Jirimiạ 3 - সান্তালী বাইবেল

¹ Probhu Isore meneda, “Jãhãe hoṛ acʼren bạhui bạgiye ar uni maejiu do uni ṭhen khon senkate eṭakʼ hoṛ tulucʼe baplakʼ, enḍekhan uni herel hoṛ do cetʼ arhõ uni maejiu ṭhene ruạṛ calakʼa? Uniye ruạṛ calaolen khan ona disạm do cetʼ baṅ bhonḍokʼa. Menkhan am do ḍherko sãote tahẽkate kusumbiko lekam laṭghaṭ akada; ar ńit do cekate arhõ iń ṭhenem ruạṛ hijukʼa?

² “Ceḍe ḍuṅgriko secʼ beṅgetʼ rakapʼkate ńelme. Nonkan jãhãn ṭhạ̃i menakʼa one onḍe bam laṭghaṭ akatʼ? Okoeko tulucʼem laṭghaṭ akatʼ onko lạgitʼ am do hor aṛerem duṛupʼkokʼ kan tahẽkana, hahaṅkarre mitʼṭen Arabi hoṛ lekam tãṛãkʼkokʼ kan tahẽkana. Amakʼ hirkhạwakʼ ar loṭghuṭikote disạm dom bhonḍ akada.

³ Ona iạte achaṛ dakʼko akoṭokʼ kana ar niron din reakʼ dakʼ hõ baṅ hijukʼkana. Am do kusumbi ạimại lekagem ńelokʼkana; ar lajao hõ bam lajaokʼ kana.

⁴ Am do cetʼ ńitge hohoate bam metadińạ, ‘E baba, am do ińakʼ juạn jokhecʼren gate kanam,

⁵ am do cetʼ jao oktege edre akanem tahena? Amakʼ edre do cetʼ jaejug hạbicʼ tahentama?’ Am do onkagem men akada, menkhan daṛeakʼ bhor bạṛicʼakʼgem kạmi akada.”

Bepạtiạricʼ Israel

⁶ Josiạ rajakʼ rajokʼ oktere Probhu Isor do ińe metadińạ, “Bạṛicʼakʼ horteye sen akan Israel okae cekakan ona do cetʼem ńel akatʼgea? Uni do sanam usul buruko cetanre ar hạṛiạr dare buṭạkore senkateye laṭghaṭ akada.

⁷ Iń doń hudisetʼ tahẽkana niạko tayom do iń ṭhene ruạṛ hijukʼa, menkhan bae ruạṛ hecʼlena ar uniren bepạtiạricʼ misera Jihudạ hõ onae ńelkeda.

⁸ Bạṛicʼ horte senakan Israel do bapag doleliń emade tahẽkana ar sanam lekan laṭghaṭ iạte uniń sạṅgiń giḍiledea. Menkhan iń doń ńelkeda uniren bepạtiạricʼ boeha kuṛi Jihudạ hõ jãhãn botorge bạnukʼtaea; uni hõ senkateye loṭghoṭikeda.

⁹ Uni do loṭghuṭi reakʼ kạmi jãhãnakʼ bae metatʼte dhiriren ar kaṭren debotako sãoteye laṭghaṭketʼte disạme bhonḍkeda.

¹⁰ Ar niạko hoyenre hõ Israelren bepạtiạricʼ boeha kuṛi Jihudạ do acʼakʼ goṭa monte do baṅa menkhan eken iń ṭhen ruạṛ hijukʼ reakʼe bhankeda. Iń Probhu Isorge noa katha doń meneda.”

¹¹ Probhu Isor do iń metadińạ, “Bạṛicʼ horte sen akan Israel do bepạtiạricʼ Jihudạ khon hõ bạ̃ṛti dhorome udugokʼ kana.

¹² Am do senkate utạr secʼ samaṅkate noako sombat lại jạhirme: ‘iń Probhu Isorgeń meneda, E bạṛicʼ horte ghańjeṛ akan Israel, dela ruạṛ hijukʼme. Kurkunḍucʼkate am secʼ beṅgetʼ akae do bạń tahena; ente iń doń dayawạnicʼ kana, onate jaejug hạbicʼ edre akan do bạń tahena.

