leḍhako, bhạrti hoṛmoko ar bedon rakapʼ akatʼko maejiu hõko tahena; ar maraṅ utạr mitʼṭecʼ dolko ruạṛ hijukʼa.

⁹ Onko do rakʼ rakʼteko hijukʼa; ar tinre onkoń ruạṛ ạgukoa unre onko do koe koeteko hijukʼa. Onko do otte ar gaḍa dakʼko secʼteń taṛam ocokoa; onḍe onko do bako tohodokʼa, ente iń do Israelren, metakʼme Eprayimren apat kạnạń ar uni do ińren pạhil janamicʼ hopon kanae.

¹⁰ “E Jạt jạtrenko, ińakʼ katha ańjompe; ar sạṅgiń disạmkore niạ katha lại jạhirpe, ‘okoe do Israelkoe chirchạturletʼko uni do onkoe jarwakoa ar gukʼpiko leka acʼakʼ palkoe rukhiyạitaea.’

¹¹ Iń Probhu Isorge Jakob doń chaḍao ạguiyea ar onko khon hõ daṛeankoakʼ ti khoniń owareya.

¹² Onko do hecʼkate Sion reakʼ cetan ṭhạ̃ireko rạskạkʼa; ar iń emakʼ ḍher anaj, nãwã darkha rasa, sunum, bhiḍi merom ar pal ḍaṅgrakoren hopon ńamkateko rạskạkʼa. Onko do bhage dakʼ ńamakʼ bagwan lekako hoyokʼa; onko do ar bako nijorokʼa.

¹³ Kũạri kuṛiko doko enecʼa arko rạskạ joṅa, juạnko ar haṛamko hõ bako badokʼa. Onkoakʼ homor halaṅ do rạskạteń pheraotakoa; duk bodolte jiwi raṛecʼ ar rạskạń emakoa.

¹⁴ Naekeko do sanamakʼteń purunkoa, ar ińren hoṛko do ińakʼ bhor iạteko tirpidokʼa. Iń Probhu Isorge noa katha doń meneda.”

¹⁵ Probhu Isore meneda, “Ramare ãṭ aṛaṅte rakʼjoṅ ar hae haeyokʼge ańjomokʼkana; Rahel do acʼren gidrạko lạgitʼe rakʼeda, cetʼte hõ jiwi do baṅ raṛejokʼ kantaea, ente onko do ar bạnukʼkotaea.

¹⁶ Thirokʼme alom raga ar mẽtʼ dakʼ jodtam, ente amakʼ kạmi reakʼ kuṛại dom ńamgea. Onko do bạirikoakʼ disom khonko ruạṛ hijukʼa.

¹⁷ Onate tayom daram din lạgitʼ as do menakʼgetama. Amren hoponko do akoakʼ disạmteko ruạṛ hijukʼa. Iń Probhu Isorge niạ katha doń meneda.

¹⁸ “Iń do khạṭige Ephrayimakʼ noa hae haeyokʼ doń ańjomakatʼgea, ‘am do bin etoakan mĩhũ lekam ḍanṭao akadińạ, ar ona iạte iń do sạjạiyiń ńam akada. Ruạṛińme, enḍekhaniń ruạṛ hijukʼa, ente am kangeam ińren Probhu Isor do.

¹⁹ Iń do bạṛicʼ horte sen tayom kastaokateń ruạṛ hecʼena, bujhạu ńamkate koṛamiń ceṭakʼena. Iń do lajao ariń opoman ocoyena, ente ińakʼ juạn umer reakʼ kại iạtegeń opoman ocoyena.’

²⁰ Ephrayim do cetʼ ińren sadher hopon doe baṅ kantińạ? Nui do cetʼ uni hopon doe baṅ kantińạ one uni ńelteń kusikʼkan? Uni upạrte jao okte kathań roṛ akatʼrehõ enhõ iń do jaogeń disạyede kana. Ona iạte ińakʼ jiwi do uni lạgitʼe rakʼeda; uni lạgitʼ ińakʼ daya do menakʼgetińạ.

²¹ “Ape do hor horte; udukʼakʼ cinhạko dohoype ar khunṭiko bạisạupe. Ar oka hortem senlen ona hor reakʼ katha disạime. E kũạri Israel, dela ruạṛ hijukʼme, amakʼ goṭa nagrahawante ruạṛ hijukʼme.

²² E bạṛicʼ horte senakan kuṛi, ar tinạkʼ din am dom dãṛãbaṛaea? Iń Probhu Isor do dhạrtire mitʼṭecʼ nãwãnakʼ iń hoyocoakada, ona do hoyokʼ kana, maejiu do herel hoṛe aḍ bańcaoea.”

