Jirimiạ 28 - সান্তালী বাইবেল

Ekʼṛe nạbi Hananiạ

¹ Inạ bochorge, Jihudạren raj Sedekiạwakʼ rajokʼ pạhil secʼ, metakʼme ponakʼ bochor reakʼ mõṛẽakʼ candore Gibeon nagraharen Asur hopon Hananiạ nạbi do Probhu Isorakʼ oṛakʼre naekeko ar sanam hoṛko samaṅre Jirimiạ noa kathae metadea,

² Israelkoren Isor phạdkoren Probhui meneda, ‘iń do Babelren rajakʼ arãṛ iń rạpudtaea.

³ Babel raj Nebukadnesar do Probhu Isorakʼ oṛakʼ reakʼ okako jinis nonḍe khon Babelteye idiyakatʼ onako iń do bar bochor bhitrite nonḍeń ạgu ruạṛa.

⁴ Ona chaḍa iń do Jehoyakim hopon Jihudạren raj Jekoniạ ar Jihudạren eṭakʼ bondiko okoe do Babelteko senakan onko hõ niạ jaegateń ruạṛ ạgukoa, ente Babelren rajakʼ arãṛ doń rạputʼ giḍiytaea. Iń Probhu Isorge niạ katha doń meneda.’ ”

⁵ Unre Jirimiạ nạbi do naekeko ar sanam hoṛko okoe do Probhu Isorakʼ oṛakʼreko teṅgo akan tahẽkan onko samaṅre Hananiạ nạbiye roṛ ruạṛadea.

⁶ Uni doe menkeda, “Amen, Probhu Isor do onageye onkaema. Probhu Isorakʼ oṛakʼ reakʼ jinisko ar Babel khon sanam bondiko nonḍe ruạṛ ạgukote Probhu Isor do amakʼ nạbi katha reakʼgeye purạu ma.

⁷ Menkhan am ar sanam hoṛko samaṅre okaṭakʼ katha lại jạhir iń menetʼkan ona baṛe ańjomtińpe.

⁸ Am ar iń lahate sedaeren okoe nạbikoko tahẽkan, onko do aema disạm ar maraṅ maraṅ rajosṭi upạrte lạṛhại, akal ar mahamạri reaṅko nạbileda.

⁹ Menkhan okoe nạbi do suluk reakʼ kathae roṛ ar uniyakʼ katha tinre purạukʼa unre baḍaeyokʼa, sạrige uni do Probhu Isorgeye kolledea mente.”

¹⁰ Inạ tayom Hananiạ nạbi do Jirimiwakʼ taren reakʼ arãṛe rạputʼkeda.

¹¹ Ar sanam hoṛkoe metatʼkoa, “Probhu Isore meneda, ‘nonkage iń do bar bochor bhitrite sanam jạtrenkoakʼ taren khon Babel raj Nebukadnesarakʼ arãṛ iń rạputʼ giḍiya.’ ” Unre Jirimiạ nạbi do onḍe khone calaoena.

¹² Hananiạ arãṛe rạputʼletʼ thoṛa din tayom khange Probhu Isorakʼ katha do Jirimiạ ṭhen sodorena,

¹³ “Am do senkate Hananiạ metaeme, Probhu Isore meneda, ‘am do kaṭ reakʼ arãṛem rạputʼ giḍiakada menkhan iń do mẽṛhẽtʼ reakʼ arãṛ iń benaoa.

¹⁴ Iń Israelren phạdkoren Probhu Isorgeń meneda, noko jạtrenko jemon Babelren raj Nebukadnesarren golamko hoyokʼ onate onkoakʼ tarenre mẽṛhẽtʼ reakʼ arãṛ iń ladeakoa, ar onko do uniko sapʼsoraea. Ar uni do bir janwarko cetanre hõ ektiạriń emaea.’ ”

¹⁵ Unre Jirimiạ nạbi do Hananiại metadea, “E Hananiạ, ańjomme. Probhu Isor do bae kol akatʼmea, menkhan jạtrenko do eṛe kathatem pạtiạu ocoakatʼkoa.

¹⁶ Onate Probhu Isore meneda, ‘am do dhạrti khoniń ocokʼmea. Niạ bochorge am dom gujukʼa, ente am do Probhu Isor upạrte hul reakʼem porcar akada.’ ”

¹⁷ Inạ bochor reakʼ eaeakʼ candore Hananiạ nạbi doe gocʼena.