Jirimiạ 27 - সান্তালী বাইবেল

Nebukadnesar tabere Jihudạ disạm

¹ Josiạ hopon Jihudạren raj Sedekiạwakʼ rajokʼ pạhil secʼ Probhu Isorakʼ katha do Jirimiạ ṭhen sodorena.

² Probhu Isor do uniye metadea, “Am do harta reakʼ phitạ ar kaṭ reakʼ mitʼṭecʼ arãṛ benaokate amakʼ tarenre gogme.

³ Ona tayom okoeko paṭhaona do Edomren raj, Moabren raj, Amonren raj, Turren raj ar Sidonren raj ṭhen khon Jerusalemte Jihudạren raj Sedekiạ ṭhenko hecʼakan onko hotete sanam rapajko ṭhen khoborem kola.

⁴ Onkoren kisạ̃ṛko mitʼṭecʼ khobor emako lạgitʼem metakoa, Israelren Isor phạdkoren Probhu do onkoren kisạ̃ṛko niạ katha galmarao ako lạgitʼe metakokana,

⁵ ‘ińakʼ maraṅ daṛete ar ektiạri perecʼ tite iń do niạ dhạrti ar ona cetanre okoe manwa ar janwarkoń sirjạu akatʼko, ar okoe lek kanae menteń hudisede uniyakʼ tirege iń do ektiạriń emetʼkana.

⁶ Ńitokʼ iń do apeakʼ goṭa disạmge ińren golam Babelren raj Nebukadnesarakʼ tireń soprota; ar bir janwarko hõ uni tabereń dohokoa.

⁷ Tinạkʼ din uniyakʼ disạm reakʼ okte baṅ hijukʼ unạkʼ din sanam jạtrenko do uniren hoponko ar uniren goṛomtetʼkoren golamko hoyokʼa; ona tayom aema jạtrenko ar maraṅ maraṅ rapajko do unige akoren golamko benaoea.

⁸ “Menkhan jãhãe jạtrenko se rajosṭi jodi Babel raj Nebukadnesar ren golam bako hoyokʼ se uniyakʼ arãṛ bako gog enḍekhan onko jạtrenko do lạṛhại, akal ar mahamạriteń sạjạikoa tin hạbicʼ onko jạtrenko uni tite bạń maraoko.

⁹ Onate aperen nạbiko, gonokko, ar kukmũ guruko, mãyãko, se jạdu udukʼkoakʼ katha do alope ańjomtakoa; onko do apeko metapea, Babel rajren golam do bape hoyokʼa.

¹⁰ Onko do eṛeyakʼko nạbiya, onate ape do apeakʼ disạm khonpe sạṅgiń ocokʼa; iń do apeń laga ńirpea ar ape dope marao utạrokʼa.

¹¹ Menkhan jãhãe jạtrenko jodi Babel rajakʼ arãṛko gog ar uniren gutiko hoyokʼ enḍekhan onko jạtrenko do akoakʼ disạmreń tahẽ ocoakoa jemon onḍeko casbas daṛeakʼa. Iń Probhu Isorge noa katha doń meneda.”

¹² Jihudạren raj Sedekiạ do ona sombatgeń lạiyadea, “Babelren rajakʼ arãṛ gogme; uni ar uniren hoṛkoren golam hoyokʼme, enḍekhan am dom bańcaokʼa.

¹³ Okoe jạtrenko do Babel rajren golam bako hoyokʼ onko upạrte Probhu Isor okae menetʼkan ona leka am ar amren hoṛko do lạṛhại, akal ar mahamạrite cedakʼpe gujukʼa?

¹⁴ Onko nạbikoakʼ katha alo ańjomtako lạgitʼ okoeko metapekan, ‘ape do tishõ Babel rajren golam bape hoyokʼa,’ onko do ape ṭhen eṛeyakʼko nạbiyeda.

¹⁵ Probhu Isore meneda, ‘iń do onko bạń kol akatʼkoa. Onko do iń ńutumte eṛeyakʼko nạbiyeda. Ona iạte ape ṭhen okoeko nạbiyetʼ onko nạbi doń sạṅgińkoa ar ape sanamkogepe marao utạrokʼa.’ ”

¹⁶ Unre iń do naekeko ar sanam hoṛkoń metatʼkoa, Probhu Isor meneda, “Okoe nạbi oneko metapekan, ‘Probhu Isorakʼ oṛakʼ reakʼ jinisko do usạratege Babel khon ruạṛ ạgukʼa,’ onkoakʼ katha do alope ańjomtakoa. Onko do ape ṭhen eṛeyakʼko nạbiyeda.

¹⁷ Onkoakʼ katha do alogepe ańjoma. Ape do Babelren raj sapʼsoraepe, enḍekhan ape dope bańcaokʼa. Noa nagraha do cedakʼ jarkharokʼa?

¹⁸ Onko doko nạbikan khan ar Probhu Isorakʼ katha onko ṭhen menakʼ khan enḍekhan Probhu Isorakʼ oṛakʼ reakʼ, Jihudạwakʼ raj oṛakʼ reakʼ ar Jerusalemre ńithõ oka jinisko sarecʼ menakʼ ona jemon Babelte alo idikʼ ona lạgitʼ phạdkoren Probhu Isor ṭhenko nehõrokʼ ma.

^19-20 Babelren raj Nebukadnesar do Jehoyakimren hopon Jihudạren raj Jekoniạ, Jihudạ ar Jerusalemren mukhiyạko Jerusalem khon Babelte idiko jokhecʼ oka tham khunṭikin, maraṅ bhajan, doṛomakʼko ar eṭakʼ okako jinisko bako idiakatʼ onako reaṅ phạdkoren Probhu Isor doe meneda,

^21-22 ‘okako jinis ińakʼ oṛakʼ ar Jihudạ rajakʼ oṛakʼre ar Jerusalemre menakʼ onako hõ Babelte idikʼa ar tin hạbicʼ onako bạń moneyakʼ un hạbicʼ onako do onḍege tahena. Ar ona tayom iń do arhõ niạ ṭhạ̃ite onakoń ruạṛ ạguiya. Iń Israelren Isor phạdkoren Probhuge niạ katha doń meneda.’ ”