²³ Israelren Isor phạdkoren Probhui meneda, “Bondi dosa khon tinre hoṛkoń ruạṛ ạgukoa unre Jihudạ disạm ar ona nagraharen hoṛ do arhõko mena, ‘E dhoromte perecʼ tahen ṭhạ̃i, E sonot buru, Probhu Isor do ame bhoramma.’

²⁴ Onko hoṛ do Jihudạ ar ona reakʼ sanam nagrahareko girobasokʼa ar cacasko ar okoe do akoren ạsul janwarko anteko ạcur baṛaekan onko hõ onḍeko tahena.

²⁵ Iń do laṅga akankoń cerṭha ocokoa ar nacarkoakʼ ontor doń daṛe ocoytakoa.”

²⁶ Unre iń do ebhenkate beṛhaeteń beṅgetʼ ạcurkeda. Ar jạpitʼ do iń ṭhen mońjge tahẽkana.

²⁷ Probhu Isore meneda, “Okte hijukʼ kana one unre iń do Israelko ar Jihudạren hoṛko ar janwarko itạ lekań erkoa.

²⁸ Cetʼleka onkoń or totʼko, ariń rạputʼ giḍiko ariń lebda giḍikako ar onko cetanre ḍahao marao ar muhin ạgui reakʼ nońjoriń doholetʼ onkage onko benao rakapʼko ar cara leka rohoe aroko secʼhõ nońjoriń dohoyeda.

²⁹ Ona jokhecʼ hoṛko do ar bako mena, ‘Apatko do jojo darkha joko jomakada, menkhan ḍaṭa do hoponkoakʼ khoroyentakoa.’

³⁰ Ona bodolte mimitʼ hoṛ do akoakʼ kại iạtegeko gujukʼa; ar okoe jojo darkha joe jom unige ḍaṭa do khorokʼtaea.”

³¹ Probhu Isore meneda, “Okte hijukʼ kana Israel ar Jihudạren hoṛko lạgitʼ iń do mitʼṭecʼ nãwã bondobosiń bandhaoa.

³² Onkoren hapṛamko Misor disạm khon ti sapʼkateń oḍok ạguko jokhecʼ onko lạgitʼ oka bondobos iń doholetʼ noa nãwã bondobos do ona leka do baṅ hoyokʼa. Iń do unkinren jãwãe lekań tahẽkanre hõ enhõ unkin do ińakʼ bondobos kin rạputʼ akada.

³³ Israelko lạgitʼ okaṭakʼ bondobos iń bandhaoa ona do hoyokʼ kana, ińakʼ ạn-ạriko onkoakʼ monreń rebetʼakoa ar onkoakʼ ontorre hõń ol dohoya. Iń do onkoren Isoriń hoyokʼa ar onko do ińren hoṛgeko hoyokʼa.

³⁴ Apnar aḍepaserenko ar apnar boeha hõ noa mente okoege tishõ bae cetʼakoa, ‘Probhu Isor baḍaeyepe,’ ente jotoge ińko oromińạ. Ona iạte iń do onkoakʼ bedhoromiń ikạitakoa, onkoakʼ kại do ar tishõ bạń disạitakoa. Iń Probhu Isorge noa katha doń meneda.”

³⁵ Okoe do sińre siń cando, ńindạ do ńindạ cando ar ipilko marsal emokʼ lạgitʼe hukumako, ar okoe do jalapuriye lebḍayetʼkan jemon onako reakʼ ḍheoko hud hudạukʼ, ar okoeyakʼ ńutum do phạdkoren Probhu Isorkan,

³⁶ uni doe meneda, “Noa reakʼ niạmko ińakʼ mẽtʼãhã samaṅ khon sakʼ khan, Israelko hõ jạtrenko lekate iń samaṅ khonko marao utạrokʼa.

³⁷ Coṭ serma reakʼakʼko soṅlen khan ar latarre dhạrti reakʼ rehetʼ sendra ńamlen khan enḍekhan Israelko okako cekakan onate onko do bạń bạsutakoa. Iń Probhu Isorge noa katha doń meneda.”

³⁸ Probhu Isore meneda, “Ona okteko hijukʼkana tinre iń lạgitʼ Hananel buruńj khon Konac reakʼ phaṭok duạr hạbicʼ niạ nagraha do arhõ benao arokʼa.

³⁹ Sosoṅakʼ baber do onḍe khon Gareb buru hạbicʼ ticʼkate ona do Goa hạbicʼ ạcurokʼa.

⁴⁰ Goṭa buru lodam one okare mạ̃ṛĩ ar torocʼko giḍikakʼ ar purub secʼ sadom phaṭok reakʼ konac hạbicʼ Kedron buru lodam reakʼ sanam bilạn ṭạnḍiko ona do Probhu Isor ńutumte begar dohokakʼ hoyokʼa. Ar nagraha do tishõ baṅ rạputʼ giḍikʼa se baṅ dhaṅdhaserokʼa.”