Jirimiạ 29 - সান্তালী বাইবেল

Babelren bondiko ṭhen ciṭhi

¹ Bondiko modre sarecʼ akan murubbiko, naekeko, nạbiko ar eṭakʼ sanam hoṛko Nebukadnesar raj do Jerusalem khon bondikate Babelteye idiletʼko onko ṭhen Jirimiạ do Jerusalem khon mitʼṭecʼ ciṭhiye kolkeda.

² Ar Jekoniạ raj ar uniren eṅgat, rajkạmiyạko, Jihudạ ar Jerusalemren mukhiyạko, kạrigolko ar kamarko Jerusalem khon bondikate idiko tayom noa ciṭhi do ol hoylena.

³ Jihudạren Sedekiạ raj do Saphan hopon Elasa ar Hilkiạ hopon Gemaria do Nebukadnesar raj ṭhene kolletʼkina, ar Jirimiạ do unkin tite noa ciṭhiye kolleda. Onare ol tahẽkana:

⁴ Phạdkoren Probhu Isor okoe do bondi lekate Jerusalem khon Babelteye kol akatʼko onko sanamko ṭhene meneda,

⁵ “Ape do oṛakʼ-duạr benaokate girobasokʼpe; ar kheb baṛge benaokate ona reakʼ jo jompe.

⁶ Baplakʼpe ar gidrạko janamkope; aperen hoponko bạhuakope ar hoponerako baplakakope jemon onkoren hõ gidrạko hoyokʼtako. Ape do onḍe saṅgekʼpe, ar alope komaokʼa.

⁷ Ona chaḍa okaṭakʼ nagrahare bondi lekateń idiakatʼpe onḍenakʼ bhạlại reakʼ kurumuṭuipe. Ona iạte iń ṭhen koejoṅpe, ente ona nagraha reakʼ bhạlại hoylen khan ape hõ bhạlại hoyokʼtapea.

⁸ Ape talare menakʼko nạbiko ar gonokko jemon aloko eṛepe. Onko okaṭakʼ kukmũko ńeletʼ ona do alope moneyakʼa.

⁹ Onko do iń ńutumte eṛe kathako roṛeda. Iń Probhu Isor do onko bạń kol akatʼkoa.

¹⁰ “Babel reaṅ eaegel bochor reakʼ okaṭakʼ katha roṛakan ona purạulen khan iń do apeń moneyapea; ar okaṭakʼ bhạlạipe reakʼ iń gokʼ akawatʼpe onań purạua, metakʼme noa ṭhạ̃iteń ạgu ruạṛpea.

¹¹ Ape lạgitʼ ińakʼ goṭawakʼ do ińiń baḍaea; ona do apeakʼ bhạlại lạgitʼge, bạṛicʼ lạgitʼ do baṅa. Ar ona goṭawakʼ hotetege apeakʼ tayom daram reakʼ as do purạukʼtapea.

¹² Unre ape do ińpe hohowạńạ ar iń ṭhen hecʼkatepe koejoṅa; ar iń do apeakʼ iń ańjomtapea.

¹³ Ape do ontorte baḍaeyiń reakʼ tinrepe ahkaokʼa unre ińpe baḍae daṛeạńạ.

¹⁴ Ape dope baḍaeyińạ, ar iń do apeakʼ bondi dosa khoniń ruạṛ ạgupea. Okoe jạtrenko ar ṭhạ̃ireń sạṅgiń akatʼpe onḍe khon iń doń samṭao jarwapea. Ar okaṭakʼ ṭhạ̃i khon bondikateń idi ocoletʼpe iń do onḍegeń ạgu ruạṛpea. Iń Probhu Isorge noa katha doń meneda.”

¹⁵ Hoedaṛeakʼa apepe mena, “Probhu Isorge Babelre ale tala khon nạbikoe upel akatʼkoa.”

¹⁶ Menkhan Dạudakʼ siṅghạsonre duṛupʼ raj reaṅ ar niạ nagraharen sarecʼ sanam hoṛko reaṅ, metakʼme apeakʼ disạmren hoṛko okoe do ape sãote bako bondi ocolen onko sanamko reaṅ Probhu Isor doe meneda,

¹⁷ “Iń phạdkoren Probhu Isor do onko upạrte lạṛhại, akal ar mahamạriń kola ar onko do hirkhạwakʼ loa lekań hoyocokoa one ona do bạṛicʼ iạte celege bako jom daṛeakʼ.