¹³ Am do eken amakʼ ghạṭko aṅgocʼme, amren Probhu Isor upạrtem hul akada mente, ar hạṛiạṛ dare buṭạkore debotako do amakʼ dulạṛem em akawatʼkoa ar ińakʼ aṛaṅ hõ bam ańjom akada.’

¹⁴ ‘Iń Probhu Isor do arhoń meneda, ‘E bạṛicʼ horte sen akan hoṛko, dela ruạṛ hijukʼpe, ente iń kangeạń aperen jãwãe do. Iń do ape tala reakʼ mimitʼ nagraha khon mitʼ hoṛ ar mimitʼ bõsrenko khon babar hoṛ bachaokate Sionteń ạgupea.

¹⁵ Ar ona tayom do ińakʼ kusi leka gukʼpikoń emapea; onko do ạkil ar bud salakʼko calaopea.

¹⁶ Ona jokhecʼ disạmre aperen hoṛkoakʼ lekha tinre ḍher idikʼa unre hoṛko do Probhu Isorakʼ bondobos sinduk reaṅ ar do bako roṛ baṛaea. Uniyakʼ katha doko hiṛiń cabaya ar disạ hõ bako disạya; ona do bako khojogokʼa, ar benao hõ bako benaojoṅa.

¹⁷ Unre sanam jạtren hoṛko Jerusalem do Probhu Isorakʼ siṅghạsonko metakʼa, ar Probhu Isor dewa sewawae lạgitʼ onḍeko jarwakʼa. Ar akoakʼ bạṛicʼ ontor do ṭenḍoskate bako pańjaea.

¹⁸ Un jokhecʼ Jihudạren hoṛ do Israelren hoṛko sãoteko seledokʼa ar okaṭakʼ disạm ạidạri menkate aperen hapṛamkoń ematʼko tahẽkan ona disạmre mitʼdomte utạr secʼ khonko ruạṛ hijukʼa.’

¹⁹ “Ińgeń menleda, ‘ińge hoponko menkateń ataṅpea ar mitʼṭecʼ hạ̃sanakʼ disạmre, jạt jạtrenko talare mońj utạr ạidạriankoń hoyocopea.’ Iń doń hudisleda baba mentepe hohowạńạ ar iń tayom khon do bape ruạṛa.

²⁰ Menkhan E Israelko, jãwãetetʼ cetanre bepạtiạricʼ bạhu leka ape do ińre bepạtiạrankope hoyakana. Iń Probhu Isorge noa katha doń meneda.”

²¹ Ceḍe ḍuṅgriko cetanre Israelkoakʼ rakʼjoṅ ar nehõr reakʼ aṛaṅ ańjomokʼ kana, ente onko do akoakʼ horko konḍea akatʼtakoa ar akoren Probhu Isorko hiṛiń akadea.

²² Probhu Isore meneda, “E bạṛicʼ horte sen akan hoponko, dela ruạṛ hijukʼpe; apeakʼ peṛta horte ghańjeṛ akan reakʼ ruạń cabaetapea.” Unre Israelkoko mena, “Hẽ, ale do am ṭhengele ruạṛ hijukʼa, ente am kangeam aleren Probhu Isor do.

²³ Sạrige buru boṭkocʼ khon goṛowakʼ do eṛeteakʼ chaḍa ar cetʼge baṅkana. Sạrige aleren Probhu Isorrege Israelkoakʼ bańcaokʼ do menakʼa.

²⁴ Aboakʼ juạn jokhecʼ khonge aboren hapṛamkoakʼ khaṭaoteakʼ jo, metakʼme onkoren gại-ḍaṅgra, bhiḍi merom palko ar onkoren hopon ar hoponerako do onko lajao ocokʼkan debotageko utʼ akatʼkoa.

²⁵ Dela hijukʼpe, abo do aboakʼ lajaoakʼre bon kunḍlạṅokʼma,, aboakʼ lajao do aboko danaṅ esetʼbon ma. Juạn okte khon teheń hạbicʼ abo do aboren Probhu Isor upạrte bon kạiyeda, ar aboren hapṛamko hõ onkageko kạmileda. Abo do aboren Probhu Isorakʼ bon bebatao akada.”