Jirimiạ 30 - সান্তালী বাইবেল

Israelkoakʼ bańcaokʼ

¹ Probhu Isor ṭhen khon noa katha do Jirimiạ ṭhen sodorena,

² “Iń Israelren Probhu Isorgeń meneda, am okako kathań galmarao akatʼme ona joto do mitʼṭecʼ puthire ol dohoyme,

³ ente nonkan dinko hijukʼkana tinre iń do ińren hoṛ Israel ar Jihudạ reakʼ dosań ạgu ruạṛa ar okaṭakʼ disạm do onkoren hapṛamkoń ematʼko tahẽkan ona disạmre iń do onkoń ruạṛ ạgukoa, ar ona do onkoakʼ dokholre tahena.”

⁴ Israel ar Jihudạ babore Probhu Isor do noa kathae meneda,

⁵ “Iń Probhu Isorgeń meneda, suluk reakʼ aṛaṅ do baṅ bickom toras reakʼ ãṭ aṛaṅge ańjomokʼ kana.

⁶ Ape do kulijoṅpe ar ńelpe, herel hoṛ do cetʼ kukhire gidrại janam daṛekea? Enḍekhan cetʼ iạte daṛean herel hoṛ do bedonokʼkan maejiu leka lacʼ cetanre ti capo akan ar sanamkoakʼ mẽtʼãhã do mulin akaniń ńeletʼkana?

⁷ Hae, enhilokʼ do ạḍi botoranakʼge hoyokʼa! Onka do ar tisge baṅ hoyokʼa. Ona do Jakobakʼ kosṭo reakʼ okte hoyokʼa, menkhan uni do ona khone bańcao ocokʼa.

⁸ “Iń phạdkoren Probhu Isorgeń meneda, enhilokʼ iń do onkoakʼ taren khon arãṛiń rạputʼ giḍikatakoa ar onkoakʼ tolkoń topakʼ giḍikakʼa; bidisiạko ar do golam menkate bako dohokoa.

⁹ Ona bodolte onko do akoren Probhu Isor ar akoren raj Dạudren mitʼṭen hoponko sapʼsoraea one iń do onkoren rajiń hoeocoye.

¹⁰ “Onate E ińren golam Jakob, am do alom botorokʼa; E Israel, alom as chuṭạukʼa. Iń do sạṅgiń ṭhạ̃i khon am ar bondi idi ocoakan amren hoponko khạṭigeń bańcaokoa. Jakob do arhõ suluk ar nirạiteye tahena ar okoehõ bako botor ocoyea.

¹¹ Am são sãotege minạńa ar iń do amgeń bańcaomea. Okoe jạtrenko talare amiń chirchạturletʼme onko doń marao utạrkoa, menkhan apeko do purạte do baṅa. Menkhan begor sạjạite hõ bạń aṛakʼpea, iń do dhoromte bicạrkateń ḍanṭaopea.”

¹² Probhu Isore meneda, “Amakʼ ghao do baṅ besokʼtama, amem hạn akan reakʼ ran do bạnukʼa.

¹³ Am secʼ katha roroṛ hoṛ do okoehõ bạnukʼkoa, amakʼ ghao reakʼ ran do bạnukʼa, ar am do besokʼ reakʼ ashõ bạnukʼtama.

¹⁴ Amren sanam dulạṛiạko do amko hiṛiń akatʼmea; onko do am reaṅ bako ganḍonokʼ kana. Bạiri hạnko lekage amiń hạn akatʼmea ar kurmutạha lekageń sạjại akatʼmea, ente amakʼ bedhorom do ḍhergetama ar kạiko hõ ḍhergea.

¹⁵ Baḍaegeam ghao do baṅ besokʼtama menkhan hasote cedakʼem kikiạueda? Amakʼ aema bedhorom ar kại iạte iń do amre noań nonka akada.

¹⁶ “Menkhan okoe amko ses utạretʼme onko sanamgeko marao ocokʼa; amren sanam bạiri do bondi dosareko calakʼa. Ar okoe ame luṭ akatʼme uni hõe luṭ ocokʼa; okoe amakʼ jinisko recʼetʼme iń hõ onkoakʼ jiniskoń recʼ ocoytakoa. Hoṛ do amko metama, ‘nui kangeae uni sạṅgiń ocoakan Sion do one uniyakʼ khoj okoehõ bako hataoetʼkan,

¹⁷ menkhan enhõ iń do amakʼ hoṛmoń ruạṛkakʼa ar amakʼ ghaokoń bogeytama.’ ”

¹⁸ Probhu Isore meneda, “Jakobakʼ bõsren hoṛkoakʼ dosa doń ruạṛtakoa ar onko cetanre dayań uduga. Nagraha do ona dhaṅdhaser cetanre arhõ benao ruạṛokʼa ar raj oṛakʼ do lahateakʼ ṭhạ̃ire teṅgo akae tahena.

¹⁹ Ar ona khon do rạskạ reakʼ aṛaṅ ar sarhao reakʼ sereńge ańjomokʼa. Onkoakʼ lekha doń baṛhaotakoa, onko do bako komaokʼa. Onko doń manotkoa, onko do okoege bako nihạ̃t ocokʼa.

²⁰ Onkoren hopon ar hoponerako do lahate lekageko hoyokʼa, ar iń samaṅrege onkoakʼ somaj do rehedokʼtakoa. Ar okoe onkoko jor julumko onko doń sạjạikoa.

²¹ Onkoren mukhiyạ do onkoren mitʼ hoṛe hoyokʼtakoa; onko tala khonge ḍanṭaoicʼe rakabokʼa. Iń do uniń hohoaea ar uni do iń ṭhene hijukʼa, ente bạń hohoae khan uni do cetʼ dil salakʼ iń ṭhene hecʼdaṛeakʼa?

²² Onatege ape do ińren hoṛpe hoyokʼa ar iń do aperen Isoriń hoyokʼa.”

²³ Ńelpe, Probhu Isorakʼ edre do birbão hoe leka oḍok hijukʼa, ar lagakan hoe leka one dusṭạmikoakʼ bohokʼ cetanre pheḍ hijukʼkan.

²⁴ Probhu Isorakʼ sana purạpuri kạmire ạuri lagaokʼ hạbicʼ uniyakʼ botoranakʼ edre do baṅ ruạṛtaea. Tayom daram dinkore hõ noa dope bujhạu daṛeakʼa.