¹⁸ Iń do lạṛhại, akal ar mahamạrite onkoń khudạu baṛakoa ar dhạrtiren sanam rajosṭirenko ṭhen do botoranko lekań hoyocokoa. Ar okoe jạtrenko talareń laga ńirko onko ṭhen do landa-dhutʼan ar hirkhạwankogeń hoyocokoa. Onko ńelte hoṛko doko ṭhak utạrokʼa ar onkoakʼ ńutum do sarapanakʼ hoyokʼtakoa.

¹⁹ Ente okaṭakʼ katha iń do aema dhao ińren golamko, metakʼme nạbiko hotete onko ṭheniń jạhirletʼ onko do ona bako ańjomletʼtińạ.

²⁰ “Ona iạte ape bondi akanko, okoe do Jerusalem khon Babelteń kolakatʼpe, ape sanamge ińakʼ katha ańjompe.

²¹ Kolayaren hopon Ahab ar Maseyaren hopon Sedekiạ, unkin do iń ńutumte ape ṭhen eṛekin nạbiyetʼkan, unkin reaṅ iń Israelren Isor phạdkoren Probhugeń meneda, unkin do Babelren raj Nebukadnesarakʼ tireń soprotkińạ, ar uni do apeakʼ mẽtʼ samaṅregeye gocʼkinạ.

²² Ar Babelre menakʼko Jihudạren sanam bondiko do hoṛko ạsisakore unkinakʼ kathako roṛa, ‘Probhu Isor do Sedekiạ ar Ahab lekae hoeocoy tạkinma, one Babelren raj do seṅgelte unkine atarletʼ kin,’

²³ ente unkin do Israelko talare ạḍi hirkhạwakʼ kin kạmi akada; unkin do aḍepaseren maejiuko tulucʼkin laṭghaṭ akada ar okaṭakʼ bạń menakatʼ kin unkin do ińakʼ ńutumte eṛeyakʼkin nạbi akada. Iń do onań baḍaegea ar onaren goha kạnạń. Iń Probhu Isorge noa katha doń meneda.”

Semayawakʼ ciṭhi

²⁴ Nehelamren Semaya dom metaea,

²⁵ Phạdkoren Probhu Isore meneda, “Am do amakʼ ńutumte Jerusalemren sanam hoṛko ṭhen, Maseyaren hopon naeke Sephaniạ ṭhen ar eṭakʼ sanam naekeko ṭhen ciṭhim kol akada.

²⁶ Am do Sephaniạm ol akawadea, ‘Probhu Isor do Jehoyada naeke bodolte amge naeke menteye ojokʼ bahal akatʼmea jemon Probhu Isorakʼ oṛakʼ reakʼ bhar am cetanre tahen. Jãhãe lelha hoṛ nạbi lekae kạmi khan uni dom hạṛi paṭayea ar hoṭokʼre mẽṛhẽtʼ sikṛitem tolea.

²⁷ Ar Anathotren Jirimiạ do unre ape ṭhene nạbiketʼre cedakʼ bam sạjạiledea?

²⁸ Uni do Babelre ale ṭhen niạ khobore kolleda, ḍher din nonḍe tahen hoyokʼtalea. Onate oṛakʼ-duạrle benao joṅte nonḍele girobasokʼ ar khet baṛge benaokate cas baskatele joma.’ ”

²⁹ Naeke Sephaniạ do menkhan ona ciṭhi Jirimiạ nạbi ṭhene paṛhaokeda.

³⁰ Unre Probhu Isorakʼ noa katha do Jirimiạ ṭhen sodorena,

³¹ “Am do sanam bondiko ṭhen niạ khobor kolme, Nehelamren Semaya reaṅ Probhu Isore meneda, ‘Semaya do bạń kol akadea, enhõ uni do ape ṭhen nạbiye udugokʼ kana ar eṛe kathateye pạtiạu ocoakatʼpea.

³² Iń do khạṭige Nehelamren Semaya ar uni bõsrenkoń sạjạikoa. Noko jạtrenko modre uniren do celege bako tahena ar ińren hoṛko okań bhạlạiko ona do bae ńela, ente uni do iń upạrteye hul akada. Iń Probhu Isorge noa katha doń meneda.’ ”